𑢾𑢧 𑢡𑢼 𑢼𑢢𑢰𑢢𑢴𑢡𑢼

𑢾𑢧 𑢡𑢼 𑢼𑢢𑢰𑢢 𑢴𑢡𑢼-(𑢬𑣃𑣔𑣃𑣖) 𑢶𑣉𑣅𑣑 𑣖𑣃𑣓𑣑𑣁 𑣙𑣉 𑣆𑣖𑣂𑣓𑣈𑣄 𑣜𑣈𑣀𑣋𑣈𑣄 𑣎𑣓𑣁 𑣏𑣂 𑢨’ 𑣖𑣂𑣅𑣑 𑣞𑣇 𑣕𑣄𑣁𑣅 𑣕𑣈 𑣜𑣂𑣐𑣂𑣄 𑣁𑣋𑣃 𑣌𑣈𑣑𑣁.𑣆𑣖𑣂𑣓 𑣔𑣂𑣓 𑣙𑣉𑣗𑣁 𑣎𑣓 𑣜𑣈𑣅𑣉 𑣜𑣂𑣐𑣂 𑣌𑣁𑣈 𑣙𑣁𑣚 𑣔𑣛𑣂 𑣎𑣓𑣁. 𑢨𑣓 𑣕𑣈 𑣔𑣉 𑣈𑣓 𑣞𑣇 𑣖𑣃𑣞𑣂𑣍 𑣇𑣚𑣀 𑣔𑣉 𑣖𑣂𑣅𑣑 𑣞𑣈𑣘𑣆𑣂 𑣌𑣃𑣚 𑣌𑣂𑣔𑣁, 𑣈𑣓 𑣜𑣂𑣐𑣂 𑣁𑣋𑣃 𑣕𑣑 𑣙𑣉 𑣔𑣉𑣋 𑣁𑣛𑣁𑣘𑣁𑣜𑣉𑣖 𑣗𑣃𑣜𑣃 𑣕𑣈𑣄 𑣞𑣈𑣓𑣁 𑣌𑣓 𑣕𑣆 𑣌𑣈𑣓𑣁. 𑢹𑣉𑣓𑣕𑣈 𑣌𑣃𑣆 𑣉𑣁𑣄 𑣜𑣈𑣔𑣉 𑣕𑣆 𑣌𑣈𑣓𑣁, 𑣈𑣓 𑣞𑣈𑣘𑣆 𑣌𑣃𑣆 𑣙𑣉𑣓 𑣋𑣈𑣄 𑣌𑣃𑣚𑣂 𑣌𑣂𑣄𑣁, 𑣏𑣂 𑣁𑣘𑣃𑣖 𑣔𑣉 𑣉𑣌𑣉𑣓 𑣕𑣈𑣄 𑣞𑣈𑣓𑣁 𑣌𑣓𑣁? 𑢨𑣓 𑣕𑣈𑣔𑣉 𑣈𑣓 𑣌𑣃𑣆 𑣙𑣉𑣓 𑣖𑣈𑣓 𑣌𑣈𑣑𑣁 𑣏𑣂 𑣁𑣘𑣃𑣍 𑣔𑣉 𑣞𑣉𑣎𑣈 𑣔𑣁𑣜𑣃 𑣗𑣀𑣌𑣁 𑣕𑣂𑣄 𑣅𑣓𑣁. 𑢨𑣓 𑣕𑣈 𑣞𑣈𑣘𑣆 𑣌𑣃𑣚𑣂 𑣌𑣂𑣄𑣁 𑣏𑣂 𑣏𑣂𑣖𑣂𑣕𑣀 𑣁𑣘𑣃𑣖 𑣔𑣉𑣈 𑣙𑣃𑣎𑣃𑣄𑣁? 𑢨𑣓 𑣕𑣈 𑣔𑣉 𑣌𑣃𑣆 𑣙𑣉𑣓 𑣖𑣈𑣕𑣆 𑣕𑣓𑣁 𑣏𑣂,𑣙𑣃𑣎𑣃𑣄 𑣜𑣈𑣔𑣉 𑣌𑣄𑣈 𑣙𑣂𑣎𑣃𑣄𑣁 𑣁𑣔 𑣌𑣄𑣈 𑣙𑣃𑣎𑣃𑣄 𑣜𑣈𑣔𑣉𑣈 𑣙𑣂𑣎𑣃𑣄𑣁. 