𑢹𑢩𑢺𑢢𑢬𑢡

𑢹𑣉𑣚𑣂𑣌𑣁 𑣖𑣈𑣓𑣕𑣈 𑣖𑣂𑣑𑣉𑣙 𑣌𑣃𑣆 𑣙𑣉𑣓 𑣕𑣆 𑣌𑣈𑣓𑣁 . 𑢦𑣓𑣂𑣄𑣔𑣉 𑣖𑣂𑣅𑣑 𑣔𑣉𑣚𑣂𑣕 𑣙𑣃𑣔𑣁 𑣜𑣈𑣓𑣂𑣄 𑣕𑣆 𑣌𑣈𑣓𑣁. 𑢦𑣓𑣂𑣄 𑣖𑣃𑣞𑣂𑣊 𑣔𑣂𑣚𑣀 𑣔𑣀𑣐𑣓 𑢨' 𑣞𑣈𑣓 𑣚𑣈𑣓 𑣕𑣆 𑣌𑣈𑣓𑣁 𑣞𑣈𑣓 𑣞𑣈𑣓 𑣕𑣈 𑣈𑣒𑣄 𑣒𑣅𑣑 𑢨' 𑣞𑣈𑣓 𑣘𑣜𑣉𑣖 𑣎𑣓𑣁, 𑣈𑣓𑣁𑣔𑣉 𑣈𑣒𑣄 𑣌𑣉𑣁𑣄 𑣙𑣕𑣃 𑣒𑣅𑣑 𑣕𑣆 𑣌𑣈𑣓𑣁, 𑢨𑣓𑣕𑣈 𑣆𑣓𑣂𑣄 𑣓𑣃𑣗𑣄 𑣅𑣁𑣓𑣁'𑣈. 𑢳𑣃𑣗𑣄𑣅𑣁𑣓 𑣏𑣓𑣁𑣗𑣔𑣉 𑣆𑣓𑣂𑣄 𑣖𑣜𑣀 𑣎𑣕𑣂 𑣙𑣉 𑣌𑣉 𑣞𑣁𑣗 𑣜𑣂𑣌𑣁 𑣌𑣂𑣄'𑣁𑣙, 𑢵𑣅𑣉𑣖 𑣈𑣝𑣃 𑣘𑣃𑣜𑣈𑣅 𑣓𑣂𑣔𑣁 𑣎𑣓𑣁. 𑢳𑣂𑣔𑣁 𑢨'𑣚𑣉𑣄𑣕𑣈 𑣈𑣝𑣃 𑣚𑣈𑣌𑣁𑣓 𑣗𑣛𑣂𑣄 𑣌𑣖𑣂𑣌𑣉 𑣘𑣆𑣒𑣂 𑣌𑣈𑣑𑣁 𑣏𑣂 𑣆𑣓𑣂𑣄𑣌𑣉 𑣙𑣜𑣝𑣃 𑣋𑣓𑣑𑣃𑣄 𑣚𑣈𑣌𑣁𑣌𑣉 𑣜𑣂𑣌𑣁 𑣌𑣂𑣄'𑣁𑣙. 𑢩𑣛𑣉𑣄 𑣞𑣁𑣗𑣉𑣄 𑣗𑣉𑣜𑣉𑣕𑣈 𑣆𑣓𑣂𑣄𑣌𑣉 𑣚𑣂𑣖𑣗𑣃𑣑 𑢫'𑣌𑣂𑣄'𑣁𑣙. 𑢵𑣅𑣉𑣖 𑣞𑣈𑣊𑣈𑣚 𑣕𑣈𑣌𑣉 𑣇𑣜𑣃𑣗 𑣌𑣂𑣄'𑣁𑣙, 𑢮𑣃𑣚 𑣞𑣈𑣊𑣋𑣈𑣚 𑣓𑣈𑣚𑣕𑣈 𑣜𑣁𑣀𑣞𑣁 𑣕𑣈𑣌𑣉 𑣞𑣃𑣝𑣃𑣓 𑣎𑣓𑣁. 𑢾𑣈𑣊𑣋𑣈𑣚 𑣉𑣗 𑣎𑣓 𑣏𑣂 𑣗𑣓𑣉 𑣕𑣉𑣜𑣉𑣈 𑣕𑣈𑣌𑣉 𑣉𑣘𑣉𑣎𑣉𑣅 𑣎𑣓𑣁. 𑢨𑣓 𑣉𑣕𑣉𑣊 𑣋𑣈 𑣓𑣁'𑣁𑣄 𑣎𑣃𑣇𑣋 𑣎𑣉𑣜𑣉𑣊 𑣎𑣉𑣜𑣉𑣊 𑣜𑣞𑣂𑣌𑣁𑣕𑣈 𑢹𑣉𑣚𑣂 (𑢴𑣂𑣌𑣃 𑢹𑣉𑣚𑣂) 𑣌𑣉 𑣖𑣓𑣁𑣕𑣂𑣀 𑣅𑣓𑣁. 