𑢹𑢩𑢩 𑢾𑢩𑢶𑢡𑢮

𑢡𑣗𑣃𑣁𑣄 𑢴𑣂𑣝𑣃𑣖 𑢷𑣙𑣜𑣉𑣕 𑣜𑣈𑣓 𑢡𑣔𑣂𑣗𑣁𑣞𑣂 𑣙𑣃𑣔𑣈 𑣖𑣓𑣌𑣉 𑣗𑣂𑣕𑣈𑣜𑣈𑣕𑣈 𑢹𑣉𑣉 𑢹𑣃𑣔𑣈 𑣈𑣞𑣃 𑣏𑣉𑣜𑣏𑣂𑣕 𑢹𑣃𑣔𑣈 𑣕𑣁𑣓𑣁. 𑢳𑣈𑣓𑣁 𑣖𑣃𑣊𑣑𑣁 𑣘𑣉𑣜𑣂𑣗𑣁𑣜 𑣜𑣈𑣅𑣁𑣄 𑣖𑣂𑣅𑣈𑣑 𑣎𑣁𑣕𑣂 𑣕𑣓𑣁. 𑢳𑣈𑣓 𑢹𑣃𑣔𑣈 𑣜𑣈𑣓 𑣙𑣉𑣉𑣌𑣉 𑢧𑣑𑣂𑣝𑣁, 𑢮𑣙𑣜𑣌𑣉𑣙𑣊𑣑 𑣉𑣓𑣑𑣉𑣄 𑢸𑣉𑣝𑣏𑣂𑣖𑣗𑣉𑣊𑣋𑣉 𑣜𑣈 𑣘𑣃𑣜𑣈𑣄 𑣖𑣈𑣓𑣁 𑣌𑣉𑣁𑣄. 𑢹𑣉𑣉 𑣙𑣃𑣔𑣈 𑣜𑣈𑣓 𑣙𑣉𑣉𑣌𑣉 𑣘𑣉𑣙𑣌𑣃𑣜𑣕𑣂 𑣔𑣈𑣗𑣕𑣁 𑣖𑣈𑣓𑣕𑣈 𑢾𑣂𑣊𑣙𑣉𑣗𑣉𑣊𑣋𑣁 𑣋𑣈𑣌 𑣖𑣁𑣓𑣁𑣕𑣂𑢠 𑣕𑣁𑣆𑣅𑣈𑣄 𑣉𑣓𑣑𑣉𑣄 𑣁𑣌𑣉 𑣁𑣘𑣓𑣁 𑣙𑣃𑣔𑣈 𑣜𑣈𑣅𑣁𑣄 𑣞𑣉𑢠𑣞𑣌𑣃𑣜𑣕𑣂 𑣈𑣞𑣃𑣌𑣉 𑣜𑣁𑢠𑣞𑣁 𑣕𑣈𑣅𑣁𑣄. 𑢹𑣉𑣉 𑣙𑣃𑣔𑣈 𑣜𑣈𑣁𑣅𑣄 𑣖𑣁𑣜𑣁𑢠 𑣘𑣉𑣁𑣉𑣗 𑣌𑣉 𑣗𑣂𑣕𑣈𑣜𑣈𑣕𑣈 𑢶𑣋𑣈 𑣘𑣉𑣜𑣉𑣗 𑣈𑣞𑣃 𑣗𑣃𑣋𑣂𑣓 𑣕𑣈𑣌𑣉 𑣖𑣁𑣓𑣁𑣕𑣂𑣊𑣈'𑣄 𑣉𑣓𑣑𑣉𑣄 𑣏𑣁𑣉𑣝𑣉 𑣘𑣆𑣒𑣂𑣌𑣉 𑣜𑣈 𑣈𑣞𑣃 𑣁𑣅𑣁𑣜 𑣕𑣈𑣌𑣉 𑣕𑣁𑣆𑣓𑣈. 𑢹𑣉𑣉 𑣙𑣃𑣔𑣈 𑣜𑣈𑣅𑣁𑣄 𑢹𑣁𑣅𑣁𑣖 "𑢹𑣉𑣉 𑢹𑣁𑣅𑣁𑣖" 𑣉𑣓𑣑𑣉𑣄 𑣁𑣌𑣉𑣁'𑣄 𑣚𑣂𑣘𑣂 "𑢹𑣉𑣗𑣁𑣜𑣁𑣊 𑣏𑣂𑣕𑣂". 𑢳𑣈𑣓 𑣚𑣂𑣘𑣂 '𑢵' 𑣋𑣃𑣜𑣃 𑣚𑣁𑣌𑣉 𑣗𑣉𑣔𑣉𑣜𑣁 𑣕𑣂𑣌𑣂𑣓 𑣌𑣂𑣓 𑣘𑣁𑣓𑣎𑣁 𑣓𑣁𑣖 𑣚𑣈𑣑𑣁. 