𑢾𑢨𑢰𑢡 𑢸𑢩𑢩𑢴𑢩

𑢶𑢢𑢱 𑢧𑢲𑢢

𑢴𑣂𑣝𑣃𑣖 𑣙𑣁𑣋𑣁𑣌𑣉 𑣞𑣈𑣐𑣁-𑣖𑣁𑣜𑣞𑣁𑣚 𑣌𑣉 𑣚𑣁𑣋𑣂𑣑 𑣋𑣈 𑣓𑣈𑣓" 𑢾𑢨‍𑢰𑢡 𑢸𑢩𑢩𑢴 " 𑣌𑣂𑣕𑣁𑣗 𑣔𑣉𑣍 𑣉𑣚 𑣌𑣈𑣑𑣁.𑢡𑣗𑣃𑣆𑣕𑣈 𑣖𑣁𑣐𑣁𑣊𑣕𑣈 𑣞𑣈𑣐𑣁𑣁𑣌𑣁𑣓 𑣔𑣂𑣌𑣃 𑣎𑣁𑣕𑣂 𑣌𑣉 𑣓𑣈𑣚-𑣓𑣈𑣚 𑣕𑣈𑣋𑣈, 𑣁𑣍𑣁𑣄 𑣎𑣂𑣗𑣉𑣓 𑣜𑣈𑣅𑣁𑣁 𑣖𑣂𑣅𑣁𑣀𑣑 𑣇𑣛𑣃𑣄 𑣙𑣃𑣎𑣃𑣄 𑣎𑣁𑣓𑣁𑣏𑣂 𑣁𑣚𑣈𑣅𑣉𑣉 𑣙𑣉𑣓𑣁𑣊 𑣓𑣈𑣌𑣃 𑣚𑣈𑣌𑣁 𑣞𑣈𑣐𑣁-𑣘𑣉𑣉𑣔𑣉 𑣌𑣉𑣚𑣈 𑣗𑣁𑣆𑣎𑣉𑣖 𑣁𑣜 𑣈𑣕𑣉𑣎𑣉𑣖 𑣜𑣈𑣔𑣉 ,𑣁𑣌𑣉 𑣚𑣈𑣌𑣁𑣚𑣈 𑣚𑣈𑣞𑣈𑣜-𑣗𑣃𑣔𑣂𑣅𑣉𑣄 𑣋𑣈 𑣕𑣉𑣜𑣁𑣊.
𑢨𑣓 𑣁𑣆𑣀𑣝 𑣁𑣜 𑣌𑣁𑣀𑣆𑣝 𑣕𑣈𑣋𑣈 𑣓𑣈𑣓 𑢾𑣈𑣐𑣁-𑢸𑣉𑣉𑣔𑣉 𑣌𑣉𑣔𑣉𑣍 𑣉𑣚𑣕𑣁𑣑𑣁. 𑢨𑣓𑣈𑣒𑣈𑣄 𑣜𑣈𑣔𑣉 𑣔𑣂𑣌𑣃-𑣌𑣉𑣁𑣄 𑣌𑣁𑣒𑣁-𑣖𑣁𑣀𑣑𑣁 𑣕𑣈𑣋𑣈𑣍 𑣖𑣁𑣀𑣑𑣁 𑣈𑣅𑣉𑣗𑣕𑣁𑣑 𑣜𑣈𑣅𑣉𑣉 𑣏𑣁𑣓𑣁𑣗𑣕𑣈𑣔𑣉 𑣁𑣍 𑣕𑣈𑣋𑣈 𑣙𑣉𑣜𑣁 𑣗𑣁𑣇𑣎𑣉𑣖 𑣕𑣁𑣓 𑣎𑣉𑣉𑣊 𑣆𑣘𑣁𑣓 𑣕𑣈𑣋𑣈𑣍 𑣖𑣁𑣀𑣑𑣁 𑣕𑣁𑣑𑣁.
𑢳𑣈𑣓 𑣞𑣈𑣐𑣁-𑣘𑣉𑣉𑣔𑣉 𑣌𑣉𑣕𑣈 𑣎𑣃𑣔𑣂 𑣁𑣗𑣃 𑣙𑣉𑣉 𑣎𑣁𑣕𑣂 𑣌𑣉 𑣞𑣃𑣛𑣂𑣕𑣁 -𑣗𑣁𑣕𑣂 𑣆𑣖𑣂𑣓𑣁𑣊 𑣜𑣈𑣅𑣉𑣉 𑣞𑣈𑣐𑣁𑣌𑣉 𑣓𑣁𑣖 𑣌𑣈𑣑𑣁 𑣈𑣓 𑣜𑣈𑣔𑣉, 𑣖𑣃𑣞𑣂𑣊 𑣗𑣁𑣓𑣉 𑣖𑣃𑣞𑣂𑣊 𑣗𑣂𑣎𑣂𑣚𑣂-𑣗𑣁𑣕𑣂 𑣆𑣖𑣂𑣓𑣁𑣊 𑣌𑣉 𑣖𑣁𑣜𑣞𑣁𑣚𑣈 𑣋𑣈𑣅𑣁.


𑢴𑣁𑣓𑣁𑣊-𑢾𑣂𑣊𑣜𑣁𑣎 𑢵𑣂𑣅𑣃
𑢴𑣂𑣚𑣁𑣀-𑣡𑣧/𑣠𑣨/𑣢𑣠𑣠𑣧


𑣡- 𑢵𑣂𑣞𑣂𑣊𑣈𑣖 𑣖𑣈𑣓𑣈 𑣋𑣁𑣘𑣁𑣍 𑣘𑣁𑣆𑣒𑣂,
𑣋𑣁𑣘𑣁𑣖 𑣖𑣈𑣓𑣈 𑣋𑣁𑣘𑣁𑣋𑣈,
𑢵𑣂𑣞𑣂𑣊-𑣋𑣁𑣘𑣁-𑣋𑣁𑣘𑣁 𑣕𑣈𑣋𑣈,
𑣎𑣂𑣗𑣉𑣓 𑣞𑣈𑣓𑣉𑣄 𑣞𑣁𑣖𑣁𑣋𑣈.


𑣢-𑢾𑣃𑣌𑣃 𑣞𑣉𑣖𑣉𑣅𑣌𑣉 𑣕𑣁𑣗𑣃-𑣕𑣁𑣗𑣃𑣆,
𑣓𑣈𑣚𑣌𑣉𑣖 𑣓𑣈𑣆𑣀-𑣈𑣓𑣂𑣘𑣔𑣉,
𑢴𑣃𑣌𑣃 𑣞𑣉𑣖𑣉𑣅 𑣕𑣁𑣗𑣃𑣆 𑣓𑣂𑣄,
𑣁𑣖𑣁𑣄 𑣞𑣁𑣜𑣂 𑣌𑣃𑣘𑣃𑣚 𑣔𑣉.


𑣣-𑢶𑣁𑣜𑣁𑣊 𑣜𑣈𑣔𑣉 𑣏𑣈𑣓𑣁𑣄 𑣈𑣓𑣁,
𑣞𑣁𑣚𑣁𑣀𑣋𑣂-𑣌𑣂𑣕𑣁-𑣔𑣁𑣜𑣃 𑣜𑣈,
𑢩𑣅𑣌𑣉 𑣚𑣁𑣋𑣂𑣑 𑣇𑣀𑣗𑣃𑣚 𑣗𑣁𑣓𑣉𑣄.
𑣎𑣉𑣉𑣓 𑣈𑣝𑣃 𑣏𑣈𑣕𑣁𑣓 𑣜𑣈.


𑣤-𑢩𑣛𑣁𑣓-𑣜𑣂𑣑𑣈𑣓 𑣜𑣈𑣖 𑣏𑣈𑣓𑣁𑣄,
𑣖𑣉𑣓𑣋𑣈 𑣕𑣁𑣖 𑣞𑣂𑣂𑣀𑣄 𑣜𑣈,
𑢴𑣁𑣁𑣓 𑣔𑣃𑣌𑣂𑣐𑣁 𑣏𑣈𑣓𑣁𑣄 𑣙𑣉𑣗𑣁𑣓,
𑣌𑣃𑣛𑣂𑣖 𑣗𑣈𑣘𑣁𑣜 𑣜𑣈.


𑣥-𑢾𑣁𑣓𑣂𑣊 𑣗𑣃𑣜𑣃 𑣓𑣈𑣚𑣕𑣈 𑣏𑣂𑣌𑣁,
𑣚𑣁𑣀𑣔𑣁𑣅-𑣚𑣁𑣀𑣔𑣁𑣅 𑣞𑣁𑣓𑣁𑣊,
𑢸𑣁𑣏𑣁𑣜𑣂 𑣗𑣂𑣕𑣁𑣜 𑣞𑣂𑣘𑣃𑣆 𑣖𑣃𑣒𑣁,
𑣞𑣈𑣓𑣋𑣈-𑣞𑣈𑣓𑣋𑣈 𑣞𑣁𑣓𑣁𑣊.


𑣦- 𑢺𑣃𑣗𑣂𑣅𑣁 𑣙𑣉𑣛𑣉 𑣌𑣉𑣁𑣄 𑣞𑣁𑣓𑣁𑣊,
𑣏𑣃𑣆𑣚𑣁 𑣌𑣁𑣁 𑣘𑣃𑣜𑣁𑣓,
𑢾𑣁𑣗𑣈𑣓-𑣞𑣁𑣗𑣈𑣓 𑣋𑣁𑣛𑣁-𑣔𑣁𑣄𑣕𑣈,
𑣔𑣉𑣜𑣈𑣅𑣁 𑣌𑣁𑣁 𑣘𑣈𑣜𑣈𑣈𑣓.


𑣧- 𑢳𑣉𑣞𑣂𑣗𑣁𑣓𑣂𑣄 𑣋𑣈 𑣞𑣁𑣜𑣂𑣕𑣈𑣅𑣁,
𑣈𑣊𑣋𑣁-𑣁𑣘𑣃 𑣌𑣁𑣎𑣂 𑣔𑣉
𑢶𑣃𑣒𑣂𑣜 𑣌𑣉𑣋𑣈 𑣓𑣁𑣖𑣈 𑣕𑣁𑣓𑣁,
𑣖𑣃𑣕𑣂𑣑-𑣏𑣁𑣀𑣑𑣁𑣊 𑣔𑣃𑣌𑣃 𑣔𑣉.


𑣨- 𑢸𑣁𑣋𑣁𑣕𑣈 𑣔𑣂𑣜𑣂 𑣋𑣈𑣞𑣁-𑣋𑣈𑣞𑣁𑣕𑣈,
𑣔𑣂𑣜𑣂𑣜𑣈 𑣋𑣁𑣛𑣁 𑣗𑣁𑣆𑣓 𑣕𑣁𑣓
𑢷𑣉𑣜𑣉𑣊-𑣗𑣉𑣜𑣉𑣊 𑣈𑣕𑣉-𑣈𑣕𑣉𑣕𑣈
𑣘𑣁𑣛𑣁𑣉 𑣞𑣈𑣐𑣁𑣓 𑣕𑣁𑣓.


𑣩- 𑢮𑣂𑣂𑣞𑣃𑣌𑣃𑣕𑣈 𑣓𑣁𑣖𑣉𑣄 𑣕𑣈𑣅𑣁𑣄,
𑣓𑣂𑣜𑣌𑣈𑣈𑣕𑣈 𑣞𑣁𑣗𑣈𑣖
𑢼𑣈𑣘𑣈𑣄 𑣈𑣓𑣁𑣊 𑣓𑣁𑣖𑣉𑣄 𑣕𑣈𑣅𑣁𑣄,
𑣔𑣉𑣅𑣁 𑣌𑣃𑣀𑣑𑣁𑣖𑣈𑣖.


𑣡𑣠- 𑢶𑣁𑣜𑣁𑣊 𑣋𑣁𑣛𑣁 𑣖𑣁𑣅𑣕𑣈 𑣚𑣂𑣀𑣋𑣂𑣓,
𑣚𑣉𑣉𑣜 𑣋𑣁𑣛𑣁 -𑣙𑣃𑣛𑣃𑣓𑣁,
𑢶𑣁𑣜𑣁𑣊 𑣙𑣉𑣛𑣉𑣔𑣉 𑣗𑣁𑣓𑣉 𑣙𑣃𑣛𑣂𑣊
𑣌𑣉𑣋𑣈 𑣑𑣁𑣋𑣉𑣑𑣁𑣋𑣉𑣓𑣁.


𑣡𑣡- 𑢳𑣃𑣀 𑣕𑣁𑣓𑣜𑣈 𑣑𑣂𑣅𑣁𑣊 𑣓𑣉𑣋𑣉𑣑,
𑣏𑣁𑣌𑣁 𑣕𑣁𑣓 𑣜𑣈 𑣏𑣁𑣌𑣁𑣐𑣁,
𑢵𑣉𑣚 𑣎𑣁𑣓 𑣜𑣈𑣖 𑣘𑣜𑣈𑣈𑣖𑣕𑣈,
𑣜𑣂𑣂𑣊𑣈𑣅𑣁𑣖 𑣗𑣁𑣌𑣁𑣐𑣁.


𑣡𑣢- 𑢴𑣃𑣖𑣃𑣜 𑣚𑣈𑣌𑣁 𑣌𑣃𑣜𑣃𑣖𑣃𑣒𑣃𑣕𑣈 ,
𑣗𑣁𑣗𑣁𑣖 𑣏𑣁𑣁𑣝𑣉 𑣕𑣁𑣓,
𑢷𑣈𑣋𑣁𑣜 𑣗𑣁𑣚-𑣗𑣁𑣚 𑣕𑣈
𑣏𑣃𑣕𑣃𑣜 𑣙𑣉𑣛𑣉𑣌𑣉 𑣎𑣉𑣖𑣈 𑣕𑣁𑣓.


𑣡𑣣- 𑢧𑣛𑣂 𑣉𑣛𑣉𑣊 𑣗𑣉𑣔𑣉𑣚𑣈𑣖 𑣕𑣁𑣖,
𑣔𑣉𑣜𑣉𑣖 𑣔𑣉𑣞𑣕𑣃𑣜𑣌𑣉,
𑢶𑣃𑣏𑣁𑣑𑣉𑣄 𑣕𑣁𑣖 𑣎𑣁𑣕𑣂 𑣗𑣁𑣓𑣜𑣈,
𑣏𑣂𑣌𑣁 𑣇𑣇𑣀𑣒𑣃-𑣉𑣅𑣌𑣉.


𑣡𑣤- 𑢴𑣂𑣌𑣃-𑣎𑣉𑣁𑣜 𑣗𑣁𑣌𑣁𑣜𑣁 𑣖𑣁𑣕𑣁,
𑣎𑣂𑣗𑣉𑣓 𑣕𑣃𑣚𑣕𑣃𑣚𑣈𑣓,
𑢷𑣁𑣓𑣁𑣌𑣃𑣄 𑣕𑣈 𑣗𑣁𑣄 𑣎𑣁𑣓𑣜𑣈,
𑣞𑣁𑣓𑣁𑣖 𑣗𑣁𑣘𑣁𑣜𑣂𑣓.


𑣡𑣥- 𑢬𑣁𑣁𑣄 𑣙𑣈𑣀𑣔𑣈,𑣕𑣉𑣁𑣇 𑣙𑣈𑣀𑣔𑣈,
𑣞𑣁𑣗𑣈𑣌𑣉 𑣖𑣂𑣑 𑣞𑣉𑣖𑣁𑣓𑣁,
𑢸𑣁𑣋𑣃𑣓-𑣏𑣁𑣀𑣑𑣃𑣄 𑣏𑣂𑣓𑣁 𑣌𑣉𑣖𑣈,
𑣜𑣁𑣄 𑣕𑣁𑣓𑣌𑣉 𑣆𑣘𑣁𑣓𑣁.


𑣡𑣦- 𑢾𑣈𑣐𑣁 𑣋𑣃𑣜𑣃, 𑣌𑣂𑣕𑣁𑣗 𑣋𑣃𑣜𑣃,
𑣁𑣜 𑣞𑣂𑣜𑣂𑣎𑣉𑣓 𑣋𑣃𑣜𑣃,
𑢩𑣌𑣉𑣅 𑣓𑣈𑣌𑣃 𑣖𑣁𑣆𑣓𑣌𑣉𑣁,
𑣈𑣓𑣂𑣀 𑣖𑣁𑣜𑣁𑣊 𑣋𑣃𑣜𑣃.


𑣡𑣧- 𑢸𑣁𑣛𑣁𑣉 𑣙𑣁𑣋𑣁 𑣓𑣁𑣖𑣌𑣂𑣂𑣜𑣈,
𑣖𑣃𑣜𑣃𑣌𑣃 𑣁𑣚𑣉𑣖 𑣈𑣖𑣁𑣆,
𑢬𑣁𑣈 𑣋𑣁𑣓𑣈𑣅𑣁 𑣌𑣁𑣘𑣂 𑣏𑣃𑣆𑣚𑣁,
𑣌𑣉𑣀𑣑𑣈𑣄 -𑣙𑣁𑣌𑣈 𑣌𑣁𑣖𑣂.


𑣡𑣨- 𑢾𑣁𑣗𑣈𑣓 𑣎𑣃𑣀𑣋𑣃𑣑 𑣓𑣈𑣚𑣉𑣄 𑣕𑣈𑣅𑣁𑣄,
𑣞𑣁𑣖𑣁𑣐𑣉𑣖𑣔𑣉 𑣗𑣁𑣓𑣉,
𑢾𑣁𑣗𑣈𑣓 𑣚𑣈𑣅𑣁𑣜 𑣎𑣁𑣋𑣁𑣜 𑣌𑣉,
𑣗𑣃𑣋𑣂𑣓 𑣙𑣉𑣛𑣉 𑣔𑣉 𑣗𑣁𑣓𑣉.


𑣡𑣩- 𑢷𑣁𑣜𑣂𑣅𑣁 𑣖𑣈𑣑𑣕𑣈 𑣌𑣁𑣖 𑣓𑣈𑣚𑣁𑣜𑣈,
𑣋𑣃𑣜𑣃 𑣌𑣁𑣎𑣂𑣓 𑣏𑣁𑣌𑣁𑣑𑣁,
𑢬𑣉𑣄-𑣌𑣁𑣒𑣁𑣜𑣈 𑣏𑣉𑣌𑣈 𑣔𑣃𑣗𑣁𑣌𑣁𑣓,
𑣉𑣌𑣉𑣅 𑣞𑣁𑣜𑣂𑣅𑣁𑣑𑣁 ?