𑢳𑣈𑣅𑣁 𑣌𑣎𑣂 𑣞𑣈𑣘𑣆 𑣌𑣁𑣈 𑣞𑣉𑣖𑣎𑣁𑣉 𑣅𑣓𑣁, 𑣁𑣔 𑣉𑣁𑣄 𑣕𑣈𑣄 𑣜𑣃𑣁 𑣅𑣓𑣁 𑣉𑣁𑣄 𑣕𑣈𑣄 𑣙𑣂𑣎𑣂𑣄 𑣅𑣓 𑣏𑣂 𑣞𑣇 𑣌𑣈𑣄 𑣖𑣈𑣕𑣄𑣂𑣁 𑣏𑣂 𑣈𑣓 𑣙𑣉 𑣔𑣉 𑣉𑣁𑣄 𑣜𑣈 𑣌𑣄𑣈 𑣕𑣆𑣌𑣈𑣓𑣁 𑣁𑣅𑣄 𑣙𑣉𑣓 𑣕𑣈 𑣌𑣃𑣆 𑣓𑣈𑣌𑣄𑣈 𑣌𑣎𑣂 𑣌𑣃𑣚 𑣌𑣈𑣑𑣁. 𑢨𑣞𑣃 𑣇𑣛𑣂 𑣇𑣚𑣀 𑣕𑣅𑣉𑣖 𑣉𑣛𑣉𑣄 𑣋𑣈 𑣕𑣇 𑣌𑣉𑣅𑣑 𑣞𑣈𑣘𑣆𑣂 𑣌𑣃𑣚 𑣌𑣂𑣄𑣁 𑣞𑣈𑣘𑣆 𑣙𑣃𑣎𑣃𑣄 𑣚𑣈𑣓 𑣏𑣂 𑣌𑣃𑣆 𑣙𑣉𑣓𑣈𑣄 𑣌𑣃𑣚𑣂 𑣌𑣂𑣄𑣁 𑣏𑣂 𑣁𑣘𑣃𑣖 𑣌𑣉𑣕𑣈𑣄 𑣞𑣈𑣓𑣁 𑣌𑣓𑣁? 𑢬𑣃𑣆 𑣙𑣉𑣓 𑣖𑣈𑣓 𑣌𑣈𑣑𑣁 𑣏𑣂 𑣁𑣘𑣃𑣍 𑣔𑣉 𑣎𑣓𑣃𑣖 𑣗𑣌𑣆 𑣎𑣓𑣃𑣖 𑣕𑣈 𑣗𑣁𑣌𑣆𑣂𑣄 𑣞𑣈𑣓𑣁𑣌𑣓𑣁. 𑢳𑣈𑣅𑣁 𑣌𑣎𑣂 𑣁𑣅𑣃𑣖 𑣌𑣈𑣑 𑣏𑣂 𑣞𑣈𑣘𑣆 𑣜𑣈𑣐𑣁 𑣕𑣈𑣄 𑣞𑣈𑣓𑣉𑣄 𑣜𑣃𑣁𑣅𑣓𑣁 𑣉𑣛𑣉𑣄 𑣞𑣉𑣗𑣈𑣓 𑣌𑣎𑣂 𑣞𑣇 𑣕𑣁𑣄 𑣜𑣈𑣄 𑣇𑣔𑣃𑣗 𑣎𑣋𑣜 𑣌𑣈𑣑𑣁. 𑢩𑣛𑣉𑣄 𑣈𑣓 𑣌𑣁 𑣋𑣈 𑣖𑣉𑣅𑣑 𑣞𑣈𑣘𑣆 𑣙𑣃𑣎𑣃𑣄 𑣚𑣈𑣓𑣁, 𑣁𑣔 𑣌𑣃𑣚𑣃 𑣌𑣂𑣄𑣁 𑣏𑣂 𑢶’𑣄 𑣆𑣍𑣖-𑣁𑣘𑣃𑣖 𑣕𑣂𑣌𑣂𑣍 𑣌𑣉𑣕𑣈 𑣌𑣂𑣊 𑣞𑣈𑣓𑣁 𑣌𑣓𑣁? 