𑣓𑣈𑣓 𑣚𑣂𑣘𑣂 𑣙𑣃𑣔𑣈𑣜𑣈 𑣞𑣁𑣓𑣁𑣖 𑣌𑣉 𑣈𑣕𑣉𑣅𑣈𑣏𑣁 𑣖𑣈𑣓𑣕𑣈 𑣈𑣞𑣃 𑣘𑣃𑣜𑣈𑣄 𑣌𑣃𑣖𑣃 𑣌𑣉 𑣌𑣂𑣓 𑣓𑣈𑣚 𑣚𑣈𑣑𑣁. 𑢳𑣂𑣖𑣂𑣜 𑢴𑣂𑣚𑣁𑣊 𑣈𑣞𑣃 𑣘𑣃𑣜𑣈𑣄 𑣒𑣁𑣅𑣈𑣑 𑣌𑣉𑣜𑣈 "𑢹𑣉𑣉" 𑣚𑣂𑣘𑣂 𑣈𑣓𑣈𑣕𑣉 𑣚𑣁𑣋𑣂𑣑 𑣖𑣉𑣊𑣑𑣉𑣄 𑣌𑣉 𑣖𑣈𑣓𑣁𑣄 𑣉𑣓𑣑𑣉𑣄 𑣈𑣞𑣃 𑣘𑣃𑣜𑣈 𑣈𑣓 𑣖𑣉𑣊𑣑𑣉𑣄 𑣌𑣉𑣜𑣈 𑣘𑣛𑣁𑣉𑣕𑣁𑣓𑣁𑣌𑣉. 𑢵𑣂𑣞𑣂𑣊 𑣓𑣈𑣓 𑣙𑣉𑣉 𑣙𑣁𑣅𑣁𑣖 𑣕𑣈 𑣏𑣂𑣖𑣂𑣓𑣁𑢠 𑢾𑣉𑣜𑣌𑣁𑣜𑣂 𑣖𑣉𑣊𑣑𑣉𑣄 𑣌𑣉𑣜𑣈𑣉 𑣘𑣛𑣁𑣉𑣌𑣉 𑣙𑣉𑣗𑣁𑣓 𑣕𑣁𑣓𑣁. 𑢨𑣓𑣁 𑣚𑣉𑣄𑣕𑣈 𑣓𑣈𑣓 𑣏𑣈𑣕𑣁𑣓 𑣜𑣈 𑣈𑣞𑣃 𑣘𑣃𑣜𑣈 𑣘𑣁𑣒𑣃𑣁 𑣘𑣁𑣒𑣂𑣅𑣈 𑣌𑣉 𑣋𑣉𑣗𑣈𑣞𑣉𑣐𑣁 𑣜𑣈𑣉 𑣖𑣈𑣓𑣁𑣌𑣉𑣁 𑣉𑣓𑣑𑣉𑣄 𑢸𑣂 𑣈𑣄. 𑣑𑣂 𑣉𑣌𑣉 𑣙𑣁𑣞𑣉𑣚 𑣏𑣁𑣗𑣁𑣌𑣈𑣑 𑣋𑣈𑣅𑣁. 𑢹𑣉𑣉 𑢹𑣁𑣅𑣁𑣖 𑣜𑣈𑣅𑣁𑣄 𑣘𑣉𑣜𑣅𑣉𑣋 𑣌𑣈𑣕𑣈 𑣞𑣓𑣁𑣖 𑣚𑣈𑣌𑣁𑣓 𑣙𑣉𑣉𑣌𑣉 𑣗𑣂𑣕𑣈𑣜 𑣜𑣈 𑣁𑣌𑣃𑣁𑣄 𑣎𑣂𑣗𑣉𑣓 𑣌𑣉𑣜𑣈 𑣈𑣞𑣃 𑣘𑣃𑣜𑣈 𑣇𑣓𑣓𑣉𑣕𑣂 𑢹𑣉𑣗𑣁𑣓 𑣕𑣁𑣓𑣁. 𑢳𑣈𑣓 𑢹𑣉𑣉 𑢹𑣁𑣅𑣁𑣖 𑣜𑣈𑣁𑣄 𑣘𑣉𑣜𑣅𑣉𑣋 𑣞𑣃𑣞𑣃𑣓, 𑣔𑣃𑣜𑢠, 𑣘𑣂𑣚𑣂𑣖, 𑣚𑣁𑣆𑣗𑣙𑣈𑣜𑣜𑣂, 𑣖𑣉𑣊𑣑𑣉𑣄, 𑣌𑣂𑣕𑣁𑣗 𑣔𑣉𑣌𑣁𑣓 𑣉𑣓𑣑𑣉𑣄 𑣌𑣉𑣖𑣘𑣅𑣃𑣒𑣉𑣜 𑣗𑣂𑣗𑣁𑣋 𑣜𑣈 𑣏𑣁𑣚𑣃𑣅𑣈 𑣌𑣁𑣓𑣁. 