𑣢𑣠- 𑢷𑣉𑣀𑣋𑣁-𑣎𑣁𑣜𑣂𑣂 𑣕𑣈𑣖 𑣔𑣃𑣄𑣓 ,
𑣖𑣁𑣅𑣉𑣖 𑣌𑣁𑣖 𑣗𑣉𑣀𑣋𑣁𑣜𑣈,
𑢴𑣂𑣌𑣃 𑣎𑣁𑣜𑣂𑣂 𑣕𑣈𑣖 𑣔𑣃𑣄𑣓,
𑢺𑣂𑣒𑣁 𑣁𑣌𑣁𑣛𑣁 𑣗𑣉𑣚𑣉 𑣜𑣈.
𑣢𑣡- 𑢹𑣁𑣋𑣁𑣖 𑣉𑣛𑣁𑣄 𑣚𑣉𑣉𑣕𑣁𑣓𑣜𑣈,
𑣎𑣃𑣔𑣂𑣖 𑣓𑣈𑣚 𑣙𑣁𑣘𑣁𑣓,
𑢨𑣓 𑣏𑣁𑣓𑣁𑣗 𑣁𑣖𑣁𑣄 𑣚𑣉𑣉𑣓,
𑣞𑣁𑣖𑣁𑣖 𑣆𑣅𑣃 𑣚𑣁𑣋𑣁𑣓.
𑣢𑣢- 𑢹𑣁𑣌𑣈 𑣔𑣁𑣀𑣑𑣉𑣖 𑣙𑣁𑣌𑣈 𑣔𑣈𑣀𑣋𑣁,
𑣔𑣁𑣜𑣃 𑣌𑣉 𑣖𑣁𑣄 𑣋𑣃𑣜𑣜𑣈,
𑢴𑣁𑣚𑣁𑣚𑣂-𑣙𑣁𑣋𑣁 𑣔𑣂𑣌𑣃𑣆 𑣔𑣈𑣀𑣋𑣁,
𑣙𑣁𑣋𑣁 𑣌𑣉 𑣘𑣉𑣒𑣉𑣈 𑣕𑣁𑣓𑣜𑣈.
𑣢𑣣- 𑢬𑣁𑣜𑣁𑣗 𑣓𑣉𑣞𑣂𑣗 𑣙𑣉𑣛𑣉 𑣌𑣁𑣎𑣂𑣕𑣈,
𑣌𑣁𑣋𑣈𑣖 𑣞𑣃𑣞𑣁𑣜𑣂𑣂𑣅𑣁,
𑢾𑣁𑣗𑣉𑣓 𑣌𑣉𑣕𑣈 𑣉𑣛𑣁𑣆 𑣝𑣃𑣌𑣃𑣜𑣂,
𑢱𑣉𑣗𑣈𑣜𑣈 𑣗𑣁𑣒𑣂𑣓 𑣋𑣈𑣅𑣁.
𑣢𑣤- 𑢾𑣁𑣞𑣁𑣊 𑣜𑣂𑣑𑣜𑣈 𑣎𑣃𑣃𑣀𑣋𑣃𑣑,
𑣙𑣈𑣀𑣔𑣈 𑣙𑣁𑣀𑣋𑣁𑣜 𑣜𑣂𑣑𑣜𑣈,
𑢷𑣃𑣋𑣂𑣓 𑣌𑣁𑣖𑣂𑣕𑣈 𑣓𑣃𑣃𑣕𑣃𑣖 ,
𑣇𑣇𑣖𑣂 𑣌𑣁𑣜𑣁𑣗 𑣌𑣁𑣖𑣂 𑣜𑣈.
𑣢𑣥- 𑢫𑣃𑣚𑣁𑣗 𑣗𑣁𑣛𑣁 𑣎𑣃𑣀𑣋𑣃𑣑 𑣁𑣜,
𑣖𑣃𑣜𑣄 𑣗𑣁𑣛𑣁𑣉 𑣎𑣃𑣀𑣋𑣃𑣑𑣁,
𑢨𑣓𑣁𑣌𑣉 𑣙𑣁𑣅𑣁𑣕𑣈 𑣞𑣁𑣗𑣈𑣓,
𑣉𑣌𑣉𑣓𑣁 𑣖𑣃𑣕𑣃𑣑-𑣖𑣃𑣕𑣃𑣑𑣁.
𑣢𑣦- 𑢮𑣉𑣓𑣉𑣖 𑣚𑣉𑣄𑣕𑣈 𑣌𑣁𑣗𑣃 𑣁𑣋𑣃𑣁𑣓,
𑣌𑣃𑣘𑣃𑣚-𑣌𑣃𑣘𑣃𑣝𑣃𑣜 𑣔𑣉,
𑢯𑣁𑣁𑣚-𑣏𑣉𑣚𑣉𑣓 𑣉𑣛𑣉𑣊 𑣕𑣈𑣋𑣈,
𑣗𑣁𑣆𑣓 𑣕𑣁𑣓𑣁 𑣓𑣈𑣅𑣁𑣀 𑣔𑣉.
𑣢𑣧- 𑢬𑣉𑣜𑣉𑣖-𑣌𑣉𑣘𑣁𑣛 𑣉𑣛𑣉𑣊 𑣕𑣈𑣋𑣈,
𑣎𑣂𑣗𑣉𑣓 𑣞𑣈𑣞𑣈𑣓 𑣜𑣈𑣅𑣁𑣁,
𑢷𑣉𑣔𑣉𑣚𑣈𑣅𑣁𑣖 𑣁𑣔𑣁-𑣁𑣔𑣂𑣔𑣉,
𑣔𑣉𑣜𑣉𑣖 𑣌𑣁𑣖𑣂 𑣕𑣈𑣅𑣁𑣁.
𑣢𑣨- 𑢶𑣁𑣆𑣓 𑣈𑣖𑣈𑣖 𑣈𑣕𑣉𑣅 𑣜𑣈𑣔𑣉,
𑣖𑣁𑣆𑣓𑣈𑣖 𑣓𑣁𑣖𑣈 𑣋𑣈𑣅𑣁,
𑢡𑣍𑣋𑣈 𑣖𑣁𑣜𑣁𑣊 𑣖𑣈𑣓𑣈𑣜𑣈,
𑣁𑣖𑣋𑣈 𑣙𑣃𑣛𑣂𑣊 𑣋𑣈𑣅𑣁.
𑣢𑣩- 𑢾𑣁𑣜𑣂 𑣌𑣁𑣎𑣂 𑣔𑣉 𑣌𑣁𑣖 𑣔𑣁𑣓𑣁𑣊𑣈,
𑣌𑣁𑣖 𑣞𑣁𑣜𑣂𑣕𑣈 𑣜𑣈𑣅𑣉𑣉,
𑢾𑣂𑣀𑣋𑣂𑣔𑣉 𑣌𑣁𑣖 𑣓𑣂𑣔𑣁𑣅 𑣋𑣈𑣅𑣁,
𑣖𑣈𑣑𑣈𑣖 𑣎𑣁𑣘𑣂𑣑𑣈 𑣜𑣈𑣅𑣉𑣉.
𑣣𑣠- 𑢾𑣁𑣖𑣁𑣊 𑣜𑣈𑣅𑣉𑣉 𑣔𑣁𑣓𑣁𑣊 𑣜𑣈𑣅𑣉𑣉,
𑣇𑣞𑣁𑣔 𑣌𑣂𑣜𑣈𑣖 𑣋𑣃𑣜𑣃,
𑢬𑣁𑣋𑣈 𑣘𑣃𑣜𑣁𑣓 𑣎𑣂𑣗𑣉𑣓 𑣞𑣁𑣓𑣁𑣊,
𑣞𑣁𑣖𑣁 𑣜𑣈𑣖 𑣌𑣃𑣜𑣃𑣖𑣃𑣒𑣃.
𑣣𑣡- 𑢷𑣈𑣋𑣁𑣜 𑣜𑣁𑣎𑣁 𑣔𑣂𑣝𑣃𑣖 𑣁𑣜,
𑣗𑣈𑣋𑣁𑣜 𑣋𑣉𑣖𑣌𑣈 𑣙𑣃𑣔𑣁,
𑢬𑣃𑣖𑣃𑣕𑣈 𑣎𑣁𑣌𑣈 𑣞𑣃𑣌𑣃 𑣗𑣁𑣓𑣉𑣅,
𑣞𑣁𑣗𑣈𑣌𑣉 𑣜𑣃𑣔𑣁 𑣜𑣃𑣔𑣁.
𑣣𑣢- 𑢾𑣁𑣖𑣁𑣖 𑣓𑣈𑣚𑣈 𑣞𑣁𑣓𑣁𑣖 𑣔𑣂𑣞𑣃𑣖 ,
𑢨𑣀𑣋𑣁-𑣁𑣘𑣃𑣁𑣄 𑣖𑣈𑣑𑣕𑣈,
𑢩𑣌𑣉𑣓𑣁 𑣏𑣈𑣓𑣁𑣄 𑣌𑣁𑣖 𑣇𑣜𑣃𑣖𑣈,
𑣗𑣈𑣋𑣁𑣜 𑣋𑣃𑣜𑣃 𑣖𑣈𑣑𑣕𑣈.
𑣣𑣣- 𑢼𑣈𑣄 𑣘𑣉𑣒𑣉𑣖 ,𑣏𑣁𑣌𑣁𑣑 𑣌𑣁𑣕𑣈𑣖,
𑣁𑣜𑣎𑣁𑣉 𑣕𑣁𑣑 𑣗𑣂𑣕𑣂𑣌𑣉,
𑢸𑣁𑣁𑣘𑣉-𑣏𑣁𑣘𑣂 𑣜𑣈𑣋𑣈 𑣞𑣈𑣓𑣉𑣄 ,
𑣞𑣁𑣖𑣁𑣌𑣉 𑣓𑣈𑣚𑣈 𑣙𑣉𑣓𑣌𑣉.
𑣣𑣤- 𑢫𑣈𑣚𑣈𑣅𑣁-𑣕𑣈𑣜𑣈𑣅𑣁 𑣈𑣜𑣁𑣜𑣈 𑣎𑣃𑣔𑣂,
𑣞𑣃𑣌𑣃 𑣗𑣁𑣓𑣉𑣙𑣄 𑣎𑣁𑣓𑣁,
𑢫𑣈𑣚𑣈𑣅𑣁 -𑣕𑣈𑣜𑣈𑣅𑣁 𑣗𑣉𑣀𑣋𑣁 ,
𑣞𑣈𑣗𑣁𑣕𑣈 𑣏𑣂𑣌𑣁𑣖 𑣞𑣃𑣌𑣃𑣓𑣁 ?
𑣣𑣥- 𑢷𑣁𑣘𑣁𑣆-𑣋𑣉𑣘𑣉𑣈 𑣌𑣁𑣖𑣂𑣔𑣉 𑣙𑣁𑣋𑣁𑣁𑣄 ,
𑣉𑣛𑣁𑣄 𑣁𑣕𑣁𑣜 𑣕𑣁𑣓𑣁,
𑢩𑣛𑣁𑣄 𑣏𑣁𑣓𑣁𑣗 𑣁𑣖𑣁𑣄 𑣚𑣉𑣉𑣓,
𑣌𑣁𑣖 𑣏𑣂𑣜𑣋𑣁𑣚𑣈 𑣕𑣁𑣓𑣁.
𑣣𑣦- 𑢸𑣁𑣛𑣁𑣉, 𑣓𑣉𑣌𑣉𑣜𑣂,𑣜𑣁𑣎𑣁𑣓 𑣜𑣈𑣅𑣉𑣖, 𑣋𑣉𑣓𑣉𑣊 𑣗𑣁𑣓𑣉𑣄 𑣕𑣁𑣖𑣁, 𑢷𑣈𑣋𑣁𑣜 𑣞𑣁𑣓𑣁𑣋𑣉𑣖𑣕𑣈 𑣞𑣃𑣖𑣁𑣊, 𑣚𑣁𑣀𑣗𑣂-𑣙𑣉𑣉𑣓𑣋𑣈 𑣕𑣈𑣖𑣁. 𑣣𑣧- 𑢱𑣃𑣚𑣌𑣂 𑣈𑣞𑣃 𑣝𑣁𑣛𑣂𑣅𑣁 , 𑣖𑣈𑣓𑣔𑣉 𑣗𑣂𑣕𑣁𑣜 𑣌𑣉𑣌𑣉𑣜𑣉 𑣋𑣈𑣅𑣁, 𑢯𑣁𑣒𑣂𑣋𑣈 𑣌𑣁𑣘𑣁𑣎𑣂 𑣙𑣉𑣛𑣉 𑣜𑣈, 𑣓𑣈𑣚𑣈𑣖 𑣋𑣃𑣃𑣓 𑣗𑣁𑣓𑣉𑣄 𑣋𑣈𑣅𑣁. 𑣣𑣨- 𑢹𑣉𑣛𑣉𑣖𑣉 𑣙𑣁𑣜𑣁 𑣕𑣁𑣓 𑣜𑣈 𑣏𑣉𑣚𑣉𑣓, 𑣌𑣁𑣖 𑣝𑣃𑣞𑣁𑣜 𑣌𑣈𑣜𑣈, 𑢷𑣂𑣑𑣔𑣁,𑣗𑣃𑣔𑣂,𑣗𑣂𑣕𑣂𑣌𑣉 𑣕𑣁𑣖, 𑣌𑣁𑣁 𑣙𑣃𑣎𑣃𑣄 𑣌𑣁𑣖𑣂𑣜𑣈. 𑣣𑣩- 𑢬𑣃𑣞𑣃𑣜 𑣙𑣁𑣋𑣁 𑣚𑣁𑣞𑣃𑣜 𑣚𑣋𑣂𑣑, 𑣔𑣂𑣌𑣃 𑣁𑣚𑣉𑣖 𑣎𑣃𑣛𑣂𑣌𑣉, 𑢹𑣁𑣋𑣁𑣖 𑣏𑣁𑣓𑣁𑣗 𑣁𑣖 𑣚𑣁𑣞𑣃𑣜𑣉𑣄 , 𑣗𑣈𑣌𑣁𑣜𑣉𑣄 𑣕𑣁𑣖 𑣗𑣃𑣔𑣂𑣌𑣉. 𑣤𑣠- 𑢾𑣂𑣒𑣂𑣅𑣁 𑣞𑣉𑣖𑣁𑣅 𑣆𑣓𑣃𑣊 𑣜𑣈𑣋𑣈, 𑣎𑣃𑣁𑣓 𑣔𑣃𑣜𑣁𑣊 𑣞𑣃𑣞𑣃𑣓 𑣜𑣈, 𑢸𑣁𑣜𑣉𑣖 𑣌𑣈𑣑𑣁𑣖 𑣖𑣈𑣓𑣔𑣉 𑣓𑣈𑣚𑣈𑣖, 𑣗𑣃𑣛𑣁𑣔𑣉 𑣞𑣃𑣖𑣁𑣊 𑣜𑣁𑣄𑣜𑣈. 𑣤𑣡- 𑢬𑣁𑣎𑣂𑣂 𑣁𑣅𑣁𑣜 𑣓𑣈𑣚𑣈𑣖 𑣉𑣌𑣉𑣓, 𑣜𑣈𑣖 𑣕𑣂𑣀𑣋𑣃𑣁 𑣌𑣁𑣓, 𑢷𑣂𑣏𑣁𑣜 𑣚𑣈𑣖𑣈 𑣔𑣁𑣀𑣑𑣁 𑣏𑣂 𑣎𑣉𑣁𑣜, 𑣕𑣉𑣜𑣁𑣊 𑣙𑣉𑣘𑣉𑣜𑣁 𑣌𑣁𑣓𑣁. 𑣤𑣢- 𑢬𑣁𑣁 𑣋𑣁𑣓𑣉𑣄 𑣖𑣉𑣓𑣕𑣉𑣜 𑣕𑣁𑣖, 𑣗𑣈𑣋𑣁𑣜 𑣋𑣃𑣜𑣃 𑣓𑣃𑣖𑣃𑣕𑣈, 𑢬𑣁𑣖 𑣓𑣁𑣖𑣈𑣅𑣁𑣀 𑣙𑣃𑣔𑣁𑣜𑣈 𑣋𑣁𑣀𑣑𑣃, 𑣗𑣈𑣋𑣁𑣜 𑣁𑣘𑣃 𑣓𑣃𑣖𑣃𑣕𑣈. 𑣤𑣣- 𑢴𑣃𑣌𑣃 𑣁𑣇𑣜𑣂 𑣞𑣈𑣒𑣈𑣜 𑣁𑣀𑣗𑣁𑣄 , 𑣔𑣃𑣌𑣃𑣔𑣉 𑣗𑣉𑣜𑣉 𑣕𑣈𑣖𑣈, 𑢾𑣁𑣖𑣁𑣓𑣁𑣊 𑣜𑣈 𑣞𑣈𑣒𑣈𑣜 𑣎𑣁𑣓𑣜𑣈, 𑣔𑣂𑣒𑣁𑣕𑣈 𑣔𑣁𑣜𑣉 𑣖𑣈𑣖𑣈. 𑣤𑣤- 𑢷𑣃𑣋𑣂-𑣈𑣑𑣌𑣁, 𑣗𑣉𑣀𑣋𑣁 𑣏𑣁 𑣙𑣉𑣛𑣉, 𑣎𑣃𑣔𑣂𑣖 𑣖𑣁𑣆𑣓 𑣌𑣉𑣁, 𑢾𑣁𑣜𑣂 𑣎𑣂𑣗𑣉𑣓 𑣞𑣃𑣌𑣃𑣖 𑣓𑣁𑣖𑣈, 𑣙𑣉𑣓𑣌𑣉𑣖 𑣞𑣃𑣌𑣃 𑣌𑣉𑣁. 𑣤𑣥- 𑢹𑣃𑣛𑣂𑣊 𑣌𑣁𑣖𑣂 𑣖𑣈𑣓𑣕𑣈 𑣎𑣃𑣔𑣂 𑣙𑣈𑣛𑣁-𑣙𑣈𑣛𑣁𑣖 𑣞𑣁𑣗𑣈, 𑢹𑣈𑣛𑣁𑣖 𑣞𑣈𑣗𑣈 𑣎𑣁𑣓𑣜𑣈 𑣖𑣁𑣜𑣁𑣊, 𑣌𑣁𑣖𑣂 𑣅𑣉𑣉𑣋𑣈𑣖 𑣙𑣈𑣛𑣁𑣅. 𑣤𑣦- 𑢯𑣁𑣌𑣁𑣑 𑣖𑣂𑣅𑣁𑣑 𑣜𑣉𑣋𑣁 𑣋𑣈 𑣕𑣁𑣓𑣁, 𑣁𑣚𑣉𑣖 𑣌𑣁𑣎𑣂 𑣞𑣈𑣗𑣈𑣓, 𑢾𑣈𑣗𑣈𑣎𑣁𑣓𑣜𑣈 𑣖𑣁𑣜𑣕𑣈 𑣌𑣁𑣏𑣂, 𑣁𑣖𑣋𑣈𑣖 𑣏𑣁𑣌𑣁𑣑𑣈𑣓. 