𑢶𑢣𑢻 𑢯𑢢𑢵𑢢 𑣿

𑢶𑢣𑢻 𑢯𑢢𑢵𑢢 𑣿 ( The First and Sacred letter- The Mother Letter) 𑢹𑣅𑣖 𑣘𑣅𑣖 𑣎𑣘𑣁𑣋𑣜 𑣜𑣈𑣅𑣄 𑣙𑣂𑣑 𑣘𑣍𑣎𑣁 𑣚𑣈 𑣌𑣓 𑣘𑣙𑣁𑣖𑣉𑣄 𑣌𑣓𑣁 , 𑣓𑣈𑣓 𑣔𑣂𑣝𑣖 𑣕𑣁𑣚𑣁 𑣖𑣁𑣚𑣁 𑣙𑣅𑣖 𑣖𑣈𑣓𑣈𑣄 𑣜𑣈 𑣇𑣘𑣓 𑣅𑣓𑣁 𑣁𑣔𑣉 𑣈𑣓 𑣜𑣈𑣅𑣄 𑣉𑣕𑣖𑣉𑣓 𑣉𑣌𑣉𑣓𑣅 𑣕𑣈 𑣙𑣉𑣗𑣁 𑣚𑣈𑣓𑣁? 𑢬𑣉𑣎𑣜 𑣚𑣈 𑣌𑣓 𑣑𑣉𑣋𑣉𑣜𑣉𑣄 𑣕𑣓𑣁 𑣏𑣂 𑣙𑣅𑣖 𑣙𑣈𑣄 𑣅𑣌𑣁𑣓 𑣜𑣈𑣔𑣉 𑣙𑣉𑣛𑣖𑣉 𑣚𑣋𑣂𑣑 𑣕𑣈 𑣋𑣈 . 𑢯𑣈𑣓𑣄 𑣏𑣂 𑣓𑣈 𑣙𑣅𑣖 , 𑣝𑣃𑣖𑣀 𑣙𑣉𑣖𑣙𑣉 𑣓𑣀 𑣕𑣈 𑣘𑣃𑣜𑣄 𑣕𑣈 𑣔𑣉 𑣖𑣁𑣓𑣁𑣉𑣙 𑣞𑣉𑣔𑣉𑣜𑣂 𑣕𑣂𑣓𑣂𑣄 𑣜𑣈 𑣋𑣈 𑣞𑣈𑣒𑣈𑣜𑣁 𑣌𑣓𑣁. 𑢩𑣓𑣑𑣉𑣄 𑣉𑣕𑣖𑣉𑣓 𑣒𑣅𑣑 𑣗𑣃 𑣘𑣍𑣎𑣅 , 𑣈𑣓 𑣜𑣈𑣔𑣉 𑣔𑣉 𑣎𑣉𑣋𑣗 𑣓𑣈𑣅𑣄 𑣋𑣈-𑣓𑣈𑣓 𑣙𑣉𑣛𑣖𑣉 𑣖𑣃𑣁𑣙𑣅 𑣕𑣈. 𑢬𑣎𑣂 𑣜𑣈𑣅𑣄 𑣖𑣆𑣓 𑣓𑣉𑣁𑣙 𑣕𑣓𑣁 , 𑣎𑣉𑣖 𑣓𑣃𑣙 𑣜𑣈𑣅𑣄 𑣜𑣁𑣞𑣂𑣙 𑣕𑣈 𑣜𑣉𑣈 𑣅𑣓 𑣕𑣅𑣉𑣖 𑣏𑣂𑣚𑣂𑣌𑣁 𑣋𑣈 𑣞𑣅𑣑 𑣜𑣈 𑣖𑣂𑣞𑣁 𑣓𑣁 𑣈𑣓𑣁 𑣜𑣉𑣞𑣁 𑣜𑣃𑣃𑣘 𑣕𑣈 𑣘𑣉𑣁𑣙 𑣗𑣆𑣓𑣁 𑣁𑣜 𑣙𑣉𑣖𑣙𑣉 𑣕𑣉𑣚𑣉𑣄 𑣕𑣓𑣁 . 