𑢨𑣓 𑣕𑣈 𑣔𑣉 𑣈𑣓 𑣌𑣃𑣆 𑣙𑣉𑣓 𑣖𑣈𑣓 𑣌𑣈𑣑𑣁 𑣏𑣂 𑣆𑣍𑣈𑣍 𑣔𑣉 𑣖𑣉𑣅𑣉𑣑𑣈𑣄 𑣗𑣜𑣂𑣅𑣁 𑣁𑣋𑣃 𑣎𑣓𑣁 𑣁𑣔 𑣁𑣘𑣃𑣍 𑣔𑣉 𑣙𑣃𑣛𑣂𑣊𑣄 𑣞𑣀𑣋𑣂𑣕𑣈𑣄 𑣞𑣈𑣓𑣁 𑣌𑣓𑣁.𑣎𑣁𑣉 𑣋𑣈 𑣓𑣈𑣌𑣁 𑣋𑣈𑣄 𑣙𑣉𑣞𑣉𑣛𑣉𑣁 (𑣏𑣁𑣌𑣑𑣁) 𑣔𑣂𑣌𑣃 𑣞𑣈𑣘𑣆 𑣌𑣁𑣈 𑣞𑣉𑣖𑣎𑣁𑣉𑣅𑣓 𑣏𑣂 𑣜𑣃𑣁 𑣅𑣓𑣁. 𑢨𑣓 𑣌𑣁 𑣋𑣈 𑣉𑣛𑣉𑣄 𑣖𑣃𑣞𑣂𑣍 𑣞𑣈𑣘𑣆 𑣞𑣈𑣓 𑣚𑣈𑣓𑣁. 𑢩𑣛𑣉𑣄 𑣈𑣓 𑣌𑣃𑣆 𑣙𑣉𑣓 𑣋𑣈𑣄 𑣌𑣃𑣚𑣂 𑣌𑣂𑣄 𑣏𑣂 𑣆𑣍𑣖-𑣁𑣘𑣃𑣖 𑣕𑣂𑣌𑣂𑣊 𑣔𑣉 𑣌𑣉𑣕𑣈 𑣌𑣂𑣊 𑣞𑣈𑣓𑣁 𑣌𑣓𑣁? 𑣈𑣓 𑣕𑣈 𑣔𑣉 𑣌𑣃𑣆 𑣙𑣉𑣓 𑣖𑣈𑣓 𑣌𑣈𑣑𑣁 𑣏𑣂 𑣆𑣍𑣈𑣍 𑣔𑣉 𑣙𑣉𑣓𑣌 𑣉 𑣕𑣂𑣌𑣂 𑣋𑣉𑣈 𑣕𑣂𑣄𑣅𑣁 𑣁𑣔 𑣁𑣘𑣃𑣍 𑣔𑣉 𑣁𑣅𑣜 𑣕𑣅𑣉𑣖𑣈𑣓 𑣕𑣈. 𑢾𑣈𑣘𑣆 𑣈𑣞𑣃 𑣖𑣜𑣀 𑣒𑣃𑣒𑣌𑣁 𑣜𑣈𑣄 𑣒𑣉𑣄 𑣅𑣓𑣁 𑣁𑣔𑣉 𑣓𑣈𑣞𑣌𑣓(𑣓𑣂𑣖𑣂𑣕𑣀 )𑣙𑣉𑣀 𑢨 𑣜𑣃𑣁 𑣅𑣓𑣁, 𑣁𑣔 𑢨’ 𑣇𑣛𑣃𑣄 𑣆𑣔𑣂 𑣕𑣓𑣁 𑣏𑣂 𑣉𑣛𑣉𑣄 𑣋𑣈 𑣎𑣃𑣔𑣂𑣄 𑣌𑣃𑣚 𑣌𑣂𑣍 𑣜𑣈𑣔𑣉 𑣌𑣍 𑣙𑣃𑣎𑣃𑣄𑣁. 𑢳𑣂𑣆𑣅𑣄 𑣌𑣎𑣂 𑣌𑣉 𑣔𑣉 𑣌𑣁-𑣗𑣃𑣎𑣁𑣉𑣁. 𑢨𑣓𑣁 𑣕𑣈 𑣆𑣞𑣃 𑣔𑣂𑣓 𑣕𑣅𑣉𑣖 𑣕𑣈 𑣈𑣓 𑣞𑣈𑣘𑣆 𑣋𑣈 𑣉𑣛𑣉𑣄 𑣌𑣉 𑣌𑣃𑣚 𑣌𑣂𑣄𑣁. 