𑣤𑣧- 𑢮𑣂𑣚𑣂𑣊 𑣎𑣂𑣂𑣑 𑣞𑣁𑣓𑣁𑣊 𑣜𑣈𑣔𑣉𑣖, 𑣓𑣁𑣝𑣁 𑣁𑣚𑣉𑣖 𑣞𑣈𑣗𑣈𑣓, 𑢳𑣃𑣕𑣃 𑣖𑣈𑣓𑣈𑣖 𑣞𑣁𑣓𑣁𑣊 𑣜𑣈𑣔𑣉, 𑣏𑣁𑣌𑣁𑣑 𑣁𑣚𑣉𑣖 𑣞𑣈𑣗𑣈𑣓. 𑣤𑣨- 𑢮𑣁𑣋𑣁𑣜 𑣖𑣃𑣕𑣂𑣑 𑣈𑣒𑣁𑣄 𑣌𑣉𑣁𑣄, 𑣗𑣁𑣛𑣂𑣎 𑣋𑣈𑣄 𑣇𑣔𑣃𑣗𑣁, 𑢨𑣓𑣂𑣀 𑣚𑣉𑣄𑣕𑣈 𑣎𑣃𑣛𑣂-𑣎𑣃𑣘𑣃𑣛𑣂, 𑣈𑣞𑣃𑣋𑣈 𑣔𑣃𑣌𑣃𑣁. 𑣤𑣩- 𑢾𑣁𑣜𑣂 𑣌𑣁𑣎𑣂 𑣕𑣈 𑣁𑣚𑣉𑣖 𑣗𑣉𑣜𑣉𑣅, 𑣞𑣁𑣌𑣂 𑣗𑣁𑣊𑣌𑣃 𑣜𑣈𑣅𑣉, 𑢴𑣉𑣜𑣉𑣖 𑣌𑣁𑣖𑣂𑣜𑣈 𑣁𑣚𑣉𑣖 𑣇𑣞𑣁𑣓 , 𑣌𑣁𑣌𑣉 𑣔𑣈𑣀𑣋𑣁𑣖 𑣜𑣈𑣅𑣉𑣉. 𑣥𑣠- 𑢩𑣌𑣉𑣓 𑣌𑣁𑣖𑣂𑣜𑣈 𑣔𑣁𑣇𑣄 𑣗𑣁𑣓𑣉𑣄 𑣗𑣉𑣔𑣈𑣋𑣈 𑣜𑣂𑣌𑣁𑣅𑣖𑣈, 𑢩𑣌𑣉𑣓 𑣘𑣁𑣆𑣒𑣂𑣜𑣈 𑣔𑣁𑣇𑣄 𑣖𑣈𑣓𑣁𑣄, 𑣘𑣈𑣈𑣔𑣁𑣇 𑣗𑣂𑣏𑣁𑣜𑣈𑣖𑣈. 𑣥𑣡- 𑢩𑣌𑣉 𑣖𑣃𑣞𑣂𑣊𑣌𑣉 𑣖𑣁𑣓𑣁𑣖 𑣕𑣁𑣓𑣁 , 𑣁𑣖𑣁𑣄 𑣙𑣉𑣛𑣉𑣌𑣉 𑣈𑣞𑣃𑣋𑣈, 𑢮𑣁𑣁-𑣎𑣈𑣕𑣁𑣕𑣈 𑣁𑣚𑣉𑣖 𑣞𑣈𑣓𑣉𑣄, 𑣔𑣃𑣌𑣃𑣖 𑣓𑣁𑣖𑣈 𑣞𑣁𑣜𑣂𑣋𑣈 . 𑣥𑣢-𑢷𑣁𑣜𑣂𑣅𑣁 𑣕𑣂𑣂𑣕𑣈 𑣕𑣁𑣘𑣂𑣊𑣈 𑣈𑣓𑣁𑣊, 𑣗𑣃𑣋𑣂 𑣔𑣃𑣖𑣁𑣊 𑣝𑣁𑣛𑣂𑣅𑣁, 𑢬𑣉𑣛𑣁-𑣌𑣃𑣛𑣂 𑣏𑣉𑣚𑣉𑣓 𑣞𑣉𑣖𑣁𑣓, 𑣎𑣂𑣗𑣉𑣓-𑣎𑣃𑣛𑣂 𑣗𑣃𑣋𑣂𑣅𑣁. 𑣥𑣣- 𑢸𑣈𑣜𑣈𑣈𑣖 𑣌𑣁𑣌𑣉 𑣁𑣌𑣁𑣜𑣂𑣊𑣈, 𑣙𑣁𑣁𑣒𑣉-𑣗𑣁𑣎𑣁𑣜 𑣙𑣉𑣜𑣁 𑣜𑣈, 𑢴𑣃𑣚𑣁𑣛-𑣔𑣃𑣘𑣃𑣚𑣁𑣛 𑣕𑣈𑣋𑣈, 𑣓𑣁𑣖𑣉𑣄 𑣓𑣉𑣞𑣂𑣗𑣁𑣓 𑣜𑣈. 𑣥𑣤- 𑢩𑣌𑣉𑣅 𑣁𑣖𑣈𑣖 𑣙𑣂𑣚𑣁 𑣕𑣂𑣂𑣕𑣁𑣓, 𑣁𑣈 𑣅𑣉𑣉𑣋𑣈𑣄 𑣙𑣂𑣚𑣁 𑣕𑣈𑣖, 𑢱𑣉𑣗𑣈𑣜𑣈 𑣔𑣂𑣜𑣂𑣖 𑣕𑣈𑣜𑣈 𑣜𑣈𑣔𑣉, 𑣁𑣖𑣋𑣈 𑣘𑣁𑣞𑣂𑣜𑣉𑣄𑣁. 𑣥𑣥- 𑢸𑣃𑣜𑣁𑣄 𑣔𑣃𑣚𑣁𑣛𑣉 𑣙𑣉𑣓𑣌𑣉 𑣈𑣓𑣌𑣁, 𑣋𑣈𑣌𑣉 𑣌𑣁𑣜𑣁𑣗𑣉𑣄, 𑢸𑣃𑣜𑣁𑣄 𑣗𑣁𑣕𑣂𑣜𑣁𑣌𑣁𑣗 𑣚𑣁𑣓𑣒𑣈𑣓, 𑣏𑣂𑣌𑣁 𑣖𑣉𑣞𑣉𑣀𑣋𑣈𑣑𑣉𑣄. 𑣥𑣦- 𑢼𑣁𑣛𑣃𑣁 𑣁𑣜 𑣁𑣓𑣜𑣉𑣖 𑣙𑣉𑣛𑣉 𑣜𑣈, 𑣓𑣉𑣜𑣉𑣖 𑣌𑣉𑣋𑣈 𑣗𑣁𑣚𑣁𑣕𑣂𑣊, 𑢺𑣈𑣄 𑣖𑣁𑣐𑣁𑣊 𑣎𑣉𑣓𑣉𑣖 𑣜𑣈𑣅𑣉𑣉, 𑣔𑣁𑣒𑣁 𑣜𑣁𑣘𑣃𑣑 𑣖𑣁𑣐𑣁𑣊. 𑣥𑣧- 𑢫𑣃𑣃𑣓 𑣗𑣁𑣓𑣉𑣄 𑣌𑣉𑣋𑣈 𑣘𑣃𑣜𑣈𑣄, 𑣞𑣁𑣁𑣎𑣉 𑣞𑣂𑣀𑣋𑣁𑣜 𑣜𑣈𑣓𑣁, 𑢹𑣁𑣅𑣁𑣕𑣂𑣍 𑣏𑣁𑣌𑣁 𑣖𑣈𑣓𑣕𑣈𑣌𑣉, 𑣚𑣁𑣚𑣁𑣞𑣁𑣜𑣁𑣓𑣁. 𑣥𑣨- 𑢼𑣉𑣌𑣁 -𑣜𑣉𑣌𑣁 𑣙𑣉𑣅𑣉𑣋𑣁𑣖𑣁, 𑣜𑣉𑣌𑣁 𑣘𑣂𑣜𑣉𑣕𑣂𑣌𑣉, 𑢾𑣁𑣖𑣁𑣐𑣁𑣉𑣀 𑣋𑣈 𑣔𑣃𑣜𑣞𑣁𑣆, 𑣙𑣉𑣜𑣁𑣌𑣉 𑣁𑣕𑣉𑣖𑣁𑣌𑣉. 𑣥𑣩- 𑢹𑣉𑣛𑣉𑣔𑣉 𑣌𑣁𑣌𑣉 𑣗𑣉𑣜𑣉 𑣕𑣂𑣂𑣅𑣁, 𑣎𑣁𑣕𑣂𑣌𑣉 𑣗𑣉𑣜𑣉 𑣕𑣈𑣅𑣁, 𑢶𑣂𑣑𑣉𑣉 𑣘𑣁𑣒𑣁𑣐𑣁 𑣋𑣈𑣚𑣈𑣅𑣁 𑣙𑣂𑣀𑣔𑣃, 𑣏𑣂𑣌𑣁𑣌𑣉 𑣗𑣉𑣜𑣉 𑣕𑣂𑣅𑣁. 𑣦𑣠- 𑢨𑣒𑣁𑣄 𑣌𑣉𑣁𑣄 𑣌𑣃𑣆𑣌𑣉 𑣉𑣌𑣉𑣅, 𑣖𑣁𑣀𑣋𑣁𑣚 𑣎𑣉𑣖 𑣕𑣁𑣓𑣁, 𑢳𑣈𑣚 𑣎𑣉𑣖𑣘𑣈 𑣁𑣅𑣁𑣄 𑣌𑣃𑣆𑣌𑣉 , 𑣖𑣁𑣀𑣋𑣁𑣚 𑣆𑣏𑣂𑣓 𑣕𑣁𑣓𑣁. 𑣦𑣡- 𑢸𑣁𑣛𑣁𑣉-𑣞𑣈𑣐𑣁 𑣗𑣃𑣜𑣃 𑣌𑣈𑣓𑣈𑣖, 𑣗𑣁𑣀𑣔𑣂 𑣕𑣁𑣑 𑣜𑣈𑣅𑣉𑣉, 𑢷𑣈𑣋𑣁𑣜 𑣙𑣃𑣔𑣁 𑣌𑣁𑣖𑣂 𑣌𑣁𑣌𑣉, 𑣚𑣈𑣌𑣁𑣅 𑣗𑣃𑣓𑣃𑣖 𑣜𑣈𑣅𑣉𑣉. 𑣦𑣢- 𑢴𑣁𑣄 𑣘𑣉𑣛𑣉𑣖 𑣏𑣁𑣒𑣈𑣚𑣁 , 𑣕𑣁𑣚𑣁𑣜𑣈 𑣝𑣃𑣝𑣃𑣓 𑣕𑣁𑣓𑣁𑣖, 𑢾𑣁𑣗𑣈𑣌𑣉 𑣁𑣛𑣁𑣄 𑣗𑣁𑣋𑣈𑣖 𑣕𑣁𑣓𑣁, 𑣗𑣁𑣘𑣁𑣜𑣂 𑣞𑣈𑣐𑣁 𑣕𑣁𑣖. 𑣦𑣣- 𑢾𑣁𑣖𑣁𑣐𑣉𑣖 𑣔𑣉 𑣙𑣁𑣚𑣁𑣊𑣈𑣖, 𑣑𑣉𑣗𑣈𑣜𑣈 𑣖𑣈𑣓𑣁𑣄 𑣜𑣈𑣅𑣉𑣉, 𑢹𑣁𑣕𑣁𑣉 𑣎𑣉𑣖𑣖𑣈 𑣋𑣈𑣅𑣁𑣁𑣓, 𑣑𑣉𑣖𑣁𑣄 𑣖𑣉𑣏𑣁𑣅 𑣕𑣈𑣅𑣉𑣉, 𑣦𑣤- 𑢮𑣂𑣂𑣕𑣈 𑣖𑣈𑣓𑣈𑣓 𑣕𑣁𑣓𑣁𑣖 𑣁𑣍𑣁𑣄, 𑣞𑣈𑣐𑣁𑣋𑣈 𑣓𑣂𑣜𑣚𑣁 𑣕𑣁𑣓𑣁, 𑢯𑣂𑣌𑣁𑣕𑣈 𑣞𑣁𑣗𑣈𑣓 𑣎𑣃𑣃𑣋𑣃 𑣜𑣈𑣖, 𑣘𑣉𑣒𑣉𑣈 𑣆𑣏𑣂𑣅𑣁 𑣌𑣁𑣓𑣁? 𑣦𑣥- 𑢡𑣔𑣂𑣗𑣁𑣞𑣂 𑣁𑣍 𑣗𑣂𑣂𑣜 𑣎𑣁𑣕𑣂, 𑣈𑣝𑣃𑣖 𑣙𑣃𑣑𑣋𑣁𑣀 𑣌𑣈𑣑𑣁. 𑢯𑣂𑣌𑣁𑣕𑣈 𑣗𑣃𑣚𑣃𑣊 𑣗𑣁𑣀𑣔𑣈𑣚𑣁, 𑣖𑣈𑣍𑣎𑣉 𑣔𑣂𑣜𑣂𑣖 𑣗𑣁𑣋𑣈 𑣌𑣈𑣑𑣁 ? 𑣦𑣦- 𑢡𑣍𑣁𑣄 𑣔𑣉𑣜𑣉𑣖 𑣔𑣉𑣞𑣕𑣃𑣜 𑣋𑣈, 𑣖𑣈𑣓𑣈𑣖 𑣓𑣂𑣜𑣚𑣁 𑣕𑣁𑣓𑣁, 𑢾𑣉𑣔𑣉𑣜𑣂 𑣓𑣂𑣜-𑣘𑣁𑣘𑣁𑣛𑣃 𑣜𑣈, 𑣏𑣂𑣌𑣁𑣖 𑣏𑣁𑣓𑣁𑣗 𑣎𑣁𑣓𑣁 ? 𑣦𑣧- 𑢬𑣁𑣖 𑣗𑣉𑣔𑣉𑣚𑣈𑣜𑣈 𑣓𑣂𑣅𑣁𑣀𑣖 -𑣔𑣉𑣜𑣉𑣖, 𑣁𑣆𑣔𑣂-𑣌𑣁𑣆𑣔𑣂 𑣌𑣉, 𑢬𑣁𑣖 𑣓𑣈𑣚𑣁𑣖𑣉𑣄 𑣔𑣂𑣝𑣃𑣖 𑣕𑣁𑣚𑣁𑣜𑣈, 𑣓𑣈𑣚𑣈𑣖 𑣏𑣁𑣀𑣅𑣁𑣖𑣈𑣌𑣉. 𑣦𑣨- 𑢬𑣁𑣖 𑣕𑣉𑣚𑣌𑣉 𑣔𑣂𑣌𑣃 𑣗𑣉𑣀𑣋𑣁 𑣌𑣉, 𑣁𑣖𑣁𑣄 𑣗𑣉𑣀𑣋𑣁 𑣌𑣉𑣕𑣈, 𑢬𑣁𑣖 𑣕𑣉𑣚𑣌𑣉 𑣔𑣂𑣌𑣃-𑣎𑣁𑣕𑣂𑣌𑣉, 𑣁𑣖𑣁𑣄 𑣗𑣃𑣔𑣂 𑣌𑣉𑣕𑣈. 𑣦𑣩- 𑢳𑣈𑣚 𑣎𑣉𑣖𑣖𑣈 𑣗𑣈𑣈𑣔𑣈, 𑢫𑣂𑣕𑣁,𑢸𑣃𑣜𑣁𑣐𑣁,𑢽𑣁𑣞𑣕𑣉𑣜 𑣌𑣉, 𑢡𑣖𑣁𑣄 𑣗𑣉𑣀𑣋𑣁 𑣕𑣈𑣋𑣈 𑣏𑣂𑣌𑣁, 𑣙𑣁𑣜𑣁𑣉 𑣕𑣁𑣑 𑣖𑣈𑣅𑣁. 𑣧𑣠- 𑢮𑣂𑣕𑣂𑣌𑣁𑣜𑣈𑣖 𑣞𑣁𑣓𑣁𑣊 𑣜𑣈𑣔𑣉, 𑣔𑣂𑣌𑣃 𑣗𑣃𑣔𑣂𑣋𑣈 𑣞𑣁𑣗𑣖𑣈, 𑢮𑣉𑣓𑣉𑣖 𑣕𑣈𑣋𑣈 𑣎𑣁𑣓𑣃𑣖 𑣉𑣀𑣑𑣉𑣊, 𑣗𑣃𑣔𑣂𑣋𑣈 𑣇𑣛𑣃𑣄 𑣕𑣁𑣖𑣈. 𑣧𑣡- 𑢸𑣈𑣕𑣉𑣊 𑣁𑣜 𑣓𑣉𑣜𑣉𑣖 𑣙𑣉𑣛𑣉, 𑣎𑣃𑣓𑣃𑣛𑣂 𑣌𑣁𑣁 𑣗𑣁𑣚𑣁𑣕𑣂𑣊, 𑢬𑣁𑣔𑣁𑣚 𑣔𑣁𑣜𑣃 𑣁𑣜 𑣗𑣁𑣌𑣁𑣜𑣁, 𑣖𑣁𑣜𑣕𑣈 𑣋𑣁𑣘𑣁𑣕𑣂 𑣏𑣁𑣌𑣂𑣊. 𑣧𑣢- 𑢸𑣁𑣏𑣁𑣄 -𑣘𑣃𑣏𑣃𑣄 𑣘𑣁𑣆𑣒𑣂 𑣕𑣁𑣖, 𑣎𑣃𑣔𑣂𑣖 𑣓𑣁𑣚𑣁 𑣕𑣁𑣓𑣁, 𑢩𑣌𑣉𑣓 𑣓𑣁𑣚𑣁𑣖 𑣓𑣁𑣖𑣈 𑣈𑣓𑣁𑣉, 𑣁𑣈𑣕𑣈 𑣘𑣃𑣏𑣃𑣄 𑣏𑣁𑣗𑣁𑣓. 𑣧𑣣- 𑢬𑣃𑣀𑣗𑣃𑣃, 𑣚𑣁𑣀𑣔𑣁𑣜 𑣌𑣁𑣕𑣈 𑣙𑣉𑣉 𑣌𑣉, 𑣎𑣃𑣔𑣂𑣖 𑣁𑣞𑣃𑣚𑣌𑣉𑣁, 𑢨𑣓 𑣙𑣉𑣉𑣌𑣉 𑣏𑣂𑣕𑣂𑣗𑣂𑣕𑣂𑣅𑣁𑣄, 𑣞𑣁𑣖𑣁𑣖 𑣖𑣁𑣜𑣁𑣊 𑣌𑣉𑣁. 𑣧𑣤- 𑢹𑣉𑣓𑣁𑣄 𑣗𑣁𑣛𑣂𑣎 𑣌𑣁𑣖𑣂 𑣎𑣃𑣔𑣂𑣖, 𑣔𑣁𑣚𑣉𑣗-𑣕𑣉𑣘𑣁 𑣌𑣈𑣑𑣁, 𑢧𑣛𑣃𑣄 𑣕𑣁𑣖𑣈 𑣙𑣉𑣓 𑣚𑣁𑣋𑣂𑣑, 𑣌𑣉𑣏𑣁𑣜𑣈𑣖 𑣜𑣁𑣄 𑣌𑣈𑣑𑣁. 𑣧𑣥- 𑢷𑣈𑣎𑣁 𑣕𑣃𑣍𑣖𑣁 𑣌𑣁𑣖 𑣞𑣈𑣓𑣉𑣄, 𑣒𑣉𑣁𑣄 𑣌𑣂𑣑𑣂𑣄𑣖 𑣈𑣜𑣈𑣚𑣁, 𑢬𑣉𑣚𑣁𑣓 𑣔𑣂𑣝𑣃𑣖 𑣖𑣃𑣀𑣑𑣁 𑣌𑣉 𑣚𑣈𑣌𑣁, 𑣞𑣁𑣖𑣁𑣖 𑣑𑣈𑣑𑣚𑣁 -𑣖𑣈𑣑𑣚𑣁. 