𑢨𑣓 𑣘𑣉𑣁𑣙 𑣜𑣉𑣞𑣁 𑣜𑣈𑣅𑣄 𑣜𑣆𑣝 𑣏𑣂𑣕𑣂 𑣌𑣉 𑣎𑣉𑣛𑣆𑣓 𑣕𑣈𑣅𑣄 𑣋𑣈 𑣝𑣛𑣂 𑣕𑣓𑣁 . 𑢨𑣓𑣁 𑣖𑣈𑣓 𑣕𑣈 𑣞𑣉𑣔𑣉𑣜𑣁𑣉𑣄 𑣕𑣓𑣁 𑣏𑣂 𑣏𑣂𑣚𑣂𑣌𑣁 𑣏𑣂𑣚𑣂𑣌𑣁 𑣋𑣈 𑣘𑣉𑣁𑣙 𑣙𑣉𑣖𑣙𑣉𑣈 𑣗𑣆 𑣕𑣂𑣅𑣜𑣈𑣅𑣁 𑣈𑣓𑣌𑣁 𑣈𑣓𑣌𑣁 𑣋𑣈 𑣝𑣛𑣂, 𑣗𑣌𑣁𑣀 𑣚𑣈𑣌𑣁 𑣕𑣈 𑣉𑣜𑣕𑣉 𑣜𑣃𑣃𑣘 𑣓𑣖-𑣓𑣖 𑣎𑣉𑣊 𑣙𑣅𑣖𑣈𑣄 𑣇𑣘𑣓𑣈𑣅𑣁 . 𑢨𑣓 𑣜𑣈𑣔𑣉 𑣓𑣉𑣁𑣙 𑣆𑣔𑣀 𑣞𑣂𑣔𑣀 𑣕𑣓𑣁 𑣏𑣂 𑣙𑣅𑣖 𑣕𑣈 𑣋𑣈 𑣙𑣉𑣖𑣙𑣉 𑣜𑣈 𑣔𑣉 𑣞𑣈𑣐𑣁 𑣔𑣉 𑣙𑣃𑣎𑣃 𑣅𑣓𑣁 . 𑢶𑣈𑣓𑣌𑣓 𑣉𑣜𑣕𑣉 𑣘𑣍𑣎𑣁 𑣅𑣓𑣁 𑣏𑣂 𑣙𑣅𑣖 𑣙𑣉𑣛𑣖𑣉 𑣜𑣈𑣅𑣄 𑣉𑣓𑣉𑣕𑣉𑣜 𑣜𑣃𑣃𑣘 , 𑣖𑣆𑣓 𑣕𑣈 𑣔𑣉 𑣎𑣂-𑣜𑣉𑣁𑣙'𑣄 𑣘𑣈𑣄 𑣋𑣈 𑣕𑣓 . 𑢨𑣓𑣁 𑣖𑣈𑣓𑣕𑣈 𑣞𑣅𑣑 𑣝𑣃𑣜 𑣝𑣛𑣂 𑣏𑣂 𑣙𑣗𑣈𑣔 𑣗𑣃𑣒𑣁 𑣔𑣉 𑣎𑣂-𑣜𑣉𑣁𑣙 𑣋𑣈 𑣙𑣉𑣗𑣁 𑣅𑣓𑣁 . 𑢶𑣈𑣓𑣌𑣓 𑣇𑣘𑣓- 𑣎𑣘𑣓 𑣌𑣖𑣂 𑣎𑣂-𑣜𑣉𑣁𑣙𑣅 𑣕𑣈 𑣋𑣈 𑣙𑣉𑣗𑣓 𑣕𑣓𑣁 . 