𑢨𑣓 𑣙𑣂𑣞𑣁𑣗𑣕𑣈 𑣁𑣗𑣃 𑣌𑣉𑣔𑣉 𑣖𑣈𑣓𑣈 𑣚𑣈𑣌𑣁 '𑢷𑣉𑣙𑣃𑣎𑣉𑣓' 𑣞𑣉𑣖𑣁𑣎 𑣔𑣉 𑣌𑣗𑣃 𑣖𑣓𑣁𑣕𑣂𑣀 𑣕𑣈𑣅𑣁𑣄 𑣌𑣎𑣂. 𑢯𑣂𑣅𑣁𑣄 𑣏𑣂 𑣈𑣒𑣄 𑣌𑣉𑣔𑣉 𑣁𑣗𑣃𑣁𑣄 𑣔𑣃𑣌𑣃 𑣏𑣂 𑣕𑣌𑣚𑣂𑣗 𑣓𑣈𑣚 𑣜𑣈 𑣜𑣁𑣀𑣞𑣁𑣌𑣉 𑣁𑣔𑣁𑣅𑣁. 𑢨𑣓 𑣚𑣈𑣌𑣁 ' 𑢹𑣉𑣚𑣂 ' 𑣖𑣆'𑣅𑣄 𑣔𑣃𑣌𑣃 𑣏𑣂 𑣎𑣃𑣚 𑣞𑣈𑣊𑣋𑣈𑣚 𑣓𑣈𑣚 𑣕𑣈𑣌𑣉 𑣜𑣁𑣀𑣞𑣁 𑣌𑣈𑣓𑣁. 𑢨𑣓𑣁 𑣖𑣈𑣓𑣕𑣈 𑣁𑣗𑣃 '𑢹𑣉𑣜𑣂𑣎𑣉𑣓' 𑣞𑣉𑣖𑣁𑣎 𑣌𑣉𑣁𑣄 𑣙𑣉𑣚𑣂 𑣔𑣉 𑣌𑣗𑣃 𑣖𑣁𑣓𑣁𑣕𑣂𑣊 𑣜𑣈𑣅𑣁𑣄 𑣌𑣎𑣂 . 𑢯𑣂𑣅𑣁𑣄 𑣏𑣂 𑢹𑣉𑣚𑣂 𑣔𑣉 𑣁𑣗𑣃𑣁'𑣁𑣙 𑣘𑣉𑣜𑣉𑣗 𑣔𑣉 𑣌𑣁𑣙 𑣕𑣓𑣁 . 𑢩𑣛𑣉𑣄 𑣁𑣌𑣉𑣁𑣄 𑣜𑣁𑣀𑣞𑣁𑣜𑣈 𑣁𑣗𑣃 𑣖𑣓𑣌𑣉 𑣏𑣂𑣖𑣂𑣓 𑣏𑣂𑣖𑣂𑣓 𑣘𑣉𑣅𑣞𑣁 𑣒𑣌𑣁𑣗𑣃 𑣌𑣜𑣏𑣁 𑣋𑣉𑣎𑣈𑣓 𑣕𑣓𑣁. 𑢳𑣈𑣓 𑣌𑣎𑣂𑣌𑣉𑣗𑣃 𑣇𑣛𑣃𑣄 𑣗𑣈𑣒𑣁𑣅𑣁. 𑢡𑣚𑣂𑣊 𑣌𑣎𑣂 𑣎𑣋𑣁𑣜𑣌𑣉 𑣚𑣁𑣄 𑣌𑣈𑣑 𑣜𑣈𑣔𑣉 𑣆𑣌𑣁 𑣕𑣚𑣂𑣊𑣘𑣈. 𑢹𑣂𑣅𑣁𑣕𑣂𑣊 𑣖𑣈 𑣏𑣌𑣁𑣕𑣂𑣊 𑣖𑣈 𑣎𑣉𑣗𑣉𑣜 𑣎𑣃𑣚𑣃𑣊 𑢺𑣋𑣁𑣕𑣂𑣊 𑣖𑣈 𑣋𑣈𑣎𑣈𑣜𑣁 𑣞𑣀𑣑𑣂 𑣗𑣚𑣁𑣕𑣂𑣊 𑣖𑣈 𑢮𑣂𑣕𑣌𑣁𑣜𑣉𑣄 𑣁𑣖 𑣖𑣃𑣞𑣂𑣀 𑣔𑣂𑣓 𑢶 𑣞𑣃𑣖𑣁𑣀. 𑢩𑣕𑣉𑣚𑣚 : 𑢹𑣂𑣜𑣚𑣁 𑢾𑣂𑣊𑣋𑣜𑣁𑣅 𑢷𑣁𑣓𑣁𑣜𑣁. 𑢹𑣕𑣃 : 𑢯𑣙𑣉𑣒𑣜𑣁𑣈𑣘𑣃𑣜 𑢮𑣂𑣚𑣚 : 𑢬𑣂𑣓𑣎𑣂𑣜𑣂 .