𑣧𑣦- 𑢺𑣉𑣑𑣚𑣉𑣑 𑣜𑣂𑣖𑣂𑣚 𑣏𑣂𑣚𑣌𑣁 , 𑣌𑣁𑣈 𑣋𑣁𑣖𑣁𑣅 𑣋𑣈𑣅𑣁, 𑢮𑣁𑣚𑣈𑣎𑣉𑣖𑣈 𑣎𑣁𑣋𑣁𑣜 𑣌𑣉𑣉, 𑣌𑣁𑣌𑣉 𑣈𑣖𑣉𑣄 𑣋𑣈𑣅𑣁. 𑣧𑣧- 𑢾𑣁𑣗𑣈𑣓 𑣒𑣁𑣌𑣁 𑣁𑣚𑣉𑣖 𑣈𑣖 𑣏𑣁𑣗𑣁𑣅, 𑣌𑣃𑣛𑣂 𑣕𑣂𑣛𑣂 𑣜𑣈, 𑢷𑣁𑣓𑣕𑣈𑣜𑣈 𑣔𑣉𑣖 𑣜𑣁𑣄𑣅 𑣋𑣈𑣅𑣁, 𑣖𑣃𑣕𑣂𑣑 𑣏𑣁𑣀𑣑𑣁𑣊 𑣜𑣈. 𑣧𑣨- 𑢷𑣁𑣜𑣞𑣂𑣊𑣁𑣄 𑣎𑣉𑣓𑣉𑣖-𑣎𑣂𑣗𑣉𑣓, 𑣁𑣚𑣉𑣖 𑣞𑣁𑣜𑣔𑣂 𑣈𑣛𑣁𑣄𑣅𑣁, 𑢹𑣁𑣁𑣒 - 𑣔𑣁𑣄𑣁 𑣏𑣉𑣌𑣈 𑣗𑣁𑣗𑣃, 𑣌𑣁𑣈 𑣜𑣁𑣄 𑣘𑣃𑣜𑣁𑣅𑣁. 𑣧𑣩- 𑢴𑣃𑣗𑣁𑣌𑣁𑣓𑣕𑣈 𑣌𑣁𑣖𑣂𑣖 𑣇𑣛𑣃, 𑣖𑣃𑣀𑣑𑣂 𑣋𑣈 𑣌𑣁𑣖 𑣓𑣁𑣖𑣈, 𑢸𑣁𑣆𑣒𑣂 𑣆𑣑𑣈𑣖 𑣇𑣛𑣃𑣄 𑣆𑣑𑣈𑣖, 𑣞𑣉𑣊𑣀𑣋𑣈 𑣗𑣃𑣔𑣂𑣖 𑣓𑣁𑣖𑣈. 𑣨𑣠- 𑢹𑣂𑣞𑣁𑣗 𑣌𑣁𑣌𑣉 𑣁𑣞𑣂𑣖 𑣙𑣁𑣋𑣁, 𑣏𑣂𑣖𑣂𑣓𑣈𑣖 𑣗𑣁𑣀𑣔𑣂 𑣕𑣁𑣑𑣁, 𑢹𑣂𑣞𑣁𑣗𑣈𑣅𑣁𑣌𑣉 𑣁𑣌𑣉𑣚𑣁𑣋𑣂𑣑, 𑣏𑣂𑣖𑣂𑣓𑣈𑣖 𑣌𑣁𑣖𑣂 𑣕𑣁𑣑𑣁. 𑣨𑣡- 𑢯𑣈𑣐𑣈-𑣏𑣈𑣘𑣉𑣜𑣉𑣑 ,𑣖𑣃𑣆𑣄 𑣙𑣁𑣕𑣂, 𑣞𑣁𑣗𑣈𑣌𑣉 𑣁𑣌𑣞𑣉𑣖𑣁𑣓, 𑢩𑣌𑣉 𑣖𑣃𑣞𑣂𑣊𑣈𑣖 𑣇𑣜𑣃𑣖𑣈 𑣓𑣈𑣓𑣁, 𑣞𑣁𑣜𑣂𑣕𑣈𑣖 𑣖𑣈𑣑𑣈𑣅𑣁𑣓. 𑣨𑣢- 𑢴𑣃𑣌𑣃𑣜𑣈 𑣁𑣚𑣉𑣖 𑣌𑣁𑣕𑣉 𑣜𑣈𑣓 𑣞𑣃𑣌𑣃𑣜𑣈 𑣁𑣚𑣉𑣖 𑣌𑣁𑣕𑣉𑣜𑣈𑣓, 𑢶𑣁𑣜𑣁𑣊 -𑣋𑣁𑣛𑣁 𑣚𑣈𑣌𑣁 𑣞𑣈𑣓𑣈𑣖, 𑣗𑣁𑣑𑣈𑣖 𑣎𑣂𑣕𑣂𑣌𑣁𑣜𑣈𑣓. 𑣨𑣣- 𑢳𑣉𑣜𑣉𑣖 𑣙𑣉𑣛𑣉 𑣋𑣈 𑣞𑣈𑣓 𑣘𑣃𑣜𑣁𑣅𑣁, 𑣎𑣂𑣗𑣉𑣓-𑣎𑣂𑣚𑣂𑣊 𑣙𑣉𑣜𑣁, 𑢹𑣁𑣁𑣙𑣃𑣃 𑣙𑣉𑣜𑣚𑣉𑣞𑣂 𑣔𑣉 , 𑣁𑣑𑣉𑣄 𑣕𑣁𑣚𑣁 𑣙𑣉𑣜𑣁. 𑣨𑣤- 𑢮𑣉𑣉𑣕𑣈 𑣔𑣁𑣜𑣃 𑣎𑣉𑣘𑣉𑣑𑣈𑣓, 𑣋𑣃𑣓𑣂 𑣙𑣉𑣛𑣉 𑣋𑣈 𑣓𑣉𑣜𑣉𑣖𑣈𑣓, 𑢾𑣁𑣀𑣑𑣂 𑣔𑣁𑣜𑣃 𑣁𑣜 𑣖𑣃𑣜𑣃𑣌𑣃𑣖𑣁, 𑣞𑣁𑣖𑣁𑣌𑣉 𑣞𑣉𑣍-𑣞𑣉𑣍𑣈𑣓... 𑣨𑣥- 𑢵𑣁𑣚𑣁 𑣕𑣃𑣖𑣂𑣊 𑣏𑣈𑣌𑣉𑣚- 𑣏𑣈𑣌𑣉𑣚, 𑣞𑣁𑣖𑣁𑣐𑣁𑣉 𑣋𑣈 𑣔𑣃𑣜𑣞𑣁𑣆, 𑢡𑣔𑣁-𑣘𑣁𑣒𑣃𑣁 𑣘𑣁𑣞𑣂𑣜 𑣌𑣁𑣎𑣂, 𑣈𑣅𑣁𑣋𑣈 𑣌𑣁𑣖 𑣔𑣁𑣆. 𑣨𑣦- 𑢫𑣉𑣉𑣀𑣔𑣈 𑣋𑣃𑣜𑣃 𑣋𑣈 𑣋𑣈𑣅𑣁𑣓 𑣈𑣖𑣈, 𑣘𑣁𑣔𑣁𑣅 𑣋𑣃𑣀𑣑𑣂 𑣋𑣈 𑣞𑣁𑣊𑣈, 𑢹𑣁𑣁𑣑 𑣜𑣈𑣈𑣑 𑣕𑣈𑣋𑣈 𑣗𑣃𑣃𑣋𑣂𑣓, 𑣗𑣃𑣋𑣂𑣕𑣈 𑣇𑣛𑣃𑣄 𑣕𑣁𑣖𑣈. 𑣨𑣧- 𑢼𑣃𑣃𑣘𑣃 𑣓𑣈𑣚 𑣕𑣈 𑣏𑣈𑣜𑣈𑣗 𑣖𑣈𑣌𑣉, 𑣖𑣃𑣞𑣂𑣊-𑣗𑣁𑣜𑣞𑣂𑣊 𑣋𑣈, 𑢫𑣃𑣃𑣓 𑣓𑣈𑣚𑣕𑣈 𑣏𑣈𑣜𑣈𑣗 𑣖𑣈𑣌𑣉, 𑣎𑣂𑣗𑣉𑣓 𑣎𑣁𑣌𑣈. 𑣨𑣨- 𑢩𑣌𑣉𑣅 𑣈𑣝𑣃 𑣔𑣃𑣚𑣁𑣛𑣉 𑣖𑣈𑣕𑣁𑣓, 𑣁𑣚𑣉𑣖 𑣇𑣔𑣃𑣜-𑣈𑣛𑣁𑣄𑣆𑣅𑣁, 𑢸𑣉𑣏𑣁 𑣌𑣂𑣂𑣜𑣈 𑣈𑣓 𑣎𑣃𑣛𑣂𑣖, 𑣞𑣁𑣗𑣈𑣓 𑣔𑣂𑣓𑣈𑣖 𑣜𑣁𑣄𑣅𑣁. 𑣨𑣩- 𑢷𑣃𑣋𑣂-𑣗𑣁𑣛𑣂𑣎 𑣁𑣔𑣁𑣅-𑣁𑣔𑣁𑣅, 𑣙𑣉𑣛𑣉 𑣌𑣉 𑣏𑣂𑣛𑣁-𑣗𑣂𑣛𑣁 𑣕𑣁𑣓, 𑢳𑣉𑣞𑣂𑣗 𑣁𑣜 𑣞𑣁𑣀𑣎𑣉𑣌𑣉 𑣋𑣈, 𑣇𑣌𑣃𑣕𑣈 𑣁𑣏𑣃𑣌𑣉 𑣕𑣁𑣓. 𑣩𑣠- 𑢩𑣌𑣉𑣓 𑣙𑣉𑣉 𑣈𑣀𑣋𑣁 -𑣁𑣘𑣃 𑣚𑣉𑣄, 𑣘𑣃𑣜𑣁𑣄 𑣌𑣁𑣈 𑣎𑣁𑣋𑣁𑣜𑣁, 𑢨𑣓 𑣙𑣉𑣉𑣜𑣈 𑣘𑣃𑣜𑣁𑣄 𑣕𑣈𑣔𑣉, 𑣁𑣚𑣉𑣖 𑣕𑣁𑣆𑣓 𑣁𑣝𑣁. 𑣩𑣡- 𑢬𑣁𑣖𑣂𑣔𑣉 𑣗𑣁𑣓𑣉, 𑣗𑣁𑣌𑣁𑣀 𑣕𑣈𑣋𑣈,𑣙𑣃𑣔𑣁𑣖 𑣝𑣃𑣞𑣁𑣜 𑣜𑣈𑣔𑣉, 𑢶𑣁𑣀𑣑𑣂 𑣔𑣉 𑣗𑣁𑣓𑣉 𑣖𑣉𑣓𑣕𑣉𑣜 𑣕𑣈, 𑣚𑣁𑣁𑣆 𑣗𑣂𑣂𑣓 𑣖𑣈𑣕𑣉. 𑣩𑣢- 𑢨𑣝𑣃 𑣚𑣁𑣚𑣂𑣖 𑣈𑣖𑣉𑣄 𑣜𑣈𑣅𑣉𑣉, 𑣖𑣉𑣏𑣁𑣋𑣈 𑣎𑣃𑣔𑣂 𑣖𑣈𑣈𑣜𑣁, 𑢮𑣉𑣖 𑣌𑣈𑣓𑣌𑣉 𑣖𑣈𑣕𑣁𑣖 𑣁𑣕𑣉𑣖, 𑣎𑣁𑣓 𑣜𑣈 𑣈𑣝𑣃𑣖 𑣌𑣁𑣜𑣁𑣗𑣁. 𑣩𑣣- 𑢨𑣞𑣃 𑣌𑣉𑣉𑣖𑣈𑣖 𑣈𑣖𑣉𑣄 𑣜𑣈𑣅𑣉𑣉, 𑣖𑣉𑣏𑣁𑣋𑣈 𑣎𑣃𑣔𑣂 𑣞𑣂𑣗𑣂𑣚𑣁, 𑢮𑣉𑣖 𑣌𑣈𑣓𑣌𑣉 𑣖𑣈𑣕𑣁𑣖 𑣁𑣕𑣉𑣖, 𑣎𑣁𑣓 𑣜𑣈 𑣈𑣝𑣃𑣖 𑣗𑣃𑣋𑣂𑣓. 𑣩𑣤- 𑢾𑣈𑣐𑣁 𑣌𑣁𑣎𑣂 𑣌𑣉 𑣌𑣁𑣎𑣂𑣅𑣁𑣆𑣜𑣈, 𑣉𑣌𑣉𑣅 𑣌𑣃𑣜𑣌𑣃𑣜𑣈𑣓, 𑢶𑣁𑣐𑣈-𑣖𑣁𑣐𑣈 𑣕𑣈 𑣁𑣈𑣚𑣁𑣋𑣂𑣑, 𑣔𑣃𑣌𑣃 𑣋𑣈 𑣞𑣁𑣜𑣁𑣆 𑣙𑣃𑣀𑣑𑣂𑣓. 𑣩𑣥- 𑢶𑣂𑣅𑣁𑣀𑣑 -𑣖𑣂𑣅𑣁𑣀𑣑𑣕𑣈 𑣏𑣂𑣜𑣋𑣁𑣚𑣉𑣄, 𑣆𑣞𑣂𑣓𑣁 𑣌𑣁𑣓 𑣏𑣂 𑣗𑣁𑣓𑣉, 𑢶𑣂𑣅𑣁𑣀𑣑 𑣌𑣁𑣎𑣂𑣕𑣈 𑣏𑣂𑣜𑣋𑣁𑣚𑣉𑣄, 𑣗𑣃𑣋𑣂𑣓 𑣙𑣉𑣛𑣉 𑣏𑣂 𑣗𑣁𑣓𑣉. 𑣩𑣦- 𑢦𑣚𑣂,𑢡𑣜𑣌𑣂 𑣇𑣘𑣃𑣑 𑣎𑣁𑣓𑣜𑣈, 𑣉𑣛𑣁𑣄 𑣜𑣈𑣋𑣈 𑣞𑣉𑣛𑣁𑣓, 𑢸𑣂𑣜𑣘𑣕𑣂-𑣆𑣚𑣂 𑣇𑣘𑣃𑣑 𑣎𑣁𑣓𑣜𑣈, 𑣔𑣂𑣝𑣃𑣖 𑣋𑣉𑣒𑣁 𑣞𑣉𑣛𑣁𑣓. 𑣩𑣧- 𑢳𑣃𑣀 𑣚𑣈𑣈𑣜𑣈 𑣗𑣃𑣃𑣚𑣁, 𑣆𑣚𑣂,𑣁𑣜𑣌𑣂,𑣑𑣂𑣅𑣁𑣊, 𑢳𑣈𑣚 𑣌𑣈𑣈 𑣜𑣈𑣋𑣈 𑣗𑣃𑣃𑣚𑣁, 𑣘𑣂𑣜𑣉𑣕𑣂-𑣆𑣚𑣂 𑣔𑣈𑣜𑣁𑣊. 𑣩𑣨- 𑢮𑣂𑣗𑣉𑣓 𑣖𑣂𑣅𑣁𑣀𑣑 𑣔𑣃𑣜𑣁𑣊, 𑣁𑣊𑣕𑣉𑣜𑣞𑣁 𑣔𑣃𑣜𑣁𑣊𑣈𑣖, 𑢮𑣁𑣜𑣖𑣁 𑣖𑣂𑣅𑣁𑣀𑣑 𑣆𑣚𑣂, 𑣇𑣘𑣃𑣑 𑣕𑣉𑣜𑣞𑣁 𑣏𑣈𑣜𑣈𑣗𑣈𑣖. 𑣩𑣩- 𑢫𑣃𑣚𑣁𑣗 𑣗𑣁𑣛𑣁 𑣎𑣃𑣀𑣋𑣃𑣑-𑣎𑣃𑣀𑣋𑣃𑣑, 𑣖𑣈𑣓𑣔𑣉 𑣎𑣁𑣓𑣃𑣖𑣁𑣓𑣁, 𑢾𑣃𑣌𑣃 𑣞𑣁𑣀𑣋𑣈𑣜𑣈 𑣔𑣃𑣌𑣃 𑣖𑣈𑣓𑣁𑣄, 𑣓𑣈𑣅𑣁𑣀𑣔𑣉 𑣞𑣁𑣜𑣂 𑣕𑣁𑣓𑣁. 𑣡𑣠𑣠- 𑢾𑣁𑣗𑣈𑣓 𑣗𑣁𑣛𑣁 𑣋𑣉𑣞𑣉𑣓 𑣗𑣉𑣔𑣈, 𑣞𑣁𑣜𑣎𑣉𑣖 𑣔𑣉 𑣗𑣁𑣓𑣉, 𑢾𑣁𑣌𑣁𑣁𑣜𑣂-𑣘𑣂𑣜𑣉𑣕𑣂 𑣞𑣂𑣑𑣈𑣓 𑣗𑣉𑣔𑣈, 𑣘𑣃𑣅𑣃𑣜𑣁𑣄 𑣔𑣉 𑣗𑣁𑣓𑣉. 𑣡𑣠𑣡- 𑢷𑣁𑣛𑣂𑣎𑣁𑣄𑣉 𑣗𑣁𑣛𑣂𑣎 𑣕𑣁𑣓𑣁, 𑣓𑣉𑣞𑣂𑣗 𑣗𑣁𑣛𑣂𑣎 𑣜𑣈𑣔𑣁, 𑢷𑣁𑣛𑣂𑣎𑣁𑣄𑣉 𑣗𑣃𑣋𑣂 𑣓𑣈𑣓𑣁, 𑣓𑣉𑣞𑣂𑣗 𑣗𑣃𑣋𑣂𑣓 𑣜𑣈𑣔𑣁, 𑣡𑣠𑣢- 𑢸𑣁𑣁𑣘𑣉 𑣙𑣉𑣀 𑣘𑣃𑣅𑣃𑣜 𑣕𑣁𑣓𑣁, 𑣞𑣁𑣗𑣈𑣌𑣉 𑣖𑣈𑣓𑣈 𑣜𑣈𑣔𑣉, 𑢸𑣃𑣅𑣃𑣜 𑣙𑣉𑣀 𑣘𑣁𑣁𑣘𑣉 𑣕𑣁𑣓𑣁, 𑣞𑣁𑣗𑣈𑣌𑣉 𑣈𑣌𑣁𑣅 𑣜𑣈𑣔𑣉. 𑣡𑣠𑣣- 𑢸𑣂𑣜𑣉𑣕𑣂 𑣌𑣁𑣐𑣁- 𑣞𑣁𑣔𑣉𑣖 𑣕𑣁𑣓𑣁, 𑣞𑣁𑣋𑣁𑣆 𑣌𑣁𑣈 𑣇𑣜𑣃𑣖𑣈, 𑢴𑣉𑣛𑣁 𑣌𑣉𑣜𑣈𑣄 𑣕𑣁𑣗𑣁𑣄 𑣖𑣈𑣅𑣁, 𑣉𑣜 𑣉𑣜𑣂𑣂 𑣖𑣈. 