𑢶𑣈𑣓 𑣚𑣈𑣌𑣁 𑣕𑣈 𑣙𑣉𑣛𑣖𑣉 𑣗𑣓𑣆 𑣏𑣂 𑣙𑣗𑣈𑣔 𑣏𑣂 𑣞𑣅𑣑 𑣝𑣃𑣜 𑣝𑣛𑣂 𑣜𑣈𑣅𑣄 𑣉𑣜𑣕𑣉 𑣔𑣉 𑣕𑣓𑣁 𑣎𑣂-𑣜𑣉𑣁𑣙'𑣄 𑣖𑣓𑣁𑣜𑣀 𑣁𑣜 𑣖𑣖𑣁𑣜𑣀 𑣋𑣈 . 𑢳𑣁𑣄 𑣔𑣉 𑣚𑣂𑣘𑣂 𑣝𑣂𑣜𑣎𑣓 𑣜𑣈 𑣙𑣉𑣀 𑣘𑣉𑣜𑣖𑣁𑣓 𑣅𑣓𑣁 𑣏𑣂 𑣓𑣈𑣓 𑣜𑣈𑣅𑣄 𑣕𑣂𑣓𑣂 𑣌𑣉 𑣔𑣉 𑣎𑣃𑣛𑣃𑣜 𑣋𑣈 𑣎𑣂-𑣜𑣉𑣁𑣙𑣅 𑣕𑣈 𑣋𑣈 𑣈𑣙𑣅𑣉𑣗𑣁 𑣌𑣓𑣁 . 𑢽𑣂𑣜𑣎𑣓 𑣎𑣘𑣁𑣋𑣜 𑣉𑣓𑣉𑣕𑣊 𑣌𑣉𑣜𑣈 𑣎𑣃𑣔𑣂 𑣔𑣉𑣜𑣖 𑣔𑣉𑣞𑣕𑣃𑣜 𑣗𑣃𑣓 𑣆𑣏𑣄 𑣘𑣂𑣏𑣄 𑣚𑣈𑣌𑣙𑣁 , 𑢽𑣁𑣞𑣕𑣉𑣜 𑣕𑣈 𑣜𑣈 𑣙𑣉𑣀 𑣖𑣁𑣊 𑣔𑣉 𑣓𑣈𑣚𑣈𑣌𑣁 𑣋𑣈 𑣁𑣏𑣃𑣜𑣈𑣓𑣁 𑣏𑣂 𑣇𑣘𑣓 𑣈𑣓𑣈𑣒𑣈𑣄 𑣜𑣈 𑣔𑣉 𑢵 𑣋𑣉𑣒𑣁 𑣓𑣃𑣗𑣄 𑣕𑣇 𑣌𑣈𑣓𑣁 . 𑢴𑣄 𑣔𑣉𑣜𑣈𑣅𑣁 𑣎𑣚𑣁 𑣎𑣀𑣌𑣜 𑣕𑣈 𑣙𑣗𑣁𑣜𑣊 𑣔𑣁𑣛𑣈 𑣝𑣗𑣔 𑣚𑣈𑣌𑣁 𑣕𑣈 𑣋𑣈 𑣉𑣕𑣈 𑣔𑣂𑣝𑣖𑣈𑣄 𑣁𑣜𑣞𑣚 𑣖𑣜𑣞𑣚 𑣌𑣈𑣑𑣁 𑣉𑣓𑣑𑣉𑣄 𑣈𑣓𑣁 𑣖𑣈𑣓𑣕𑣈 𑣎𑣃𑣔𑣂 𑣙𑣗𑣁𑣜𑣊 𑣜𑣈𑣅𑣄 𑣗𑣃 𑣁𑣏𑣁𑣜 𑣗𑣂𑣏𑣁𑣜 𑣚𑣈𑣈 , 𑣔𑣉 𑣝𑣂𑣜𑣎𑣉𑣓 𑣓𑣂𑣄 , 𑣎𑣂-𑣜𑣉𑣁𑣙 𑣁𑣔𑣉 𑣕𑣃𑣓𑣑𑣃 𑣜𑣈 𑣜𑣉𑣁𑣙 𑣜𑣃𑣖𑣘𑣁 𑣙𑣗𑣈𑣔 𑣉𑣜𑣕𑣉 𑣙𑣉𑣜 𑣕𑣈 𑣞𑣅𑣑 𑣝𑣛𑣂 𑣏𑣂 𑣝𑣃𑣜 𑣋𑣈 𑣗𑣃 𑣏𑣁𑣘𑣃 𑣗𑣈𑣒𑣁 𑣅𑣁 . 