𑢳𑣈𑣓 𑣙𑣁𑣅𑣁𑣖 𑣕𑣂𑣞𑣂𑣊 𑣌𑣉𑣖𑣘𑣅𑣃𑣒𑣁𑣜 𑣏𑣂 𑣆𑣓𑣒𑣉𑣜𑣓𑣈𑣒 𑣚𑣈𑣌𑣁𑣓 𑣒𑣈𑣌𑣓𑣉𑣚𑣉𑣎𑣂 𑣜𑣈𑣅𑣉 𑣏𑣁𑣚𑣕𑣂 𑣙𑣉𑣗𑣁𑣓 𑣕𑣁𑣓𑣁 𑣚𑣉𑣄𑣕𑣈 𑣎𑣁𑣉𑣋𑣈 𑣚𑣈𑣌𑣁𑣓 𑣎𑣂𑣗𑣉𑣓 𑣜𑣈 𑣈𑣞𑣃 𑣘𑣃𑣜𑣈 𑣗𑣉𑣅𑣗𑣉𑣙𑣁𑣜 𑣙𑣉𑣗𑣁𑣓 𑣕𑣁𑣓𑣁. 𑢹𑣃𑣔𑣈 𑣜𑣈𑣁𑣄" 𑢹𑣉𑣉 𑢹𑣁𑣅𑣁𑣖 " 𑢷𑣙𑣜𑣉𑣕 𑢾𑣉𑣖𑣗𑣂𑣔𑣁𑣙𑣓 𑣜𑣈 𑢦𑢼𑢺𑢢𑢥𑢡 𑢩𑣓𑣃𑣏𑣙𑣈𑣔 𑣜𑣈 𑣞𑣁𑣖𑣂𑣚 𑣚𑣈 𑣚𑣁𑣋𑣂𑣑 𑣞𑣁𑣓𑣁𑣖 𑢧𑣑𑣂𑣝𑣁, 𑢮𑣁𑣙𑣜𑣌𑣉𑣓𑣑 𑣉𑣓𑣑𑣉𑣄 𑢸𑣉𑣏𑣂𑣖𑣗𑣉𑣊𑣋 𑣜𑣈𑣓 𑣙𑣉𑣉𑣌𑣉 𑢷𑣙𑣜𑣉𑣕 𑣞𑣉𑣜𑣌𑣁𑣜 𑣕𑣁𑣄𑣜𑣈𑣌𑣉 𑢽𑣃𑣘𑣁𑣜𑣂𑣞 𑣕𑣁𑣑𑣁 𑣖𑣈𑣓𑣔𑣉 𑣓𑣁𑣄 𑣎𑣉𑣊 𑣘𑣉𑣙𑣛𑣁 𑣘𑣉𑣙𑣛𑣉 𑣁𑣇𑣜𑣂 𑣓𑣁𑣖𑣉𑣁𑣄. 𑢳𑣁𑣄 𑣎𑣉𑢪 𑣙𑣉𑣉 𑣞𑣉𑣖𑣁𑣎 𑣜𑣈𑣓 𑣙𑣉𑣉𑣌𑣉 𑣙𑣁'𑣁𑣜 𑣌𑣁𑣌𑣉 𑣖𑣁𑣓𑣁𑣕𑣂𑣊'𑣈 𑣌𑣁𑣓𑣁 𑣁𑣌𑣉𑣁𑣄 𑣖𑣉𑣚𑣉𑣊 𑣔𑣁𑣄 𑣎𑣉𑣜𑣉 𑣌𑣁𑣓𑣕𑣈 𑣈𑣞𑣃 𑣌𑣃𑣜𑣃 𑣖𑣃𑣒𑣃 𑣌𑣈𑣓 𑣕𑣈𑣅𑣁 𑣘𑣈𑣄'𑣈 𑣖𑣃𑣞𑣂𑣊 𑣗𑣁𑣓𑣉 𑣖𑣃𑣞𑣂𑣊 𑣌𑣉 𑣓𑣁𑣖𑣈 𑣋𑣈𑣅𑣁 𑣉𑣓𑣑𑣉𑣄 𑣔𑣂𑣝𑣃𑣖 𑣔𑣉𑣜𑣗𑣁𑣜 𑣜𑣈𑣌𑣉 𑣃𑣔𑣃𑣗 𑣞𑣈𑣒𑣈𑣜 𑣏𑣂 𑣗𑣈𑣒𑣁𑣅𑣈'𑣈 𑣋𑣈𑣅𑣁𑣄.