𑣡𑣠𑣤- 𑢮𑣉𑣓𑣉𑣖 𑣈𑣀𑣋𑣁-𑣁𑣘𑣃𑣌𑣂𑣊, 𑣉𑣌𑣉𑣅 𑣈𑣌𑣁 𑣌𑣂𑣊𑣁, 𑢴𑣂𑣝𑣃𑣖 𑣋𑣉𑣒𑣁 𑣌𑣃𑣆𑣑 𑣚𑣈𑣌𑣁 𑣞𑣁𑣖𑣁𑣈 𑣎𑣁𑣚𑣁𑣕𑣂𑣊𑣁. 𑣡𑣠𑣥- 𑢾𑣉𑣕𑣉-𑣔𑣉𑣜𑣉𑣖 𑣙𑣉𑣜𑣁 𑣕𑣈𑣋𑣈, 𑣎𑣃𑣔𑣂𑣖 𑣞𑣈𑣓𑣁 𑣌𑣁𑣑𑣁, 𑢳𑣈𑣚 𑣌𑣉𑣖𑣈 𑣖𑣃𑣞𑣂𑣊 𑣞𑣁𑣗𑣈𑣓, 𑣁𑣖𑣌𑣉 𑣉𑣕𑣉𑣊 𑣕𑣁𑣑𑣁. 𑣡𑣠𑣦-𑢼𑣁𑣁𑣀𑣞𑣁 𑣕𑣈𑣋𑣈 𑣓𑣁𑣖𑣉𑣄 𑣜𑣈𑣔𑣉, 𑣖𑣈𑣓𑣈𑣖 𑣕𑣉𑣁 𑣕𑣁𑣓𑣁, 𑢩𑣌𑣉𑣓𑣁 𑣚𑣁𑣋𑣂𑣑 𑣜𑣈𑣄-𑣜𑣈𑣘𑣈𑣄, 𑣈𑣓𑣁𑣔𑣉 𑣖𑣁𑣅𑣁𑣖 𑣕𑣁𑣓𑣁. 𑣡𑣠𑣧- 𑢨𑣜𑣁,𑣉𑣕𑣈 𑣁𑣜 𑣓𑣉𑣌𑣉𑣜𑣂, 𑣓𑣉𑣞𑣂𑣗 𑣕𑣈𑣋𑣈 𑣓𑣁𑣖𑣉𑣄, 𑢵𑣂𑣛𑣂𑣅𑣁𑣅𑣕𑣈 𑣘𑣉𑣏𑣁𑣓 𑣋𑣈𑣅𑣁, 𑣎𑣃𑣔𑣂 𑣓𑣉𑣞𑣂𑣗 𑣗𑣁𑣓𑣉𑣄. 𑣡𑣠𑣨- 𑢳𑣈𑣚𑣉𑣄 𑣕𑣁𑣓 𑣗𑣂𑣕𑣂𑣌𑣉 𑣞𑣁𑣗𑣈𑣓 , 𑣇𑣛𑣂-𑣉𑣛𑣉𑣊 𑣋𑣉𑣓𑣉𑣊𑣁, 𑢨𑣓𑣁 𑣖𑣈𑣓𑣕𑣈𑣌𑣉 𑣖𑣈𑣓𑣈 𑣗𑣂𑣔𑣃𑣁, 𑣁𑣝𑣁𑣛𑣁 𑣋𑣉𑣓𑣉𑣊𑣁𑣓𑣁. 𑣡𑣠𑣩- 𑢸𑣃𑣜𑣁𑣄 𑣏𑣃𑣕𑣃𑣜 𑣙𑣉𑣛𑣌𑣉 𑣘𑣃𑣜𑣁𑣄, 𑣔𑣃𑣌𑣃𑣔𑣉 𑣓𑣁𑣖𑣈 𑣕𑣁𑣓𑣁, 𑢾𑣈𑣐𑣁-𑣎𑣉𑣉𑣊 𑣞𑣂𑣕𑣃𑣜𑣃𑣓 𑣌𑣉𑣋𑣈 𑣔𑣃𑣌𑣃𑣔𑣉 𑣓𑣁𑣖𑣈 𑣕𑣁𑣓𑣁. 𑣡𑣡𑣠- 𑢾𑣂𑣜𑣎𑣉𑣓 𑣖𑣂𑣅𑣁𑣀𑣑 𑣙𑣂𑣐𑣂-𑣘𑣃𑣌𑣁𑣑, 𑣞𑣁𑣜𑣂𑣅𑣉𑣉 𑣏𑣁𑣌𑣁𑣑𑣈𑣓𑣁, 𑢨𑣊𑣋𑣁 𑣞𑣂𑣖 𑣏𑣂𑣌𑣁 𑣙𑣉𑣓𑣌𑣉 𑣋𑣈𑣅𑣁, 𑣞𑣃𑣔𑣁 𑣓𑣂𑣜𑣌𑣉 𑣕𑣁𑣓𑣁. 𑣡𑣡𑣡- 𑢴𑣉𑣜𑣉𑣖 𑣌𑣁𑣖𑣂𑣜𑣈 𑣚𑣁𑣚𑣂, 𑣓𑣁𑣖𑣈 𑣜𑣈𑣅𑣉𑣖 𑣔𑣃𑣌𑣃, 𑢡𑣚𑣉𑣖 𑣇𑣞𑣁𑣓 𑣖𑣁𑣐𑣈 -𑣖𑣁𑣐𑣈 𑣕𑣈, 𑣔𑣃𑣌𑣃 𑣋𑣈 𑣗𑣁𑣆𑣓 𑣞𑣃𑣌𑣃. 𑣡𑣡𑣢- 𑢴𑣃𑣌𑣃𑣖 𑣘𑣁𑣜𑣉𑣖 𑣌𑣈𑣈𑣜𑣈, 𑣘𑣁𑣜𑣉𑣖 𑣌𑣂𑣓𑣂𑣄 𑣕𑣈𑣋𑣁𑣆 𑣜𑣈𑣖, 𑢾𑣈𑣌𑣁𑣛𑣁 𑣋𑣈 𑣘𑣁𑣁𑣘𑣉 𑣕𑣈𑣋𑣁𑣖, 𑣉𑣌𑣉𑣅 𑣌𑣁𑣌𑣉 𑣇𑣒𑣁𑣖. 𑣡𑣡𑣣- 𑢾𑣈𑣐𑣁𑣕𑣈 𑣞𑣂𑣀𑣋𑣁𑣜 𑣎𑣁𑣓𑣜𑣈 𑣎𑣃𑣔𑣂, 𑣋𑣃𑣜𑣃𑣖 𑣈𑣌𑣁 𑣌𑣂𑣎𑣁, 𑢴𑣂𑣝𑣃𑣖 𑣋𑣉𑣒𑣁 𑣋𑣈𑣅𑣁𑣓 𑣘𑣂𑣒𑣂, 𑣞𑣁𑣖𑣁𑣖 𑣋𑣉𑣄 𑣌𑣈𑣑𑣁. 𑣡𑣡𑣤- 𑢫𑣃𑣜𑣃-𑣎𑣂𑣗𑣉𑣓 𑣎𑣃𑣔𑣂 𑣁𑣖𑣈𑣖, 𑣔𑣃𑣌𑣃 𑣆𑣏𑣂 𑣌𑣈𑣑𑣁, 𑢮𑣂𑣗𑣉𑣓 𑣕𑣁𑣖 𑣎𑣃𑣛𑣃𑣜 𑣋𑣈𑣖, 𑣏𑣂𑣕𑣂 𑣗𑣂𑣕𑣂 𑣌𑣈𑣑𑣁. 𑣡𑣡𑣥- 𑢨𑣀𑣋𑣁-𑣁𑣘𑣃𑣁𑣄 𑣌𑣃𑣛𑣁𑣖, 𑣎𑣃𑣔𑣂𑣖 𑣜𑣈𑣅𑣁𑣛𑣁 𑣌𑣈𑣑𑣁, 𑢮𑣂𑣗𑣉𑣓 𑣜𑣈𑣅𑣁𑣄 𑣞𑣁𑣓𑣁𑣊 𑣌𑣉, 𑣞𑣁𑣗𑣈𑣖 𑣘𑣃𑣜𑣁 𑣌𑣈𑣑𑣁. 𑣡𑣡𑣦- 𑢨𑣊𑣋𑣁 -𑣙𑣁𑣅𑣁𑣖 𑣎𑣃𑣔𑣂𑣖 , 𑣈𑣌𑣁-𑣚𑣈𑣌𑣁 𑣌𑣈𑣑𑣁, 𑢳𑣈𑣚𑣈𑣖 𑣔𑣂𑣝𑣃𑣖 𑣙𑣉𑣛𑣉𑣌𑣉, 𑣁𑣖 𑣋𑣈𑣌𑣉 𑣈𑣌𑣁 𑣌𑣈𑣑𑣁. 𑣡𑣡𑣧- 𑢹𑣁𑣋𑣁 -𑣌𑣃𑣝𑣃𑣜 𑣎𑣃𑣔𑣂, 𑣌𑣁𑣋𑣈𑣖 𑣖𑣃𑣏𑣁𑣑 𑣌𑣈𑣑𑣁, 𑢨𑣓𑣜𑣈𑣔𑣉 𑣁𑣖𑣁𑣄 𑣎𑣁𑣕𑣂 , 𑣁𑣖𑣋𑣈 𑣖𑣃𑣏𑣁𑣑 𑣌𑣈𑣑𑣁. 𑣡𑣡𑣨- 𑢮𑣃𑣔𑣂 𑣁𑣖𑣁𑣄 𑣜𑣈𑣏𑣁𑣜𑣈 𑣖𑣂𑣞𑣂𑣖, 𑣖𑣈𑣑𑣔𑣁𑣄𑣁 𑣎𑣉𑣜𑣉 𑣌𑣈𑣑𑣁, 𑢧𑣛𑣃𑣄 𑣕𑣁𑣖𑣈 𑣎𑣂𑣗𑣉𑣓 𑣜𑣈𑣅𑣁𑣄, 𑣞𑣃𑣌𑣃𑣖 𑣏𑣁𑣗𑣁 𑣌𑣈𑣑𑣁. 𑣡𑣡𑣩- 𑢶𑣉𑣓𑣈 𑣗𑣃𑣋𑣂𑣓 𑣜𑣈𑣅𑣉𑣉, 𑣌𑣁𑣖𑣂-𑣌𑣁𑣆𑣔𑣂 𑣗𑣁𑣛𑣂𑣎 𑣜𑣈𑣔𑣉, 𑢬𑣁𑣋𑣈 𑣗𑣁𑣆𑣓 𑣏𑣁𑣒𑣃 𑣏𑣃𑣆𑣚𑣁, 𑣌𑣃𑣜𑣌𑣃𑣜 𑣕𑣁𑣖 𑣕𑣈𑣔𑣉. 𑣡𑣢𑣠- 𑢮𑣂𑣂𑣋𑣈 𑣜𑣈𑣅𑣁𑣛𑣁 𑣚𑣁𑣋𑣂𑣑, 𑣈𑣒𑣁𑣄 𑣎𑣂𑣂𑣖 𑣙𑣁𑣞𑣂𑣑 𑣜𑣈𑣔𑣉, 𑢬𑣁𑣋𑣈𑣖 𑣓𑣁𑣖𑣈 𑣎𑣂𑣗𑣉𑣓 𑣞𑣃𑣌𑣃, 𑣖𑣁𑣅𑣉𑣖 𑣔𑣁𑣐𑣈 𑣕𑣈𑣔𑣉. 𑣡𑣢𑣡- 𑢴𑣂𑣝𑣃𑣖 𑣚𑣁𑣋𑣂𑣑 𑣔𑣁𑣐𑣈𑣓 𑣓𑣂𑣄, 𑣞𑣁𑣗𑣈𑣌𑣉 𑣎𑣉𑣁𑣜𑣁𑣆𑣕𑣁𑣓, 𑢨𑣒𑣁𑣄 𑣌𑣉𑣋𑣈 𑣔𑣁𑣐𑣈 𑣓𑣂𑣄 𑣔𑣉, 𑣞𑣁𑣗𑣈𑣌𑣉 𑣕𑣈𑣋𑣁𑣆𑣕𑣁𑣓. 𑣡𑣢𑣢- 𑢸𑣁𑣁𑣘𑣉 𑣙𑣉𑣀 𑣔𑣉𑣜𑣉𑣖 𑣕𑣁𑣓𑣁, 𑣌𑣈𑣛𑣈𑣄 𑣜𑣈𑣔𑣉 𑣞𑣃𑣌𑣃, 𑢶𑣈𑣓𑣔𑣉 𑣓𑣁𑣖𑣉𑣄 𑣗𑣁𑣜𑣞𑣂𑣊 𑣋𑣈, 𑣎𑣉𑣗𑣉𑣜𑣂- 𑣘𑣉𑣒𑣉𑣈 𑣞𑣃𑣌𑣃. 𑣡𑣢𑣣- 𑢾𑣁𑣜𑣂 𑣌𑣁𑣎𑣂 𑣔𑣉 𑣌𑣁𑣖 𑣕𑣉𑣘𑣁𑣅𑣁, 𑣑𑣃𑣚𑣌𑣂 𑣜𑣃𑣃𑣕𑣈, 𑢬𑣁𑣖 𑣘𑣉𑣏𑣁𑣓 𑣘𑣁𑣁𑣘𑣉𑣅𑣕𑣈, 𑣌𑣉𑣏𑣁𑣜𑣈 𑣇𑣌𑣃 -𑣇𑣌𑣃𑣕𑣈. 𑣡𑣢𑣤- 𑢾𑣁𑣗𑣈𑣌𑣉 𑣞𑣁𑣓𑣁𑣊 𑣜𑣁𑣎𑣁𑣓 𑣖𑣈𑣓𑣔𑣉, 𑣈𑣓𑣂𑣀 𑣈𑣓𑣁𑣊 𑣜𑣁𑣎𑣁𑣓, 𑢩𑣌𑣉𑣅 𑣖𑣉𑣚𑣉𑣊 𑣜𑣈𑣋𑣈 𑣜𑣁𑣎𑣁𑣓, 𑣌𑣁𑣏𑣂 𑣉𑣚𑣁 𑣌𑣁𑣓. 𑣡𑣢𑣥- 𑢾𑣁𑣗𑣈𑣓 𑣌𑣁𑣖𑣂𑣌𑣉 𑣘𑣉𑣌𑣕𑣁𑣓𑣁, 𑣁𑣝𑣁𑣛𑣁 𑣞𑣈𑣒𑣈𑣜 𑣈𑣓𑣁𑣊, 𑢮𑣁𑣁 𑣏𑣂𑣖𑣂𑣓 𑣔𑣁𑣄𑣖𑣔𑣃𑣚𑣈, 𑣗𑣁𑣁𑣓 𑣘𑣁𑣋𑣃𑣓 𑣈𑣓𑣁𑣊. 𑣡𑣢𑣦- 𑢾𑣈𑣗𑣁-𑣝𑣁𑣞𑣁𑣜 𑣕𑣈𑣋𑣈𑣓 𑣓𑣉𑣞𑣂𑣗, 𑣌𑣁𑣋𑣜𑣖 𑣗𑣉𑣔𑣉𑣚𑣈𑣅𑣁, 𑢵𑣁𑣅𑣁𑣜 𑣓𑣉𑣄𑣋𑣉𑣑 𑣈𑣓 𑣙𑣁𑣞𑣁𑣜𑣈, 𑣌𑣁𑣜𑣚𑣁 𑣖𑣈𑣈𑣜 𑣋𑣈𑣅𑣁. 𑣡𑣢𑣧- 𑢴𑣃𑣗𑣂𑣕𑣁𑣞𑣁𑣑 𑣞𑣁𑣗𑣈𑣌𑣉 𑣕𑣈𑣋𑣁𑣅𑣁, 𑣏𑣂𑣜𑣃 𑣌𑣁𑣌𑣉 𑣗𑣉𑣜𑣉𑣕𑣈, 𑢴𑣃𑣄𑣓 𑣚𑣁𑣋𑣂𑣑 𑣞𑣂𑣀𑣋𑣁𑣜𑣈𑣓𑣖𑣈, 𑣋𑣈𑣅𑣁𑣓 𑣏𑣂𑣅𑣁𑣓 𑣏𑣂𑣜𑣃 𑣕𑣈. 𑣡𑣢𑣨- 𑢴𑣃𑣌𑣃 𑣞𑣉𑣖𑣁𑣅 𑣜𑣈𑣅𑣁𑣄 𑣏𑣈𑣓𑣒𑣁, 𑣞𑣁𑣗𑣈𑣓 𑣞𑣁𑣁𑣕𑣂𑣊𑣈𑣖𑣈, 𑢴𑣃𑣌𑣃 𑣞𑣉𑣖𑣁𑣅 𑣏𑣁𑣗𑣁𑣓 𑣕𑣉𑣜𑣞𑣁, 𑣈𑣛𑣈 𑣋𑣁𑣜𑣈𑣓 𑣖𑣈. 𑣡𑣢𑣩- 𑢮𑣂𑣂𑣑 𑣞𑣉𑣖𑣉𑣅 𑣓𑣃𑣕𑣃𑣖𑣁𑣓 𑣔𑣉 , 𑣗𑣉𑣅𑣁𑣜 𑣌𑣈𑣛𑣁 𑣚𑣈𑣌𑣁 𑣋𑣈, 𑢷𑣁𑣊𑣖𑣈 𑣜𑣈𑣅𑣉𑣖 𑣓𑣃𑣕𑣃𑣖𑣁𑣓 𑣜𑣈, 𑣓𑣃𑣕𑣃𑣖𑣁𑣓𑣁𑣖 𑣞𑣁𑣜𑣂𑣋𑣈. 𑣡𑣣𑣠- 𑢫𑣈𑣅𑣁𑣓 𑣖𑣈𑣓𑣁𑣄 𑣏𑣈𑣓𑣁𑣄 𑣙𑣉𑣗𑣁𑣓, 𑣌𑣁𑣖𑣂𑣜𑣈 𑣗𑣁𑣓𑣉𑣄 𑣜𑣈, 𑢾𑣂𑣀𑣋𑣂 𑣖𑣈𑣓𑣁𑣄𑣆 𑣏𑣈𑣓𑣁𑣄 𑣙𑣉𑣗𑣁𑣓, 𑣜𑣂𑣖𑣂𑣚 𑣗𑣂𑣕𑣁𑣜 𑣜𑣈. 𑣡𑣣𑣡- 𑢴𑣂𑣝𑣃𑣖 𑣙𑣉𑣛𑣉𑣌𑣉 𑣓𑣈𑣚-𑣓𑣈𑣚𑣕𑣈, 𑣎𑣃𑣔𑣂 𑣌𑣁𑣖 𑣞𑣈𑣐𑣁𑣓, 𑢡𑣊𑣓𑣁𑣖𑣁 𑣌𑣁𑣓 𑣕𑣃𑣅𑣃 𑣚𑣈𑣌𑣁, 𑣗𑣁𑣑𑣈𑣖 𑣚𑣁𑣀𑣑𑣁-𑣚𑣃𑣀𑣑𑣃𑣓. 