𑢳𑣈𑣌𑣁 𑣓𑣈𑣚𑣈𑣌𑣁 𑣕𑣈 𑣞𑣂𑣐𑣂 𑣓𑣖𑣈 𑣅𑣓𑣁 𑣏𑣂 𑣙𑣗𑣈𑣔 𑣏𑣂 𑣝𑣅𑣑 𑣝𑣃𑣜 𑣝𑣛𑣂 𑣖𑣂𑣅𑣑 𑣈𑣞𑣌𑣜 𑣋𑣈𑣅𑣁 𑣉𑣓𑣑𑣉𑣄 𑣈𑣓 𑣙𑣗𑣈𑣔 𑣝𑣗𑣔 𑣏𑣂 𑣝𑣅𑣑 𑣝𑣃𑣜 𑣝𑣛𑣂 𑣋𑣈 𑣝𑣂𑣜𑣎𑣓 𑣔𑣁𑣛𑣈 𑣔𑣉 . 𑢨𑣓 𑣜𑣈𑣔𑣉 𑣈𑣓𑣁 𑣕𑣉𑣜𑣀 𑣉𑣌𑣉𑣓 𑣝𑣛𑣂 𑣁𑣜 𑣏𑣃𑣆𑣚𑣁 , 𑣏𑣂𑣖𑣂𑣕𑣀 , 𑣏𑣂𑣚𑣂𑣌𑣁 𑣕𑣈 𑣁𑣔𑣉 𑣉𑣌𑣉𑣓𑣅 𑣕𑣈 𑣉𑣚𑣚 𑣅𑣓𑣁 ? 𑢳𑣁𑣄 𑣔𑣉 𑣗𑣃 𑣓𑣖 𑣗𑣊𑣋𑣁 𑣚𑣈 𑣋𑣈- 𑣉𑣌𑣉 𑣚𑣈𑣌𑣓 𑣞𑣅𑣑 𑣜𑣄 𑣗𑣈𑣔𑣁 𑣕𑣉𑣜𑣀 𑣉𑣌𑣉𑣓𑣁 𑣙𑣗𑣈𑣔 𑣎𑣉𑣊 𑣜𑣉𑣁𑣙 𑣘𑣈𑣄 𑣓𑣖 𑣔𑣆𑣅𑣁 𑣉𑣓𑣑𑣉𑣄 𑣝𑣛𑣂 𑣎𑣉𑣊 𑣋𑣈 𑣝𑣂𑣜𑣎𑣉𑣓𑣁 ? 𑢾𑣅𑣑 𑣙𑣉𑣓𑣙𑣉 𑣗𑣂𑣕𑣜 𑣜𑣈𑣅𑣄 𑣙𑣉𑣅𑣉 , 𑣝𑣃𑣜 𑣞𑣅𑣌𑣁𑣕 𑣘𑣃𑣍𑣎𑣂 𑣘𑣉𑣁𑣙𑣓 𑣓𑣃𑣖𑣃 𑣕𑣈 𑣋𑣈 𑣖𑣃𑣒𑣁 𑣙𑣉𑣜𑣁 𑣝𑣃𑣄 𑣗𑣉𑣚𑣉𑣓 𑣕𑣓𑣁 𑣉𑣓𑣑𑣉𑣄 𑣙𑣉𑣖𑣙𑣉 𑣜𑣈 𑣎𑣂𑣗𑣉𑣓 𑣁𑣔𑣉 𑣞𑣈𑣐𑣁𑣈 𑣔𑣁𑣜𑣁 𑣅𑣑 𑣕𑣓𑣁 . 