𑢨𑣓 𑣕𑣈 𑣔𑣉𑣈 𑣖𑣈𑣓 𑣌𑣈𑣑𑣁 𑣏𑣂 𑣔𑣉𑣚𑣀 𑣋𑣉𑣖𑣌𑣈 𑣖𑣂𑣞𑣈𑣕𑣈𑣋𑣈 𑣚𑣀 𑣞𑣈𑣓 𑣁𑣋𑣃 𑣚𑣈𑣓𑣉𑣄𑣁. 𑢨𑣓𑣁𑣕𑣈 𑣕𑣅𑣉𑣖 𑣔𑣉 𑣖𑣂𑣞𑣈 𑣕𑣈𑣋𑣈 𑣌𑣂𑣊 𑣞𑣈𑣓𑣉𑣄 𑣅𑣓𑣁. 𑢵𑣈𑣗𑣄 𑣅𑣓 𑣏𑣂𑣌𑣂𑣊 𑣌𑣃𑣚𑣂 𑣎𑣑 𑣌𑣉𑣁 𑣏𑣂 𑣈𑣓 𑣉𑣁𑣄 𑣜𑣈𑣓 𑣙𑣉 𑣌𑣉𑣔𑣉 𑣉𑣌𑣉𑣕𑣈 𑣌𑣉 𑣞𑣈𑣓𑣁 𑣌𑣓𑣁? 𑢨𑣓 𑣌𑣎𑣂 𑣁𑣅𑣃𑣖 𑣌𑣈𑣑 𑣏𑣂 𑣌𑣃𑣆 𑣙𑣉𑣓 𑣉𑣁𑣄𑣅𑣕𑣈𑣄 𑣉𑣓𑣑𑣊 𑣚𑣈𑣓𑣁. 𑢨 𑣌𑣂𑣊 𑣌𑣃𑣚𑣂 𑣌𑣂𑣄𑣁 𑣏𑣂 𑣆𑣍𑣖-𑣁𑣘𑣃𑣖 𑣕𑣂𑣌𑣂𑣊 𑣉𑣌𑣉𑣕𑣈 𑣌𑣂𑣊 𑣞𑣈𑣓𑣁 𑣌𑣉𑣁? 𑢬𑣃𑣆 𑣙𑣉𑣓 𑣖𑣈𑣓 𑣌𑣈𑣑𑣁 𑣏𑣂 𑣆𑣍𑣈𑣍 𑣔𑣉 𑣜𑣄𑣁 𑣕𑣓 𑣙𑣞𑣃 𑣕𑣓 𑣌𑣉𑣁𑣄 𑣕𑣂𑣙 𑣏𑣘𑣃 𑣕𑣂𑣄𑣅𑣁.𑣉𑣛𑣉𑣄 𑣁𑣘𑣃𑣍 𑣔𑣉 𑣘𑣃𑣓𑣑𑣂𑣜𑣈 𑣙𑣈𑣓𑣔𑣈 𑣗𑣆𑣂𑣄 𑣞𑣈𑣓𑣁 𑣌𑣓𑣁. 𑢾𑣇 𑣉𑣛𑣉𑣄 𑣞𑣈𑣘𑣆 𑣗𑣜𑣁𑣓 𑣌𑣂𑣊 𑣌𑣌𑣂𑣊 𑣗𑣃𑣎𑣁𑣉 𑣅𑣓𑣁.𑣉𑣛𑣉𑣄 𑣌𑣂𑣊 𑣜𑣃𑣁 𑣅𑣓𑣁. 𑣓𑣁-𑣁𑣄 𑣔𑣉𑣞𑣇 𑣇𑣛𑣃𑣄 𑣕𑣓𑣁 𑣏𑣂 𑣏𑣂𑣚𑣂𑣌𑣁𑣕𑣈 𑣓𑣈 𑣜𑣂𑣐𑣂 𑣁𑣋𑣃 𑣜𑣃𑣁 𑣔𑣆𑣅𑣉𑣄 𑣄𑣁. 