𑣡𑣣𑣢- 𑢶𑣃𑣓𑣃𑣁𑣀𑣄 𑣁𑣜 𑣔𑣁𑣁𑣜𑣁𑣑𑣁𑣄, 𑣉𑣌𑣉𑣅 𑣓𑣈𑣚𑣁𑣖𑣈𑣅𑣁𑣀, 𑢹𑣁𑣋𑣁 𑣌𑣉𑣁𑣄 𑣔𑣃𑣌𑣃𑣔𑣉, 𑣈𑣓𑣂𑣀 𑣁𑣕𑣉𑣖𑣈𑣅𑣁𑣀. 𑣡𑣣𑣣- 𑢡𑣖𑣋𑣈 𑣘𑣃𑣜 𑣚𑣁𑣋𑣁𑣓 𑣕𑣁𑣓𑣁, 𑣞𑣁𑣗𑣈𑣌𑣉 𑣙𑣁𑣘𑣁𑣋𑣈𑣅𑣁, 𑢯𑣂𑣜𑣋𑣁𑣚𑣈𑣖 𑣑𑣂𑣅𑣁𑣊 𑣕𑣁𑣖, 𑣎𑣃𑣛𑣃𑣜 𑣗𑣉𑣓𑣑𑣉𑣌𑣁 𑣋𑣈𑣅𑣁. 𑣡𑣣𑣤- 𑢧𑣛𑣂𑣉𑣛𑣉𑣊 𑣞𑣃𑣌𑣃𑣆 𑣈𑣖𑣈, 𑣉𑣌𑣉 𑣋𑣂𑣓𑣂𑣞𑣂 𑣈𑣞𑣃𑣋𑣈, 𑢧𑣛𑣂 𑣗𑣂𑣛𑣁𑣊 𑣔𑣃𑣌𑣃𑣆 𑣈𑣖𑣈, 𑣈𑣓 𑣋𑣂𑣓𑣂𑣞𑣂 𑣈𑣞𑣃𑣋𑣈. 𑣡𑣣𑣥- 𑢳𑣈𑣓 𑣞𑣂𑣜𑣎𑣉𑣓 𑣕𑣂𑣅𑣁𑣜𑣁 𑣌𑣁𑣓𑣁, 𑣕𑣁𑣜𑣁𑣞𑣃𑣌𑣃 𑣕𑣁𑣜𑣁𑣔𑣃𑣌𑣃𑣕𑣈, 𑢾𑣃𑣌𑣃 𑣞𑣃𑣓𑣁𑣊𑣈𑣖 𑣋𑣃𑣀𑣑𑣜𑣁 𑣜𑣈𑣅𑣉𑣉, 𑣚𑣁𑣋𑣁𑣉𑣄𑣖 𑣋𑣉𑣄 𑣋𑣉𑣄𑣕𑣈. 𑣡𑣣𑣦- 𑢨𑣝𑣃 𑣚𑣁𑣚𑣂𑣖 𑣗𑣂𑣕𑣂𑣂 𑣋𑣈𑣅𑣁𑣁, 𑣘𑣁𑣁𑣘𑣉 𑣌𑣁𑣖𑣂-𑣌𑣁𑣖𑣂𑣕𑣈, 𑢨𑣝𑣃 𑣞𑣈𑣌𑣁𑣛𑣁 𑣏𑣁𑣗𑣁𑣓 𑣖𑣈𑣓𑣔𑣉. 𑣘𑣁𑣁𑣘𑣉 𑣏𑣁𑣘𑣂-𑣏𑣁𑣘𑣂𑣕𑣈. 𑣡𑣣𑣧- 𑢴𑣉𑣜𑣉𑣖 𑣌𑣁𑣖𑣂 𑣖𑣈𑣓 -𑣖𑣈𑣓𑣕𑣈, 𑣈𑣒𑣁𑣄 𑣌𑣉𑣋𑣈𑣖 𑣞𑣃𑣌𑣃 𑣜𑣈, 𑢩𑣌𑣉𑣅 𑣎𑣁𑣌𑣈 𑣌𑣁𑣌𑣉 𑣔𑣈𑣀𑣋𑣁𑣖, 𑣔𑣃𑣌𑣃𑣜𑣈 𑣖𑣈𑣓𑣁𑣄 𑣖𑣈𑣜𑣈. 𑣡𑣣𑣨- 𑢴𑣁𑣄𑣖 𑣋𑣉𑣄 𑣕𑣁𑣓𑣜𑣈, 𑣕𑣈𑣕𑣁𑣊 𑣕𑣈𑣋𑣁 𑣖𑣈𑣓𑣁𑣄 𑣖𑣈𑣜𑣈, 𑢮𑣃𑣛𑣃𑣜 𑣋𑣈𑣖 𑣞𑣂𑣕𑣃𑣜𑣃 𑣕𑣁𑣓𑣁, 𑣞𑣈𑣐𑣁𑣔𑣉 𑣗𑣁𑣊𑣖𑣈𑣜𑣈. 𑣡𑣣𑣩- 𑢨𑣘𑣈𑣜𑣁𑣊 𑣕𑣈𑣄 𑣎𑣂𑣕𑣁𑣉𑣓𑣁, 𑣉𑣌𑣉𑣅 𑣙𑣁𑣕𑣃 𑣞𑣁𑣆 𑣜𑣈, 𑢴𑣃𑣌𑣃 𑣞𑣃𑣓𑣁𑣊 𑣔𑣃𑣌𑣃𑣆 𑣓𑣁𑣖𑣈, 𑣞𑣁𑣗𑣈𑣓 𑣞𑣃𑣌𑣃 𑣕𑣁𑣚𑣁 𑣜𑣈. 𑣡𑣤𑣠- 𑢡𑣅𑣜 𑣙𑣁𑣜𑣁𑣕𑣂𑣊 𑣓𑣂𑣄𑣋𑣈, 𑣏𑣁𑣓𑣁𑣗 𑣎𑣂𑣕𑣂𑣌𑣁𑣜𑣈𑣓, 𑢴𑣃𑣌𑣃 𑣞𑣁𑣁𑣕𑣂𑣊𑣈 𑣓𑣂𑣄𑣋𑣈, 𑣞𑣃𑣌𑣃 𑣔𑣉 𑣓𑣁𑣖𑣈 𑣕𑣁𑣓. 𑣡𑣤𑣡- 𑢸𑣂𑣜𑣉𑣕𑣂 𑣔𑣉𑣜𑣈𑣅𑣁 𑣏𑣈𑣌𑣉𑣚-𑣏𑣈𑣌𑣉𑣚, 𑣘𑣁𑣜𑣉𑣖 𑣔𑣃𑣜𑣞𑣂𑣁𑣆𑣋𑣈, 𑢸𑣁𑣜𑣉𑣖 𑣖𑣈𑣅𑣁𑣀𑣈 𑣚𑣈𑣅𑣉 𑣓𑣁𑣓𑣋𑣈, 𑣓𑣂𑣜𑣚𑣁 𑣎𑣂𑣗𑣉𑣓 𑣎𑣁𑣛𑣂𑣋𑣈. 𑣡𑣤𑣢- 𑢾𑣈𑣚𑣄 𑣁𑣐𑣁𑣔𑣂 𑣌𑣁𑣖𑣁𑣄 𑣜𑣈𑣔𑣉, 𑣎𑣁𑣕𑣂 𑣞𑣃𑣜𑣃𑣆𑣓 𑣋𑣈𑣅𑣁, 𑢶𑣂𑣅𑣁𑣀𑣑 𑣌𑣃𑣀𑣋𑣑𑣂 𑣜𑣈 𑣖𑣂𑣅𑣁𑣀𑣑𑣗𑣁𑣗𑣁, 𑣖𑣃𑣌𑣃𑣍 𑣏𑣁𑣗𑣁𑣓 𑣋𑣈𑣅𑣁. 𑣡𑣤𑣣- 𑢨𑣒𑣁𑣄 𑣎𑣁𑣕𑣂 𑣌𑣉𑣅𑣕𑣈 𑣜𑣈𑣅𑣉𑣉, 𑣉𑣕𑣈𑣔𑣉 𑣌𑣂𑣜𑣂𑣊𑣈𑣖, 𑢡𑣑 𑣌𑣈𑣈𑣕𑣈 𑣈𑣒𑣁𑣄 𑣎𑣁𑣕𑣂𑣜𑣈, 𑣁𑣚𑣉𑣖 𑣁𑣌𑣁𑣜𑣂𑣊𑣈. 𑣡𑣤𑣤- 𑢷𑣁𑣊𑣌𑣁 𑣜𑣈𑣅𑣉𑣉 𑣝𑣉𑣒𑣁𑣔𑣉 𑣓𑣂𑣔𑣁, 𑣎𑣃𑣛𑣃𑣜 𑣞𑣁𑣗𑣁𑣌𑣁𑣖𑣈, 𑢷𑣁𑣊𑣌𑣁 𑣜𑣈𑣅𑣉𑣉 𑣗𑣃𑣋𑣂𑣓 𑣙𑣉𑣜𑣁, 𑣕𑣈𑣋𑣈 𑣞𑣈𑣓𑣁 𑣌𑣁𑣖𑣈. 𑣡𑣤𑣥- 𑢬𑣉𑣚𑣉𑣖𑣂 𑣇𑣚𑣂 𑣖𑣁𑣜𑣁𑣊-𑣖𑣁𑣜𑣁𑣊, 𑣏𑣁𑣝𑣂 𑣏𑣂𑣓𑣁 𑣎𑣉𑣖𑣖𑣈, 𑢴𑣂𑣌𑣃 𑣗𑣃𑣔𑣂 𑣈𑣞𑣃 𑣚𑣈𑣞𑣈𑣜, 𑣌𑣉𑣉𑣚 𑣓𑣈𑣚 𑣎𑣉𑣖𑣖𑣈. 𑣡𑣤𑣦- 𑢡𑣊𑣕𑣉𑣜𑣞𑣁 𑣉𑣌𑣉𑣅 𑣇𑣒𑣁𑣓, 𑣏𑣂𑣖𑣂𑣓 𑣞𑣈𑣌𑣛𑣁 𑣋𑣈, 𑢷𑣂𑣕𑣂𑣂𑣅𑣁𑣈 𑣈𑣒𑣁𑣄 𑣌𑣉𑣅𑣕𑣈 , 𑣆𑣖𑣂𑣓 𑣘𑣃𑣜𑣁𑣄 𑣋𑣈. 𑣡𑣤𑣧- 𑢾𑣈𑣕𑣁𑣄 𑣁𑣅𑣃𑣗 𑣉𑣌𑣉𑣅 𑣞𑣈𑣗𑣁𑣆, 𑢺𑣂𑣒𑣁-𑢡𑣘𑣃𑣊𑣋𑣈, 𑢼𑣈𑣅𑣁𑣛𑣁 𑣌𑣃𑣛𑣁𑣖 𑣋𑣈𑣄 𑣕𑣁𑣛𑣂𑣓, 𑣆𑣓𑣂𑣀 𑣆𑣖𑣂𑣓 𑣋𑣈. 𑣡𑣤𑣨- 𑢩𑣌𑣉𑣓 𑣎𑣁𑣕𑣂𑣜𑣈 𑣞𑣈𑣕𑣁𑣄 -𑣁𑣅𑣃𑣗, 𑣌𑣃𑣛𑣂𑣌𑣉 𑣗𑣉𑣀𑣋𑣁 𑣕𑣁𑣓𑣁, 𑢨𑣓 𑣎𑣁𑣕𑣂𑣜𑣈 𑣞𑣃𑣌𑣃𑣞𑣃𑣖𑣃𑣌𑣂, 𑣏𑣈𑣀𑣚-𑣏𑣈𑣘𑣈𑣚 𑣕𑣁𑣓𑣁. 𑣡𑣤𑣩- 𑢦𑣒𑣃𑣚𑣁𑣑 𑣋𑣃𑣜𑣂𑣄 𑣌𑣁𑣕𑣈 𑣈𑣓𑣁𑣊, 𑣉𑣌𑣉𑣅 𑣖𑣁𑣀𑣑𑣂 𑣕𑣁𑣓𑣁, 𑢧𑣀𑣋𑣃𑣑 𑣗𑣉𑣚𑣉𑣓 𑣉𑣛𑣁𑣄 𑣜𑣈𑣅𑣉𑣉, 𑣞𑣃𑣌𑣃𑣆 𑣓𑣁𑣖𑣈 𑣕𑣁𑣓𑣁. 𑣡𑣥𑣠- 𑢩𑣌𑣉𑣓 𑣎𑣁𑣕𑣂 𑣌𑣉𑣁𑣄 𑣆𑣒𑣃𑣚𑣁𑣑, 𑣏𑣂𑣖𑣂𑣓 𑣖𑣁𑣜𑣁𑣊 𑣋𑣈𑣅𑣁, 𑢨𑣓 𑣎𑣁𑣕𑣂 𑣌𑣉 𑣌𑣁𑣉𑣀-𑣌𑣁𑣉𑣀, 𑣆𑣖𑣂𑣓 𑣜𑣈𑣀𑣋𑣈𑣄 𑣋𑣈𑣅𑣁. 𑣡𑣥𑣡- 𑢩𑣌𑣉𑣓 𑣎𑣁𑣕𑣂 𑣏𑣂𑣖𑣂𑣓 𑣉𑣅𑣉𑣚, 𑣘𑣂𑣜𑣉𑣕𑣂 𑣆𑣚𑣂 𑣜𑣈, 𑢨𑣓 𑣎𑣁𑣕𑣂 𑣋𑣈 𑣆𑣖𑣂𑣓 𑣏𑣁𑣓𑣁𑣗, 𑣞𑣉𑣔𑣉𑣜𑣂 𑣘𑣁𑣘𑣁𑣛𑣃 𑣜𑣈. 𑣡𑣥𑣢- 𑢽𑣉𑣗𑣁𑣖 𑣓𑣈𑣚𑣉𑣄 𑣞𑣂𑣀𑣋𑣁𑣜𑣕𑣈, 𑣁𑣇𑣜𑣂 𑣎𑣁𑣋𑣁𑣜𑣈 𑣁𑣀𑣗𑣁𑣄, 𑢽𑣁𑣗𑣁𑣖 𑣓𑣈𑣚𑣉𑣄 𑣋𑣈𑣅𑣁𑣓 𑣕𑣈, 𑣎𑣂𑣗𑣉𑣓 𑣖𑣈𑣓𑣁𑣄 𑣁𑣀𑣗𑣁𑣄. 𑣡𑣥𑣣- 𑢷𑣂𑣑𑣔𑣁 ,𑣗𑣂𑣕𑣂 𑣔𑣁𑣛𑣈, 𑣏𑣈𑣈𑣜𑣁,𑣞𑣁𑣗𑣈𑣓 𑣗𑣂𑣕𑣂 𑣕𑣁𑣓𑣁, 𑢳𑣈𑣓𑣁𑣌𑣉 𑣞𑣁𑣗𑣈𑣓 𑣙𑣁𑣕𑣁𑣉 𑣕𑣁𑣑𑣂𑣄, 𑢾𑣁𑣜𑣂𑣕𑣈𑣄 𑣓𑣉𑣞𑣂𑣗𑣁𑣓𑣁. 𑣡𑣥𑣤- 𑢴𑣁𑣄 𑣕𑣈𑣕𑣁𑣊 𑣙𑣁𑣜𑣉𑣗𑣈𑣓𑣁, 𑣓𑣃𑣀𑣆-𑣓𑣃𑣀𑣆 𑣖𑣃𑣕𑣂𑣑, 𑢸𑣂𑣜𑣉𑣕𑣂 𑣕𑣈𑣕𑣁𑣊 𑣞𑣁𑣚𑣋𑣁𑣉𑣓𑣁, 𑣓𑣃𑣀𑣆-𑣓𑣃𑣀𑣆 𑣖𑣃𑣕𑣂𑣑. 𑣡𑣥𑣥- 𑢾𑣃𑣖𑣁𑣊 𑣓𑣂𑣜𑣁𑣚 𑣎𑣂𑣗𑣉𑣓𑣕𑣈, 𑣞𑣃𑣖𑣁𑣊 𑣗𑣉𑣀𑣋𑣁-𑣗𑣃𑣜𑣃𑣕𑣈, 𑢬𑣁𑣁𑣖 𑣘𑣁𑣛𑣃𑣌𑣉 𑣔𑣂𑣝𑣃𑣖 𑣙𑣉𑣛𑣉, 𑣞𑣃𑣖𑣁𑣊 𑣔𑣉𑣜𑣉𑣖 𑣌𑣁𑣖𑣂 𑣕𑣈. 𑣡𑣥𑣦- 𑢫𑣁𑣛𑣁 𑣏𑣂𑣌𑣁 𑣗𑣁𑣊𑣌𑣁 𑣑𑣈𑣊𑣌𑣁, 𑣙𑣉𑣜𑣁𑣕𑣈 𑣞𑣈𑣞𑣈𑣓 𑣕𑣁𑣓𑣁, 𑢮𑣂𑣗𑣉𑣓 𑣜𑣈𑣅𑣉𑣉 𑣞𑣁𑣜𑣂,𑣏𑣁𑣌𑣁𑣑, 𑣈𑣓𑣌𑣁 𑣋𑣉𑣜𑣉𑣎𑣉 𑣕𑣁𑣓𑣁. 𑣡𑣥𑣧- 𑢬𑣁𑣎𑣂𑣂 𑣖𑣃𑣕𑣂𑣑 𑣌𑣉𑣌𑣉𑣜 𑣚𑣈𑣌𑣁, 𑣚𑣁𑣀𑣑𑣁-𑣚𑣃𑣀𑣑𑣃 𑣖𑣈𑣑𑣈𑣌𑣉, 𑢧𑣜𑣃𑣖 𑣌𑣉𑣖𑣈 𑣈𑣓𑣌𑣃𑣋𑣈, 𑣌𑣃𑣛𑣂 𑣌𑣃𑣀𑣗𑣃𑣛𑣃 𑣌𑣉. 𑣡𑣥𑣨- 𑢺𑣈𑣅𑣁𑣜 𑣚𑣁𑣗𑣁𑣜 𑣎𑣁𑣋𑣁𑣜𑣌𑣉, 𑣕𑣉𑣁𑣇 𑣚𑣈𑣌𑣁 𑣋𑣈𑣌𑣉, 𑢵𑣁𑣁𑣌𑣉 𑣓𑣈𑣚 𑣌𑣈𑣈𑣕𑣈 𑣈𑣒𑣁𑣄, 𑣕𑣃𑣌𑣁𑣜𑣈 𑣎𑣁𑣜𑣉𑣖𑣈𑣌𑣉. 𑣡𑣥𑣩- 𑢾𑣉𑣜𑣉𑣋𑣉𑣞𑣃𑣌𑣃 𑣓𑣁𑣖𑣉𑣄 𑣞𑣁𑣜𑣂, 𑣈𑣓𑣌𑣃𑣛𑣂 𑣕𑣁𑣄 𑣜𑣈, 𑢴𑣃𑣔𑣃𑣚𑣃𑣖𑣚𑣈𑣌𑣁 𑣉𑣌𑣉𑣅, 𑣖𑣁𑣅𑣕𑣈 𑣌𑣃𑣑𑣃𑣜𑣃𑣊𑣈. 𑣡𑣦𑣠- 𑢬𑣁𑣁𑣄 𑣌𑣁𑣌𑣉 𑣕𑣉𑣚𑣂𑣂 𑣉𑣌𑣉𑣅, 𑣖𑣂𑣜𑣃𑣌𑣉 𑣕𑣉𑣚𑣂𑣂 𑣕𑣁𑣓𑣁, 𑢨𑣒𑣁𑣄 𑣙𑣁𑣅𑣁𑣖 𑣌𑣁𑣎𑣂𑣂 𑣓𑣂𑣄𑣋𑣈, 𑢴𑣃𑣌𑣃𑣔𑣉 𑣓𑣁𑣖𑣈 𑣕𑣁𑣓𑣁. 