𑢨𑣓 𑣜𑣈𑣔𑣉 𑣎𑣂-𑣜𑣉𑣁𑣙 𑣎𑣉𑣊 𑣞𑣅𑣑 𑣝𑣂𑣜𑣎𑣓 𑣖𑣃𑣓𑣑𑣂 𑣜𑣈 𑣏𑣂𑣚𑣂𑣌𑣁 𑣕𑣈 𑣁𑣜 𑣏𑣂𑣖𑣂𑣕𑣁 𑣞𑣁𑣜𑣃𑣗 𑣚𑣈𑣓𑣁 ? 𑢾𑣃𑣕𑣂 𑣞𑣃𑣕𑣀 𑣅𑣓𑣁 , 𑣌𑣃𑣚𑣋𑣂𑣅𑣁 𑣎𑣃𑣓𑣃𑣛𑣂 𑣜𑣈 𑣁𑣘𑣃𑣆 𑣕𑣈 𑣘𑣃𑣜𑣜 𑣈𑣊𑣋𑣁'𑣄 𑣉𑣜𑣜𑣉𑣅𑣊 𑣜𑣈 𑣖𑣂𑣞𑣁 𑣅𑣓𑣁 𑣉𑣛𑣉𑣄 𑣗𑣙𑣁 𑣋𑣂𑣕𑣂𑣚 𑣜𑣈 𑣞𑣜𑣃𑣗 𑣅𑣓 𑣙𑣉𑣖𑣉𑣙𑣉𑣈 𑣗𑣆 𑣌𑣈𑣑𑣁 . 𑢡𑣜 𑣎𑣉𑣓𑣉𑣖 𑣉𑣛𑣊 𑣙𑣗𑣁𑣜𑣊 𑣔𑣁𑣛𑣈 𑣝𑣛𑣂 𑣁𑣏𑣃𑣜 𑣅𑣓𑣁 . 𑢯𑣂𑣚𑣂𑣌𑣁 𑣞𑣂𑣒𑣂𑣅𑣁'𑣄 𑣖𑣁𑣊 𑣜𑣁𑣄 𑣝𑣛𑣂- 𑢩𑣿--- 𑢩𑣿--- . 𑢳𑣈𑣚𑣈𑣌𑣁 𑣕𑣈 𑣘𑣉𑣖𑣁𑣓 𑣞𑣉𑣕𑣉𑣅 𑣎𑣓𑣁 𑣏𑣂 𑣙𑣗𑣁𑣜𑣊 𑣔𑣁𑣛𑣈'𑣄 𑣝𑣗𑣔 𑣈𑣓𑣁 𑣋𑣈 𑣖𑣃𑣛 𑣔𑣛𑣂𑣅𑣉𑣄 𑣁𑣄 𑣉𑣌𑣉𑣓𑣁 𑣝𑣂𑣜𑣎𑣓 𑣈𑣒𑣈𑣄 𑣜𑣈 𑣞𑣓𑣁𑣖 𑣎𑣂𑣇 𑣌𑣉𑣅 𑣕𑣈 𑣞𑣃𑣛𑣃𑣊𑣈𑣓𑣁 . 𑢩𑣛𑣉𑣄 𑣈𑣓𑣁 𑣜𑣈𑣅𑣄 𑣜𑣃𑣃𑣘 𑣔𑣉 𑣓𑣈𑣚𑣈𑣌𑣁 (𑣿) 𑣉𑣓𑣑𑣉𑣄 𑣞𑣃𑣛𑣃𑣊 𑣔𑣉 "𑣉𑣿" , 𑣖𑣆𑣓 𑣕𑣈 𑣔𑣉 𑣞𑣓𑣁𑣖 𑣔𑣉𑣜𑣉𑣖 𑣞𑣉𑣖𑣓 (𑣙𑣗𑣊𑣋𑣁 𑣗𑣃𑣜𑣃, 𑣔𑣉𑣜𑣉𑣖 𑣔𑣉𑣞𑣕𑣃𑣜) 𑣎𑣉𑣊 𑣈𑣒𑣈𑣄 𑣖𑣃𑣛 𑣞𑣃𑣛𑣃𑣊 𑣖𑣈𑣓 𑣚𑣈𑣌𑣁 𑣕𑣈 𑣖𑣃𑣃𑣛 𑣈𑣊𑣋𑣁 𑣏𑣂𑣕𑣂 𑣕𑣓𑣁 . 