𑢨𑣓 𑣕𑣈 𑣉𑣛𑣉𑣄 𑣖𑣂𑣞𑣈 𑣞𑣇 𑣞𑣈𑣓𑣉𑣄 𑣅𑣀𑣁, 𑣉𑣛𑣉𑣄,𑣈 𑣌𑣃𑣚𑣂 𑣌𑣂𑣄-𑣅𑣁 𑣏𑣂 𑣆𑣍𑣖-𑣁𑣘𑣃𑣖 𑣕𑣂𑣌𑣂𑣊 𑣉𑣌𑣉𑣕𑣈 𑣌𑣂𑣊 𑣞𑣈𑣀𑣁 𑣌𑣓𑣁? 𑢨𑣓 𑣌𑣃𑣆 𑣙𑣉𑣓 𑣖𑣈𑣓 𑣌𑣈𑣑𑣁 𑣏𑣂 𑣆𑣍𑣈𑣍 𑣔𑣉 𑣉𑣁𑣄 𑣜𑣈𑣋𑣈 𑣖𑣈𑣓𑣁𑣂 𑣅𑣁 𑣉𑣛𑣉𑣄 𑣁𑣘𑣃𑣍 𑣔𑣉 𑣞𑣂𑣜𑣖𑣁 𑣔𑣂𑣞𑣃𑣖 𑣔𑣄 𑣌𑣈𑣞𑣈𑣑 𑣕𑣂𑣄 𑣅𑣓𑣁. 𑢨𑣓𑣈𑣒𑣈𑣄 𑣅𑣁𑣕𑣈 𑣕𑣃𑣓𑣑𑣃 𑣞𑣓𑣕𑣈 𑣓𑣈𑣌𑣓 𑣌𑣎𑣂 𑣁𑣅𑣃𑣖 𑣌𑣈𑣑 𑣏𑣂 𑣞𑣇 𑣎𑣂𑣆 𑣜𑣈𑣄 𑣇𑣛𑣃𑣄 𑣌𑣈𑣑𑣁 𑣏𑣂 𑣓𑣈𑣅𑣁 𑣌𑣎𑣂 𑣌𑣉𑣜𑣈 𑣏𑣂𑣌𑣓 𑣎𑣋𑣜 𑣇𑣌𑣃𑣁-𑣌𑣓𑣁! 𑢨𑣓 𑣕𑣈 𑣈𑣓 𑣌𑣃𑣆 𑣙𑣉𑣓𑣈𑣄 𑣖𑣈𑣕𑣆 𑣕𑣓𑣁 𑣏𑣂 𑣖𑣜 𑣓𑣈𑣅𑣁 𑣌𑣎𑣂 𑣌𑣉 𑣗𑣃𑣎𑣁𑣉 𑣕𑣍 𑣖𑣈 𑣉𑣛𑣉𑣄 𑣁𑣘𑣈𑣅𑣄 𑣞𑣉𑣗𑣈𑣓 𑣜𑣂𑣐𑣂 𑣌𑣉𑣍 𑣁𑣛𑣄𑣁-𑣘𑣈𑣅𑣁 𑣈𑣓 𑣌𑣎𑣂 𑣌𑣉 𑣁𑣅𑣃𑣖 𑣌𑣈𑣑 𑣏𑣂 𑣈𑣓 𑣌𑣃𑣆 𑣙𑣉𑣓 𑣈𑣞𑣃𑣂 𑣜𑣁𑣀𑣞𑣁 𑣅𑣓𑣁, 𑣉𑣛𑣉𑣄 𑢨’ 𑣖𑣈𑣓 𑣌𑣈𑣑𑣁 𑣏𑣂 𑣁𑣝𑣈 𑣞𑣇 𑣆𑣖𑣂𑣓-𑣆𑣖𑣂𑣓 𑣗𑣁𑣗𑣁-𑣒𑣌𑣁 𑣜𑣈𑣅𑣄 𑣜𑣂𑣐𑣂 𑣏𑣂 𑣓𑣈𑣀𑣅𑣁 𑣌𑣉𑣕𑣈 𑣙𑣚𑣉𑣄𑣁! 𑢾𑣇 𑣖𑣈𑣓 𑣌𑣈𑣑𑣁 𑣏𑣂 𑣌𑣁 𑣖𑣜𑣈𑣍 𑣗𑣋𑣈 𑣕𑣁𑣄 𑣎𑣃 𑣁𑣘𑣃𑣖 𑣌𑣈𑣅𑣁 𑣁𑣋𑣃𑣆 𑣖𑣈. 