𑣡𑣦𑣡- 𑢶𑣁𑣜𑣁𑣄 𑣚𑣈𑣌𑣁𑣖 𑣞𑣂𑣀𑣋𑣁𑣜𑣈𑣓, 𑣘𑣂𑣜𑣉𑣕𑣂 𑣌𑣁𑣖 𑣈𑣕𑣉𑣅, 𑢮𑣁𑣉𑣋𑣈 𑣓𑣁𑣖𑣁 𑣎𑣃𑣛𑣂𑣖 𑣓𑣁𑣖𑣁, 𑣎𑣃𑣛𑣂𑣖 𑣜𑣁𑣄 𑣗𑣁𑣁𑣅. 𑣡𑣦𑣢- 𑢩𑣌𑣉𑣓 𑣎𑣁𑣕𑣂𑣜𑣈 𑣗𑣃𑣛𑣁𑣗𑣃𑣛𑣂 𑣌𑣉, 𑣈𑣞𑣃 𑣌𑣉 𑣖𑣁𑣆𑣓 𑣌𑣉𑣁, 𑢨𑣓 𑣎𑣁𑣕𑣂𑣋𑣈 𑣔𑣂𑣝𑣃𑣖 𑣕𑣁𑣚𑣁𑣜𑣈, 𑣘𑣃𑣜𑣁𑣄 𑣞𑣉𑣔𑣉𑣜𑣂 𑣋𑣈𑣅𑣁. 𑣡𑣦𑣣- 𑢬𑣃𑣁𑣀 𑣔𑣁𑣄 𑣁𑣜 𑣘𑣁𑣌𑣁𑣉𑣛𑣁𑣄, 𑣁𑣜 𑣋𑣈 𑣙𑣁𑣘𑣁𑣓𑣃𑣖, 𑢼𑣈𑣅𑣁𑣛𑣁𑣄 𑣌𑣉 𑣎𑣈𑣒𑣈 𑣞𑣂𑣀𑣋𑣂, 𑣜𑣁𑣗𑣁𑣊 𑣜𑣈𑣌𑣉 𑣇𑣜𑣋𑣃𑣖. 𑣡𑣦𑣤- 𑢫𑣁𑣛𑣁 𑣔𑣁𑣄𑣔𑣉 𑣜𑣂𑣚𑣁𑣖𑣁𑣚𑣁, 𑣗𑣁𑣀𑣔𑣁 𑣔𑣁𑣄 𑣗𑣉𑣛𑣁, 𑢳𑣁𑣖𑣁 𑣗𑣁𑣚𑣁𑣌𑣉 𑣌𑣁𑣖𑣁𑣄 𑣜𑣈𑣔𑣉, 𑣗𑣃𑣔𑣂 𑣕𑣁𑣖 𑣗𑣉𑣛𑣁. 𑣡𑣦𑣥- 𑢵𑣁𑣕𑣁𑣖 𑣌𑣁𑣈 𑣔𑣁𑣜𑣉𑣖 𑣚𑣈𑣑𑣌𑣉, 𑣗𑣉𑣀𑣋𑣁 𑣌𑣉𑣕𑣈 𑣔𑣂𑣌𑣃, 𑢡𑣖 𑣏𑣂𑣌𑣁𑣖 𑣔𑣁𑣜𑣉𑣖 𑣌𑣉𑣁 , 𑣗𑣉𑣀𑣋𑣁- 𑣗𑣉𑣀𑣋𑣁𑣕𑣈 𑣔𑣂𑣌𑣃. 𑣡𑣦𑣦- 𑢡𑣗𑣃 𑣌𑣃𑣛𑣂𑣌𑣉 𑣆𑣔𑣂𑣌𑣁𑣕𑣈, 𑣔𑣂𑣌𑣃𑣌𑣉 𑣏𑣁𑣅𑣁𑣀 𑣌𑣈𑣑𑣗𑣃, 𑢳𑣈𑣅𑣁𑣀 𑣓𑣈𑣚𑣕𑣈 𑣗𑣃𑣔𑣂𑣖𑣁 𑣌𑣁𑣋𑣈𑣖, 𑣈𑣕𑣉 𑣌𑣈𑣑𑣁 𑣕𑣁𑣗𑣃, 𑣡𑣦𑣧- 𑢮𑣁𑣕𑣂 𑣜𑣈𑣅𑣁𑣄 𑣙𑣂𑣅𑣁- 𑣏𑣁𑣌𑣁𑣕𑣂𑣊, 𑣕𑣁𑣖 𑣗𑣁𑣓𑣉𑣄 𑣜𑣈𑣔𑣉 , 𑢧𑣜𑣂𑣄 𑣖𑣈𑣜𑣉𑣖𑣁𑣅 𑣕𑣈 𑣘𑣃𑣜𑣈𑣄, 𑢶𑣃𑣜𑣃𑣌𑣃 𑣕𑣁𑣓𑣁𑣖 𑣁𑣖𑣔𑣉. 𑣡𑣦𑣨- 𑢷𑣁𑣜𑣎𑣂𑣗𑣉𑣓 𑣌𑣃𑣛𑣂𑣅𑣁𑣄, 𑣓𑣁𑣒𑣂𑣌𑣁 𑣓𑣈𑣚𑣈𑣖 𑣌𑣉𑣛𑣁, 𑢬𑣉𑣍𑣈 𑣕𑣂𑣛𑣂 𑣘𑣃𑣜𑣁𑣄 𑣌𑣃𑣛𑣂, 𑣈𑣕𑣉𑣖 𑣜𑣈𑣔𑣉 𑣌𑣉𑣛𑣁. 𑣡𑣦𑣩- 𑢩𑣌𑣉𑣓 𑣖𑣃𑣞𑣂𑣊 𑣌𑣃𑣞𑣃𑣜 𑣙𑣉𑣛𑣉, 𑣚𑣈𑣅𑣁𑣜 𑣎𑣁𑣋𑣁𑣜 𑣕𑣁𑣓, 𑢧𑣛𑣃𑣄 𑣕𑣁𑣖𑣈 𑣌𑣁𑣎𑣂𑣔𑣉 𑣕𑣁𑣅𑣁, 𑣗𑣁𑣐𑣁𑣞𑣂 𑣏𑣁𑣜𑣁 𑣕𑣁𑣓. 𑣡𑣧𑣠- 𑢬𑣃𑣃𑣀𑣗𑣃 𑣚𑣁𑣋𑣂𑣑,𑣎𑣁𑣉𑣋𑣈-𑣎𑣁𑣉𑣋𑣈, 𑣌𑣁𑣋𑣈 𑣓𑣃𑣗𑣁𑣄 𑣓𑣁, 𑢬𑣃𑣀𑣗𑣃𑣛𑣃 𑣌𑣁𑣖𑣂 𑣖𑣃𑣞𑣂𑣊, 𑣗𑣁𑣜𑣞𑣂𑣊 𑣋𑣈 𑣗𑣃𑣋𑣂𑣓𑣁. 𑣡𑣧𑣡- 𑢷𑣃𑣔𑣂 𑣕𑣈 𑣜𑣈𑣅𑣉𑣉 𑣞𑣁𑣗𑣈𑣓 𑣔𑣂𑣓𑣔𑣉, 𑣌𑣁𑣋𑣈𑣖 𑣗𑣁𑣐𑣁 𑣌𑣉𑣁, 𑢾𑣉𑣖𑣁𑣅 𑣞𑣈𑣒𑣈𑣜 𑣁𑣖𑣁𑣄 𑣗𑣃𑣔𑣂𑣕𑣈, 𑣁𑣖𑣋𑣈 𑣕𑣉𑣚𑣉𑣄𑣁. 𑣡𑣧𑣢- 𑢾𑣃𑣌𑣃 𑣏𑣂𑣚𑣂𑣌𑣁 𑣞𑣈𑣒𑣈𑣜𑣁, 𑣗𑣁𑣚𑣁𑣅𑣁,𑣞𑣁𑣌𑣁𑣅𑣁 𑣕𑣁𑣓, 𑢴𑣃𑣃𑣌𑣃𑣃 𑣈𑣓𑣌𑣁 𑣞𑣈𑣒𑣈𑣜 𑣋𑣈𑣅𑣁, 𑣙𑣁𑣋𑣈𑣅𑣁-𑣗𑣉𑣉𑣅𑣁𑣕𑣁𑣓. 𑣡𑣧𑣣- 𑢽𑣃𑣝𑣃𑣓 𑣌𑣁𑣖 𑣈𑣕𑣉 𑣌𑣈𑣈𑣜𑣈, 𑣁𑣌𑣁𑣛𑣁 𑣔𑣉𑣛𑣁 𑣋𑣈𑣅𑣁, 𑢮𑣃𑣔𑣂𑣖 𑣖𑣈𑣓𑣈 𑣋𑣈𑣅𑣁𑣓 𑣕𑣁𑣖, 𑣕𑣁𑣜𑣁 𑣌𑣁𑣏𑣁 𑣋𑣈𑣅𑣁. 𑣡𑣧𑣤- 𑢾𑣁𑣖𑣁𑣜𑣈 𑣁𑣚𑣉𑣖 𑣁𑣝𑣉𑣜𑣁 𑣌𑣉𑣁, 𑢸𑣂𑣜𑣉𑣕𑣂 𑣎𑣃𑣛𑣂𑣌𑣉, 𑢽𑣁𑣜𑣁𑣄 𑣌𑣈𑣖𑣜𑣈 𑣌𑣁𑣖 𑣘𑣉𑣏𑣁𑣓, 𑣎𑣁𑣉𑣋𑣈 𑣗𑣉𑣀𑣋𑣁𑣅 𑣜𑣈. 𑣡𑣧𑣥- 𑢳𑣁𑣖𑣁 𑣋𑣂𑣓𑣂𑣞𑣂 𑣌𑣉 𑣙𑣁𑣅𑣁𑣕𑣈 𑣋𑣈𑣅𑣁, 𑣗𑣁𑣜𑣞𑣂𑣊 𑣋𑣈 𑣜𑣈𑣅𑣉𑣉. 𑢳𑣁𑣖𑣁 𑣌𑣂𑣖𑣂𑣓𑣌𑣉 𑣌𑣉𑣅𑣉𑣄 𑣌𑣃𑣚𑣂𑣂, 𑣖𑣃𑣒𑣁𑣈 𑣞𑣂𑣘𑣃𑣆 𑣜𑣈𑣅𑣉𑣉. 𑣡𑣧𑣦- 𑢳𑣁𑣖𑣁 𑣌𑣂𑣖𑣂𑣓 𑣖𑣃𑣚𑣃𑣄 𑣏𑣁𑣀𑣑𑣃𑣄‍‍, 𑣞𑣁𑣗𑣈𑣌𑣉 𑣎𑣉𑣁𑣜𑣁𑣆𑣅𑣁, 𑢵𑣁𑣜𑣁𑣚-𑣕𑣁𑣜𑣁𑣚 𑣘𑣉𑣓𑣁𑣆𑣀 𑣏𑣁𑣀𑣑𑣃𑣄 , 𑣌𑣁𑣌𑣉 𑣎𑣉𑣁𑣜𑣁𑣆𑣅𑣁. 𑣡𑣧𑣧- 𑢾𑣂𑣀𑣋𑣂 𑣘𑣁𑣁𑣕𑣈 𑣔𑣁𑣄-𑣎𑣉𑣗𑣉𑣜𑣁, 𑣁𑣚𑣉𑣖 𑣉𑣀𑣑𑣉𑣊𑣈𑣅𑣁𑣀. 𑢼𑣉𑣌𑣉𑣖-𑣜𑣉𑣌𑣉𑣖 𑣜𑣉𑣋𑣁 𑣓𑣁𑣖𑣖𑣈, 𑣔𑣃𑣌𑣃𑣖 𑣓𑣁𑣖𑣈𑣅𑣁𑣀. 𑣡𑣧𑣨- 𑢨𑣜𑣁𑣋𑣈 𑣈𑣀𑣋𑣁,𑣈𑣜𑣁𑣋𑣈 𑣗𑣉𑣀𑣋𑣁, 𑣈𑣜𑣁𑣋𑣈 𑣞𑣃𑣛𑣂𑣕𑣁 𑣗𑣁𑣕𑣂, 𑢨𑣜𑣁 𑣗𑣈𑣋𑣁𑣜 𑣌𑣁𑣖 𑣖𑣁𑣜𑣞𑣁𑣚𑣈 , 𑣎𑣉𑣓𑣉𑣖 𑣎𑣂𑣗𑣉𑣓 𑣗𑣁𑣕𑣂. 𑣡𑣧𑣩- 𑢬𑣉𑣛𑣁 𑣗𑣈𑣋𑣁𑣜 𑣌𑣃𑣛𑣂𑣅𑣁𑣄, 𑣖𑣁𑣆𑣓 𑣗𑣁𑣓𑣉𑣄 𑣋𑣈𑣅𑣁, 𑢼𑣃𑣃𑣘𑣃 𑣁𑣜 𑣘𑣁𑣛𑣁𑣉 𑣜𑣈𑣅𑣁𑣄 , 𑣋𑣉𑣓𑣉𑣊 𑣗𑣁𑣓𑣓𑣉𑣄 𑣋𑣈𑣅𑣁. 𑣡𑣨𑣠- 𑢾𑣁𑣗𑣈𑣓 𑣔𑣃𑣌𑣃 𑣕𑣁𑣚𑣁𑣜𑣈 𑣙𑣁𑣋𑣁, 𑣌𑣃𑣘𑣃𑣝𑣃𑣜 𑣋𑣈 𑣖𑣁𑣜𑣁𑣊, 𑢾𑣁𑣗𑣈𑣓 𑣞𑣃𑣌𑣃 𑣕𑣁𑣚𑣁𑣜𑣈, 𑣘𑣂𑣜𑣉𑣕𑣂 𑣞𑣃𑣌𑣃 𑣞𑣃𑣓𑣁𑣊 𑣖𑣁𑣜𑣁𑣊. 𑣡𑣨𑣡- 𑢾𑣁𑣗𑣈𑣓 𑣌𑣂𑣕𑣁𑣗 𑣕𑣁𑣚𑣁𑣜𑣈, 𑣙𑣃𑣑𑣋𑣁𑣀 𑣌𑣂𑣕𑣁𑣗 𑣖𑣁𑣜𑣁𑣊𑣁, 𑢾𑣁𑣗𑣈𑣓 𑣞𑣈𑣐𑣁 𑣕𑣁𑣚𑣁𑣜𑣈, 𑣞𑣂𑣜𑣎𑣉𑣓 𑣞𑣈𑣐𑣁 𑣖𑣁𑣜𑣁𑣊𑣁. 𑣡𑣨𑣢- 𑢾𑣂𑣒𑣂𑣅𑣁 𑣞𑣉𑣖𑣁𑣅 𑣖𑣁𑣜𑣁𑣊𑣆𑣓𑣃𑣊, 𑣉𑣌𑣉𑣅 𑣆𑣓𑣃𑣊 𑣌𑣈𑣓𑣁, 𑢨𑣓𑣌𑣃𑣄 𑣙𑣉𑣛𑣉𑣖𑣉 𑣋𑣈, 𑣕𑣁𑣋𑣁𑣛𑣁 𑣓𑣈𑣚𑣉𑣄𑣕𑣁𑣓𑣁. 𑣡𑣨𑣣- 𑢹𑣁𑣜𑣁𑣕𑣁𑣓𑣜𑣈 𑣉𑣌𑣉𑣅 𑣈𑣀𑣋𑣁, 𑣈𑣞𑣃𑣆 𑣖𑣁𑣆𑣓 𑣌𑣈𑣓𑣁, 𑢨𑣓𑣂𑣀𑣋𑣈 𑣔𑣂𑣝𑣃𑣖 𑣕𑣁𑣚𑣁𑣜𑣈, 𑣖𑣁𑣜𑣁𑣊 𑣓𑣈𑣚𑣉𑣄 𑣕𑣁𑣓𑣁. 𑣡𑣨𑣤- 𑢷𑣃𑣋𑣂𑣗𑣁𑣛𑣂𑣎 ,𑣋𑣃𑣓𑣁𑣗𑣈𑣋𑣃𑣓𑣁, 𑣞𑣁𑣗𑣈𑣌𑣉 𑣇𑣜𑣃𑣖 𑣕𑣁𑣑𑣁, 𑢡𑣝𑣁𑣛𑣁 𑣉𑣛𑣉𑣊 𑣖𑣈𑣓𑣔𑣉 𑣈𑣞𑣃-𑣈𑣞𑣃𑣌𑣉, 𑣏𑣂𑣛𑣁 𑣕𑣁𑣑𑣁. 𑣡𑣨𑣥- 𑢬𑣃𑣀𑣗𑣃𑣃 𑣌𑣁𑣖𑣂𑣜𑣈 𑣎𑣃𑣛𑣂𑣖 𑣎𑣁𑣌𑣈, 𑣁𑣚𑣉𑣖 𑣞𑣁𑣜𑣂 𑣕𑣂𑣂𑣅𑣁, 𑢾𑣁𑣗𑣈 𑣎𑣁𑣓 𑣜𑣈𑣄 𑣖𑣈𑣓𑣈, 𑣁𑣖𑣋𑣈 𑣉𑣜 𑣚𑣂𑣅𑣁. 𑣡𑣨𑣦- 𑢧𑣜𑣃𑣌𑣉 𑣑𑣂𑣗𑣂𑣜𑣂 𑣗𑣁𑣕𑣂𑣜𑣈, 𑣙𑣉𑣛𑣉𑣌𑣉 𑣘𑣂𑣜𑣉𑣕𑣂 𑣜𑣈, 𑢳𑣈𑣚𑣈𑣓𑣈𑣚𑣈𑣌𑣉 𑣞𑣁𑣕𑣂𑣓 𑣕𑣁𑣓𑣁, 𑣗𑣉𑣜𑣉𑣋𑣈 𑣗𑣁𑣓𑣉𑣄 𑣎𑣂𑣂𑣜𑣈. 𑣡𑣨𑣧- 𑢸𑣂𑣜𑣉𑣕𑣂 𑣖𑣂𑣅𑣁𑣀𑣑 𑣓𑣉𑣋𑣉𑣑 𑣗𑣂𑣂𑣝𑣂, 𑣞𑣁𑣗𑣈𑣌𑣉 𑣙𑣁𑣅𑣁𑣕𑣈𑣅𑣁, 𑢹𑣉𑣛𑣉𑣖𑣉 𑣗𑣃𑣞𑣁𑣜 𑣏𑣁𑣗𑣁𑣓 𑣜𑣈𑣅𑣉, 𑣌𑣁𑣌𑣉 𑣗𑣉𑣜𑣉𑣅 𑣋𑣈𑣅𑣁. 𑣡𑣨𑣨- 𑢸𑣁𑣆𑣚𑣓𑣈𑣘𑣈𑣚, 𑣘𑣁𑣆𑣚 𑣏𑣈𑣜𑣈𑣗, 𑣏𑣂𑣚𑣂𑣌𑣁 𑣙𑣉𑣗𑣁 𑣚𑣈𑣓𑣁, 𑢴𑣁𑣇𑣋𑣈𑣔𑣁𑣇 𑣎𑣂𑣗𑣉𑣓 𑣌𑣉𑣜𑣈, 𑣙𑣂𑣏𑣂𑣜 𑣗𑣂𑣎𑣂𑣚𑣈𑣓𑣁. 