𑢡𑣅𑣁 𑣘𑣁 𑣜𑣈 𑣉𑣛𑣉𑣄 𑣋𑣈 𑣏𑣂𑣓𑣅 𑣋𑣜𑣎 𑣕𑣁𑣗𑣃𑣓𑣁 . 𑢯𑣂𑣖𑣂𑣕𑣀 𑣞𑣅𑣑 𑣝𑣃𑣜 𑣝𑣛𑣂 𑣏𑣂 𑣙𑣗𑣈𑣔𑣈𑣄 𑣝𑣂𑣜𑣎𑣉𑣓𑣁 , 𑣆𑣖𑣂𑣕𑣀 𑣗𑣜𑣎𑣉𑣄𑣈 𑣌𑣖𑣂𑣙 𑣅𑣁 . 𑢶𑣂𑣅𑣑 𑣔𑣉 𑣎𑣂𑣓𑣙𑣂𑣑 𑣁𑣔𑣉 𑣈𑣒𑣄 𑣔𑣉 𑣙𑣉𑣖𑣙𑣉 𑣗𑣓𑣆. 𑢨𑣓𑣁 𑣚𑣆 𑣘𑣉𑣜𑣖𑣁𑣓 𑣘𑣃𑣅𑣃𑣜 𑣋𑣈𑣅𑣁 𑣏𑣂 𑣙𑣗𑣁𑣜𑣊 𑣏𑣂𑣕𑣂 𑣎𑣃𑣛𑣃𑣜 𑣔𑣂𑣅𑣁 𑣗𑣁𑣜𑣁 - 𑢦𑣘𑣓 𑢷𑣉𑣜𑣊 𑣉𑣓𑣑𑣉𑣄 𑢷𑣈𑣊𑣓 𑢷𑣉𑣜𑣊 𑣜𑣈 𑣙𑣒𑣂𑣊𑣈𑣓𑣁. 𑢬𑣎𑣂 𑣌𑣈𑣓𑣈𑣒𑣈𑣄 𑣔𑣉 𑣓𑣈𑣅𑣁 𑣕𑣓𑣁 𑣏𑣂 𑣎𑣓𑣖𑣈 𑣕𑣈 𑣌𑣁𑣎𑣂 𑣈𑣒𑣈𑣄 𑣎𑣉𑣊 𑣆𑣘𑣓 𑣗𑣉𑣜𑣊 𑣉𑣓𑣑𑣉𑣄 𑣌𑣁𑣎𑣂 𑣆𑣓𑣂𑣕𑣃𑣆 𑣕𑣈 𑣞𑣓𑣁𑣋𑣖 𑣘𑣉𑣌𑣕𑣁 𑣎𑣉𑣊 𑣗𑣈𑣊𑣓 𑣗𑣉𑣜𑣊 𑣞𑣃𑣛𑣃𑣊 𑣜𑣈𑣅𑣄 𑣖𑣆𑣓 𑣝𑣂𑣈𑣎𑣉𑣓𑣅 𑣕𑣈 𑣙𑣉𑣗𑣁𑣓𑣁 . 