𑢡𑣘𑣃𑣕𑣈 𑣙𑣛𑣁𑣖 𑣉𑣁𑣄’𑣈 𑣔𑣚𑣉𑣗 𑣕𑣓 𑣕𑣆 𑣌𑣈𑣓𑣁 𑣈𑣓 𑣕𑣈 𑣙𑣁𑣛𑣖 𑣁𑣀𑣋𑣃𑣓 𑣎𑣓𑣁 𑣉𑣛𑣉 𑣄𑣈𑣓𑣁 𑣕𑣈 𑣁𑣘𑣃𑣕𑣈 𑣙𑣉𑣛𑣖 𑣞𑣇 𑣕𑣄 –𑣕𑣈𑣄 𑣙𑣂𑣎𑣃𑣄 𑣚𑣈𑣓𑣁. 𑢮𑣉𑣁𑣜-𑣎𑣋𑣜 𑣙𑣉𑣗𑣁 𑣅𑣓 𑣏𑣂 𑣞𑣇 𑣖𑣈𑣓 𑣌𑣈𑣑𑣁 𑣏𑣂 𑢶’ 𑣕𑣄 𑣕𑣈 𑣍 (𑣁𑣍) 𑣙𑣃𑣎𑣃𑣄-𑣞𑣈𑣓𑣉𑣄 𑣕𑣈𑣍 𑣚𑣋𑣁 𑣏𑣗𑣁 𑣅𑣓𑣁. 𑣖𑣃𑣞𑣂𑣍𑣉 𑣌𑣖 𑣓𑣖𑣉𑣄𑣁. 𑢨𑣓 𑣌𑣎𑣂 𑣌𑣉 𑣁𑣅𑣃𑣖 𑣌𑣈𑣑 𑣏𑣂 𑣙𑣁𑣛𑣖 𑣖𑣈𑣓 𑣌𑣈𑣑𑣁, 𑣙𑣈𑣚𑣁 𑣞𑣇 𑣍 𑣔𑣉 𑣏𑣂𑣖𑣂𑣕𑣀 𑢶’ 𑣙𑣃𑣎𑣃𑣄’𑣁 𑣌𑣓𑣁 𑣆𑣖𑣂𑣕𑣀 𑣋𑣈 𑣉𑣁𑣄 𑣜𑣈𑣋𑣜𑣍 𑣕𑣆𑣅𑣁 𑣌𑣓𑣁. 𑣉𑣛𑣉𑣄 𑣕𑣂𑣞𑣂𑣍𑣉 𑢶’𑣓𑣈𑣓 𑣕𑣄 𑣜𑣈𑣋𑣈𑣖 𑣓𑣖 𑣕𑣑𑣂𑣍𑣁 𑣓𑣁𑣄 𑣔𑣉 𑣙𑣉𑣓𑣂𑣍 𑣌𑣃𑣆 𑣚𑣉-𑣉𑣄 𑣗𑣈𑣓 𑣌𑣎𑣂 𑣞𑣂𑣑 𑣌𑣈𑣑𑣁 𑣏𑣂 𑣞𑣉𑣗𑣈𑣓 𑣜𑣂𑣐𑣂 𑣌𑣉𑣍 𑣗𑣋𑣈𑣅𑣁 𑣖𑣈𑣓𑣕𑣈, 𑣓𑣁𑣄 𑣔𑣉 𑣁𑣅𑣃𑣖 𑣚𑣈𑣖. 𑢨𑣓𑣈𑣒𑣈𑣄 𑣜𑣈 𑣉𑣌𑣉 𑣇𑣛𑣂 𑣖𑣉𑣅𑣑 𑣞𑣈𑣘𑣆 𑣍 𑣕𑣄-𑣈 𑣙𑣂𑣎𑣃𑣄 𑣚𑣈𑣓𑣁 𑣆𑣓𑣂𑣄 𑣙𑣉𑣓𑣂𑣍 𑣌𑣃𑣆 𑣖𑣈𑣕𑣆𑣂𑣅𑣁 𑣏𑣂 𑣁𑣘𑣂𑣃𑣍 𑣔𑣉 𑣞𑣉𑣎𑣈 𑣔𑣁𑣜𑣃 𑣗𑣀𑣌𑣁 𑣕𑣂𑣄𑣅𑣁 𑣉𑣛𑣉𑣄 𑣙𑣃𑣎𑣃𑣄 𑣜𑣈𑣔𑣉 𑣌𑣁𑣈 