𑢯𑣁𑣘𑣃 𑣕𑣃𑣓𑣑𑣃 𑣜𑣈𑣗𑣃 𑣏𑣂𑣘𑣁 𑣕𑣄 𑣏𑣂 𑣙𑣉𑣛𑣖𑣉 𑣜𑣈𑣅𑣄 𑣖𑣃𑣙𑣅 𑣕𑣈 𑣎𑣃𑣔𑣂 𑣝𑣛𑣂, 𑣌𑣁𑣎𑣂 𑣏𑣂 𑣙𑣅𑣖 𑣘𑣅𑣖𑣉𑣄 𑣕𑣓𑣁 𑣈𑣓 𑣜𑣈𑣔𑣉 𑣁𑣒𑣁𑣌𑣁𑣜𑣈𑣅𑣓𑣁 𑣏𑣂 𑣎𑣃𑣛𑣃𑣜 𑣓𑣈𑣅𑣁 𑣜𑣉𑣁𑣙𑣅 𑣕𑣈𑣋𑣈 𑣇𑣘𑣁𑣓𑣈𑣓 𑣕𑣓𑣁 . 𑢩𑣌𑣉𑣓𑣁 𑣏𑣂 𑣝𑣃𑣜 𑣜𑣈 𑣝𑣃𑣕𑣀 𑣕𑣓𑣁 . 𑢨𑣓𑣁 𑣖𑣈𑣓 𑣕𑣈 𑣋𑣈 𑣓𑣈𑣅𑣁 𑣙𑣅𑣖 𑣘𑣅𑣖 𑣚𑣂𑣘𑣂 𑣌𑣉 𑣜𑣈𑣅𑣄 𑣖𑣃𑣛 𑣙𑣉𑣗𑣁 𑣌𑣓 𑣚𑣈𑣌𑣁 𑣕𑣈 𑣖𑣁𑣊 𑣏𑣂𑣕𑣂 , 𑣖𑣃𑣛 𑣏𑣂𑣕𑣂 , 𑣗𑣃𑣒𑣁 𑣏𑣂𑣕𑣂 𑣏𑣂 𑣈𑣊𑣋𑣁 𑣏𑣂𑣕𑣂 𑣕𑣓𑣁 . 𑢾𑣃𑣛𑣃𑣊 𑣔𑣉 "𑣉𑣿" 𑣋𑣈 . 𑢩𑣓𑣑𑣉𑣄 𑣈𑣓 𑣚𑣈𑣌𑣁 𑣎𑣃𑣔𑣂 𑣓𑣈𑣓 "𑢹𑢷𑢡𑢼𑢪 𑢯𑢢𑢵𑢢" 𑣜𑣉𑣁𑣙 𑣞𑣅𑣌𑣁𑣕 𑣉𑣖𑣉𑣓 𑣋𑣈 𑣕𑣓𑣁 𑣈𑣓 𑣜𑣈𑣔𑣉 𑣞𑣁𑣜𑣂 𑣕𑣈 𑣋𑣈 𑢾𑣂𑣍 𑢹𑣗𑣊𑣋𑣁'𑣄 𑣇𑣀𑣔𑣃𑣗 𑣗𑣆𑣔𑣂 𑣚𑣂𑣘𑣂 𑣁𑣔𑣉 "𑣙𑣗𑣊𑣋𑣁 𑣗𑣂𑣕𑣕𑣂-𑣏𑣂𑣕𑣂 𑣏𑣂 𑢶𑣜𑣀 𑢯𑣂𑣕𑣂-𑢶𑣜𑣀 𑢷𑣂𑣕𑣂" 𑣋𑣈 𑣕𑣁𑣗𑣃𑣓𑣁 . 𑢶𑣃𑣇𑣛 𑢩𑣕𑣉𑣚𑣚 : 𑢵 𑢫𑣃𑣜𑣃 𑢺𑣌𑣉 𑢷𑣉𑣔𑣜𑣁. 𑢶𑢣𑢻 𑢯𑢢𑢵𑢢 𑣿 𑢩𑣓𑣉𑣕𑣉𑣊 (Page) : 𑣢𑣥 𑢩𑣚𑣚 𑣜𑣃𑣁 : 𑢾𑣂𑣗𑣓𑣁𑣕𑣙 𑢹𑣁𑣞𑣔𑣁 𑢷𑣙𑣃𑣗𑣉𑣓𑣈𑣞𑣟𑣉𑣜