𑣙𑣂𑣎𑣃𑣄𑣁 𑣉𑣛𑣉𑣄-𑣌𑣁𑣈 𑣙𑣃𑣎𑣃𑣄 𑣜𑣈𑣔𑣉𑣈 𑣙𑣃𑣎𑣃𑣄𑣁 𑣖𑣈𑣓𑣕𑣈𑣄 𑣖𑣈𑣕𑣑 𑣖𑣁, 𑢭 𑣆𑣖𑣂𑣕𑣀 𑣋𑣁𑣛𑣁 𑣘𑣜𑣉𑣖 𑣕𑣈 𑣓𑣅𑣚 𑣖𑣄 –𑣁𑣍 𑣞𑣈𑣓𑣁 𑣌𑣓 𑣕𑣆 𑣌𑣈𑣓𑣁. 𑢳𑣅𑣚 𑣗𑣗𑣆 𑣔𑣉 𑣞𑣉-𑣎𑣈𑣁 𑣗𑣀𑣌𑣁 𑣉𑣛𑣉𑣄 𑣋𑣁𑣛𑣁 𑣘𑣈𑣜𑣈𑣄 𑣅𑣉𑣄 𑣜𑣈𑣔𑣉 𑣌𑣁 𑣙𑣃𑣎𑣃𑣄 𑣔𑣆𑣅𑣉𑣄𑣁,𑣉𑣛𑣉𑣄 𑣌𑣁 𑣙𑣃𑣎𑣃𑣄 𑣜𑣈𑣔𑣉 𑣙𑣂𑣎𑣃𑣄 𑣔𑣆𑣅𑣉𑣄𑣁, 𑣈𑣓𑣁 𑣌𑣎𑣂 𑣋𑣈 𑣙𑣉𑣓𑣂𑣍 𑣌𑣃𑣆 𑣌𑣎𑣂 𑣚𑣈𑣑𑣁. 𑢩𑣛𑣉𑣄 𑣖𑣂𑣞𑣁 𑣜𑣈 𑣔𑣉 𑣎𑣓𑣃𑣖 𑣌𑣉 𑣗𑣌𑣆 𑣕𑣂𑣄 𑣅𑣓𑣁, 𑣈𑣓 𑣇𑣛𑣂𑣜𑣈 𑣍 𑣎𑣓𑣃𑣖 𑣗𑣈𑣊𑣋𑣁 𑣔𑣁𑣜𑣃 𑣌𑣉 𑣎𑣓𑣃𑣖 𑣎𑣒𑣁 𑣕𑣈 𑣗𑣌𑣆𑣍 𑣗𑣆 𑣕𑣆-𑣌𑣈𑣓𑣁. 𑢨𑣓 𑣌𑣁 𑣋𑣈 𑣉𑣌 𑣇𑣚𑣀 𑣍(𑣁𑣍) 𑣕𑣃𑣚 𑣖𑣍 𑣘𑣂𑣕𑣂 𑣌𑣈𑣓𑣁 𑣈𑣓 𑣇𑣚𑣀 𑣙𑣉𑣓𑣂𑣍 𑣌𑣃𑣆 𑣖𑣈𑣕𑣑 𑣖𑣈𑣅𑣁 𑣏𑣂 𑣁𑣘𑣃𑣍 𑣔𑣉 𑣙𑣃𑣛𑣂𑣊𑣄 𑣞𑣀𑣋𑣂 𑣕𑣂𑣄 𑣅𑣓𑣁. 𑣈𑣓 𑣌𑣋𑣈 𑣉𑣛𑣉𑣄 𑣖𑣂𑣞𑣁 𑣕𑣖 𑣞𑣈𑣘𑣆 𑣙𑣂𑣎𑣃𑣄 𑣚𑣈𑣓𑣁 𑣁𑣜-𑢨 𑣖𑣈𑣕𑣁𑣂𑣅𑣁 𑣏𑣂 𑣆𑣍𑣈𑣍 𑣔𑣉 𑣙𑣉𑣓𑣌 𑣉 𑣕𑣂𑣌𑣂 𑣋𑣉𑣈 𑣕𑣂𑣄 𑣅𑣓𑣁, 𑣉𑣛𑣉𑣄𑣁𑣘𑣃𑣍 𑣔𑣉 𑣁𑣅𑣜-𑣕𑣅𑣉𑣖𑣈𑣓 𑣕𑣈,𑣈𑣓 𑣇𑣛𑣂𑣜𑣈 𑣈𑣊𑣋𑣁𑣕𑣈 𑣔𑣉 𑣜𑣁’𑣛𑣂 𑣑𑣁𑣚𑣂 𑣜𑣁𑣛𑣂 𑣎𑣒𑣁 𑣕𑣈𑣋𑣈𑣄 𑣇𑣕𑣃 𑣕𑣓 𑣕𑣆 𑣌𑣈𑣓𑣁. 𑢩𑣛𑣉𑣄 𑢭(𑣁𑣍 ) 𑣔𑣉𑣍 𑣎𑣂𑣜𑣃𑣗𑣁 𑣌𑣓 𑣕𑣆 𑣌𑣈𑣓𑣁. 𑢩𑣌𑣉 𑣇𑣛𑣂 𑣈𑣊𑣋𑣁 𑣕𑣈𑣔𑣉 𑣖𑣓𑣑𑣂𑣄 𑣏𑣘𑣃 𑣕𑣆 𑣌𑣈𑣓𑣁 𑣈𑣓 𑣇𑣛𑣂 𑣁𑣍 𑣓𑣂𑣌𑣃𑣚 𑣞𑣌𑣖𑣍 𑣉𑣚 𑣕𑣆 𑣌𑣈𑣓𑣁. 𑢩𑣛𑣉𑣄 𑣙𑣉𑣓𑣂𑣍 𑣌𑣃𑣆 𑣖𑣈 𑣌𑣈𑣑𑣁 𑣏𑣂 𑣆𑣍𑣈𑣍 𑣔𑣉𑣜 𑣄 𑣕𑣓-𑣙𑣞𑣃 𑣕𑣓 𑣌𑣉 𑣕𑣂𑣙 𑣏𑣘𑣃 𑣕𑣈𑣄 𑣞𑣈𑣓𑣉𑣄 𑣅𑣓𑣁. 𑣉𑣛𑣉𑣄 𑣁𑣘𑣃𑣍 𑣔𑣉 𑣘𑣃𑣓𑣑𑣂𑣅𑣄 𑣜𑣈 𑣙𑣉𑣓𑣔𑣈 𑣗𑣁𑣗𑣆 𑣕𑣈, 𑣈𑣓 𑣕𑣆 𑣌𑣈𑣓𑣁 𑣉𑣛𑣉𑣄 𑣙𑣉𑣓𑣂𑣍 𑣌𑣃𑣆 𑣖𑣈𑣓 𑣌𑣈𑣑𑣁 𑣏𑣂 𑣁𑣘𑣃𑣍 𑣔𑣉 𑣞𑣂𑣜𑣖𑣁 𑣔𑣂𑣞𑣃𑣖 𑣜𑣄 𑣔𑣄 𑣌𑣉𑣒𑣊 𑣕𑣈𑣄 𑣞𑣈𑣓𑣉𑣄 𑣞𑣓𑣁. 𑢨𑣓 𑣕𑣈𑣔𑣉 𑣈𑣓 𑣙𑣉-𑣁𑣄 𑣜𑣂𑣐𑣂 𑣌𑣉 𑣙𑣚 𑣅𑣓𑣁. 𑣁𑣜 𑣞𑣇 𑣉𑣁𑣄 𑣕𑣈𑣄 𑣜𑣃𑣄 𑣜𑣃𑣁 𑣅𑣓𑣁. 𑣉𑣛𑣉𑣄 𑣈𑣓 𑣜𑣈𑣊𑣋𑣈 𑣙𑣉 𑣈𑣞𑣃 𑣞𑣃𑣌𑣃 𑣕𑣈𑣄 𑣕𑣆 𑣅𑣓𑣁. 𑢷𑣘𑣃𑣆- 𑢩𑣕𑣉𑣚𑣚:-𑢹𑣂𑣜𑣚𑣁 𑢾𑣂𑣊𑣋𑣂𑣜𑣁𑣅 𑢷𑣁𑣓𑣜𑣁 𑢹𑣁𑣕𑣃:-𑢯𑣙𑣉𑣒𑣜𑣅 𑣘𑣃𑣜, 𑢬𑣂𑣍𑣎𑣂𑣜𑣂(𑢩𑣑𑣂𑣝𑣁)