𑣡𑣨𑣩- 𑢮𑣉𑣗𑣉𑣜𑣂 𑣎𑣃𑣔𑣂 𑣉𑣌𑣉𑣅 𑣖𑣉𑣏𑣁𑣜𑣈, 𑣓𑣉𑣚𑣁𑣑 𑣁𑣗 𑣌𑣈𑣑𑣖𑣈, 𑢡𑣗𑣃𑣊𑣞𑣁𑣘𑣁𑣓𑣖𑣈𑣈 𑣗𑣉𑣔𑣈𑣋𑣈, 𑣙𑣃𑣔𑣁𑣋𑣈 𑣕𑣁𑣚𑣁𑣖𑣈. 𑣡𑣩𑣠- 𑢶𑣁𑣜𑣁𑣊 𑣙𑣁𑣌𑣃 𑣓𑣈𑣚𑣕𑣈 , 𑣙𑣃𑣛𑣂𑣊 𑣙𑣁𑣌𑣃𑣖 𑣁𑣛𑣁𑣄 𑣕𑣁𑣎𑣁, 𑢶𑣁𑣜𑣁𑣊 𑣙𑣁𑣌𑣃 𑣖𑣁 𑣔𑣁𑣄𑣜𑣂𑣄 𑣋𑣈, 𑣕𑣂𑣛𑣂 𑣙𑣁𑣌𑣃𑣃𑣖 𑣘𑣉𑣏𑣁 𑣌𑣂𑣎𑣁. 𑣡𑣩𑣡- 𑢹𑣉𑣜𑣁𑣞𑣈𑣓𑣔𑣉 𑣞𑣈𑣜𑣁𑣚𑣂 𑣋𑣈𑣅𑣁, 𑣙𑣁𑣜𑣁 𑣗𑣁𑣆𑣔𑣉 𑣔𑣃𑣜𑣞𑣁𑣆, 𑢶𑣁𑣜𑣁𑣊 𑣈𑣓𑣂𑣀 𑣌𑣃𑣌𑣃𑣖𑣃𑣕𑣈, 𑣉𑣌𑣉𑣅 𑣙𑣉𑣜𑣁𑣈 𑣗𑣁𑣆𑣆. 𑣡𑣩𑣢- 𑢷𑣃𑣜𑣔𑣃𑣑𑣈𑣖 𑣉𑣀𑣑𑣉𑣊𑣁 𑣌𑣁𑣓𑣁, 𑣁𑣘𑣁𑣜𑣉𑣗 𑣗𑣉𑣔𑣈 𑣋𑣁𑣞𑣁𑣜𑣈𑣖, 𑢯𑣈𑣐𑣈𑣌𑣉 𑣈𑣖𑣁𑣓 𑣞𑣁𑣗 𑣕𑣁𑣖𑣋𑣈, 𑣎𑣃𑣛𑣂𑣖 𑣗𑣉𑣔𑣈 𑣓𑣁𑣖𑣂𑣀𑣖. 𑣡𑣩𑣣- 𑢮𑣂𑣚𑣂𑣊 𑣋𑣈 𑣎𑣉𑣁𑣜𑣈 𑣓𑣂𑣄 𑣔𑣉, 𑣁𑣚𑣁𑣖 𑣞𑣁𑣜𑣂 𑣕𑣂𑣂𑣅𑣁, 𑢶𑣃𑣞𑣂𑣊 𑣗𑣁𑣓𑣉 𑣖𑣃𑣞𑣂𑣊, 𑣗𑣁𑣑𑣈𑣄 𑣘𑣉𑣒𑣉𑣈 𑣖𑣈𑣅𑣁. 𑣡𑣩𑣤- 𑢷𑣃𑣃𑣚𑣉𑣄 𑣌𑣉 𑣖𑣁𑣐𑣈 𑣖𑣁𑣐𑣈𑣕𑣈, 𑣉𑣘𑣉𑣜 𑣁𑣘𑣁𑣔𑣈𑣜𑣁, 𑢯𑣁𑣑𑣃𑣆 𑣌𑣃𑣛𑣂 𑣓𑣁𑣖𑣁 𑣌𑣃𑣛𑣂 𑣌𑣉𑣈, 𑣖𑣁𑣀𑣋𑣁𑣚 𑣆𑣏𑣂 𑣌𑣉𑣁. 𑣡𑣩𑣥- 𑢸𑣂𑣜𑣉𑣕𑣂 𑣙𑣉𑣜𑣁 𑣈𑣝𑣃 𑣎𑣂𑣎𑣂𑣚𑣁𑣑, 𑣇𑣛𑣃𑣄 𑣕𑣁𑣖𑣈 𑣗𑣉𑣅𑣉, 𑢷𑣁𑣐𑣁𑣁𑣌𑣁𑣓𑣁 𑣖𑣁𑣜𑣁𑣊 𑣖𑣁𑣜𑣁𑣊, 𑣖𑣃𑣓𑣂 𑣌𑣉𑣁𑣄 𑣗𑣃𑣔𑣂𑣅𑣉. 𑣡𑣩𑣦- 𑢩𑣛𑣁𑣄 𑣗𑣁𑣆𑣖𑣁 𑣗𑣂𑣛𑣃𑣖𑣋𑣈𑣅𑣁, 𑣜𑣁𑣘𑣃𑣑 𑣞𑣉𑣎𑣈 𑣋𑣈𑣅𑣁, 𑢯𑣉𑣚𑣉𑣓 𑣝𑣃𑣞𑣁𑣜 𑣁𑣜𑣋𑣈 𑣗𑣂𑣛𑣃𑣖, 𑣗𑣁𑣋𑣁𑣛𑣁 𑣗𑣉𑣔𑣈 𑣋𑣈𑣅𑣁. 𑣡𑣩𑣧- 𑢯𑣁𑣁𑣝𑣉 𑣗𑣂𑣕𑣂𑣖 𑣞𑣁𑣗𑣈, 𑣖𑣂𑣑 𑣝𑣂𑣜𑣖𑣁𑣜𑣈 𑣖𑣂𑣞𑣁, 𑢷𑣈𑣘𑣁𑣜 𑣗𑣂𑣕𑣂𑣖 𑣞𑣁𑣗𑣈, 𑣝𑣂𑣀𑣋𑣂 𑣕𑣃𑣜 𑣕𑣉𑣜𑣞𑣁. 𑣡𑣩𑣨- 𑢾𑣁𑣗𑣈𑣓 𑣗𑣂𑣕𑣂 𑣏𑣁𑣗𑣁𑣓, 𑣌𑣁𑣜𑣏𑣁 𑣆𑣑𑣈 𑣖𑣃𑣕𑣂𑣑, 𑢷𑣂𑣔𑣔𑣁 𑣗𑣂𑣕𑣂 𑣞𑣁𑣋𑣈𑣓 , 𑣌𑣁𑣜𑣏𑣁 𑣆𑣑𑣈 𑣖𑣃𑣕𑣂𑣑. 𑣡𑣩𑣩- 𑢾𑣁𑣗𑣈𑣓 𑣞𑣃𑣌𑣃 𑣓𑣁𑣖𑣉𑣄 𑣋𑣈𑣅𑣁, 𑣒𑣁𑣌𑣁 𑣘𑣉𑣅𑣞𑣁 𑣕𑣈, 𑢬𑣁𑣁𑣓𑣁𑣖𑣉𑣄 𑣖𑣈𑣓𑣔𑣉, 𑣓𑣂𑣜𑣚𑣁-𑣘𑣜𑣈𑣈𑣖 𑣒𑣁𑣌𑣁𑣕𑣈. 𑣢𑣠𑣠- 𑢽𑣂𑣖𑣕𑣉𑣚 𑣁𑣜 𑣎𑣃𑣁 𑣆𑣓𑣃𑣊, 𑣎𑣃𑣔𑣂𑣖 𑣞𑣈𑣗𑣈 𑣎𑣁𑣓𑣁, 𑢬𑣉𑣜𑣉𑣖 𑣌𑣉𑣘𑣁𑣛𑣉 𑣖𑣁𑣐𑣈𑣕𑣈 𑣕𑣁𑣖, 𑢬𑣈𑣏𑣁𑣄 𑣆𑣔𑣂𑣕𑣁𑣓𑣁. 𑣢𑣠𑣡- 𑢴𑣂𑣝𑣃𑣖 𑣙𑣉𑣛𑣉𑣌𑣉 𑣕𑣁𑣄𑣅𑣕𑣈𑣔𑣉, 𑣞𑣉𑣔𑣉𑣜𑣂 𑣈𑣕𑣉𑣓 𑣖𑣈, 𑢮𑣂𑣇 𑣎𑣉𑣓𑣕𑣃𑣌𑣉 𑣕𑣁𑣄𑣅 𑣕𑣈𑣔𑣉, 𑣗𑣈𑣈𑣔𑣉 𑣈𑣕𑣉𑣓 𑣖𑣈. 𑣢𑣠𑣢- 𑢾𑣁𑣗𑣈𑣓 𑣋𑣂𑣓𑣂𑣞𑣂 𑣁𑣜 𑣎𑣂𑣇𑣌𑣉, 𑣞𑣈𑣐𑣁 𑣌𑣉 𑣇𑣔𑣃𑣗𑣈 𑣕𑣁𑣓𑣁, 𑢧𑣜𑣃𑣖 𑣌𑣁𑣖 𑣈𑣕𑣉𑣅 𑣕𑣈𑣋𑣈𑣖, 𑣌𑣉𑣀𑣑𑣉 𑣖𑣉𑣀𑣑𑣉𑣓 𑣕𑣁𑣓𑣁. 𑣢𑣠𑣣- 𑢦𑣞𑣌𑣃𑣚 ,𑣌𑣉𑣚𑣈𑣎𑣈 𑣘𑣁𑣛𑣁𑣉 𑣕𑣈𑣖𑣁 , 𑣗𑣂𑣔𑣃𑣁𑣖 𑣗𑣁𑣆 𑣎𑣁𑣓𑣁, 𑢷𑣈𑣈𑣔𑣈 𑣋𑣈𑣅𑣁𑣓 𑣗𑣁𑣓𑣉𑣄 𑣕𑣈𑣋𑣈𑣖, 𑣕𑣁𑣜𑣁𑣌𑣁𑣏𑣁 𑣎𑣁𑣓𑣁. 𑣢𑣠𑣤- 𑢦𑣞𑣌𑣃𑣚 𑣌𑣉𑣚𑣈𑣎 𑣘𑣁𑣛𑣁𑣉 𑣙𑣃𑣎𑣃𑣄 , 𑣞𑣃𑣖𑣁𑣊 𑣘𑣁𑣘𑣁𑣛𑣃𑣜𑣈, 𑢷𑣈𑣔𑣈 𑣋𑣈𑣅𑣁𑣓 𑣌𑣁𑣖𑣂𑣜𑣈 𑣙𑣃𑣎𑣃𑣄, 𑣎𑣂𑣗𑣉𑣓 𑣜𑣈𑣅𑣁𑣛𑣁 𑣜𑣈. 𑣢𑣠𑣥- 𑢬𑣉𑣚𑣈𑣎 𑣁𑣜 𑣗𑣈𑣈𑣔𑣈 𑣋𑣈𑣅𑣁𑣓, 𑣎𑣃𑣔𑣂𑣖 𑣙𑣁𑣕𑣁𑣉 𑣌𑣈𑣑𑣁, 𑢾𑣂𑣊𑣗𑣉𑣀𑣋𑣁𑣁𑣄 𑣕𑣁𑣜𑣁 𑣌𑣁𑣖𑣂𑣔𑣉, 𑣁𑣖𑣋𑣈 𑣜𑣂𑣌𑣁 𑣌𑣈𑣑𑣁. 𑣢𑣠𑣦- 𑢡𑣜𑣋𑣁𑣈 𑣘𑣃𑣜𑣁𑣄 𑣌𑣁𑣎𑣂 𑣌𑣉𑣔𑣉, 𑣌𑣁𑣌𑣉 𑣗𑣂𑣕𑣂𑣂 𑣋𑣈𑣅𑣁, 𑢸𑣃𑣜𑣁𑣄 𑣌𑣃𑣜𑣌𑣃𑣜𑣉𑣄 𑣌𑣉𑣔𑣉, 𑣌𑣁𑣌𑣉 𑣞𑣃𑣞𑣁𑣜𑣉𑣄 𑣋𑣈𑣅𑣁 . 𑣢𑣠𑣧- 𑢸𑣃𑣜𑣁𑣄 𑣜𑣈𑣓𑣁𑣀 𑣏𑣈𑣈𑣜𑣁 𑣌𑣉𑣔𑣉, 𑣌𑣁𑣌𑣉 𑣓𑣂𑣜𑣚𑣁 𑣋𑣈𑣅𑣁, 𑢸𑣃𑣜𑣁𑣄 𑣌𑣁𑣁 𑣎𑣁𑣋𑣁𑣜 𑣌𑣉𑣔𑣉, 𑣌𑣁𑣌𑣉 𑣞𑣃𑣞𑣁𑣜𑣉𑣄 𑣋𑣈𑣅𑣁. 𑣢𑣠𑣨- 𑢱𑣈𑣑𑣁𑣊 𑣌𑣁𑣒𑣁 𑣌𑣉𑣛𑣁 𑣌𑣃𑣛𑣂𑣌𑣉, 𑣈𑣘𑣈𑣜𑣁𑣊 𑣋𑣈𑣅𑣁, 𑢺𑣁𑣜𑣘𑣁 𑣌𑣁𑣒𑣁 𑣌𑣃𑣛𑣂𑣌𑣉 𑣖𑣁𑣌𑣉, 𑣘𑣂𑣜𑣉𑣕𑣂 𑣌𑣃𑣀𑣗𑣃𑣛𑣃 𑣋𑣈𑣅𑣁. 𑣢𑣠𑣩- 𑢼𑣃𑣗𑣃𑣛𑣃 𑣔𑣉𑣅𑣁𑣌𑣉 𑣘𑣃𑣜𑣁𑣄 𑣕𑣈𑣔𑣉, 𑣁𑣚𑣉𑣖 𑣞𑣁𑣜𑣂 𑣕𑣈𑣌𑣉, 𑢺𑣁𑣁𑣆 𑣁𑣜 𑣖𑣉𑣏𑣁𑣜𑣈 𑣆𑣀𑣁𑣓 , 𑣌𑣁𑣎𑣂 𑣖𑣈𑣓𑣁𑣄 𑣕𑣁𑣌𑣉. 𑣢𑣡𑣠- 𑢲𑣁𑣜𑣁 𑣞𑣁𑣖𑣁𑣊 𑣌𑣉𑣛𑣁𑣌𑣃𑣛𑣂𑣌𑣉, 𑣈𑣞𑣃𑣌𑣉 𑣋𑣈𑣎𑣈𑣜𑣁 𑣋𑣈𑣅𑣁, 𑢡𑣔𑣁 𑣔𑣂𑣓𑣋𑣈 𑣞𑣃𑣌𑣃𑣌𑣉 𑣓𑣁𑣖𑣈, 𑣁𑣔𑣁𑣔𑣉 𑣔𑣃𑣌𑣃 𑣋𑣈𑣅𑣁. 𑣢𑣡𑣡- 𑢴𑣁𑣒𑣁 𑣎𑣂𑣚𑣃 𑣙𑣈𑣀𑣔𑣈𑣌𑣉 𑣖𑣁𑣌𑣉, 𑣚𑣁𑣍𑣏𑣁 𑣎𑣉𑣖 𑣋𑣈𑣅𑣁, 𑢳𑣂𑣜𑣁𑣚 𑣎𑣂𑣗𑣉𑣓 𑣏𑣃𑣆𑣚𑣁 𑣎𑣁𑣌𑣈, 𑣌𑣁𑣌𑣉 𑣕𑣁𑣆𑣓 𑣋𑣈𑣅𑣁. 𑣢𑣡𑣢- 𑢶𑣂𑣜𑣃𑣖𑣃𑣒𑣁 𑣌𑣉𑣛𑣁𑣌𑣃𑣛𑣂𑣌𑣉, 𑣌𑣁𑣎𑣂𑣋𑣈 𑣖𑣁𑣖𑣁𑣜𑣁𑣊𑣁, 𑢾𑣁𑣖𑣁 𑣕𑣃𑣖𑣂𑣊 𑣕𑣁𑣘𑣂𑣊𑣈 𑣜𑣈, 𑣏𑣂𑣌𑣁 𑣗𑣃𑣊𑣗𑣃𑣊𑣁. 𑣢𑣡𑣣- 𑢬𑣁𑣒𑣁 𑣕𑣁𑣗𑣁𑣄 𑣉𑣛𑣁𑣄 𑣗𑣉𑣚𑣉𑣌𑣉, 𑣌𑣁𑣌𑣉 𑣁𑣞𑣃𑣚𑣉𑣄 𑣋𑣈𑣅𑣁, 𑢲𑣁𑣖𑣒𑣂𑣖 𑣕𑣁𑣓 𑣞𑣈𑣓𑣈 𑣌𑣃𑣛𑣂𑣌𑣌𑣉, 𑣌𑣉𑣛𑣁 𑣋𑣉𑣎𑣉𑣄 𑣋𑣈𑣅𑣁. 𑣢𑣡𑣤- 𑢴𑣃𑣗𑣜𑣈 𑣉𑣕𑣈 𑣔𑣁𑣘𑣁𑣚 𑣌𑣃𑣛𑣂𑣌𑣉, 𑣌𑣁𑣌𑣉 𑣓𑣂𑣜𑣚𑣁 𑣋𑣈𑣅𑣁, 𑢷𑣃𑣞𑣁𑣜 𑣞𑣃𑣘𑣂𑣑 𑣌𑣃𑣛𑣂𑣌𑣉 𑣖𑣁𑣌𑣉, 𑣖𑣁𑣀𑣋𑣁𑣚 𑣆𑣏𑣂𑣓 𑣋𑣈𑣅𑣁. 𑣢𑣡𑣥- 𑢮𑣉𑣌𑣁 𑣋𑣁𑣁𑣛𑣂 𑣜𑣈 𑣔𑣁𑣇𑣋𑣈 𑣔𑣁𑣇, 𑣞𑣃𑣕𑣃𑣆 𑣉𑣜𑣈𑣓 𑣌𑣉, 𑢴𑣁𑣇𑣋𑣈 𑣔𑣁𑣇 𑣌𑣃𑣛𑣂𑣌𑣉 𑣗𑣁𑣋𑣈, 𑣌𑣁𑣘𑣁𑣄 𑣚𑣁𑣋𑣁𑣓 𑣌𑣉. 𑣢𑣡𑣦- 𑢬𑣁𑣎𑣂𑣔𑣉 𑣌𑣁𑣈 𑣁𑣁𑣅𑣃𑣖 , 𑣁𑣈𑣋𑣈 𑣌𑣁𑣎𑣂 𑣚𑣁𑣋𑣁𑣓 , 𑢨𑣓 𑣌𑣉𑣛𑣁𑣁𑣄 𑣌𑣃𑣛𑣂𑣔𑣉, 𑣎𑣁𑣉𑣋𑣈 𑣜𑣁𑣄 𑣚𑣁𑣋𑣁𑣓. 𑣢𑣡𑣧- 𑢩𑣛𑣁𑣄𑣅𑣕𑣈 𑣉𑣀𑣑𑣉𑣊 𑣕𑣁𑣓 𑣜𑣈, 𑣌𑣃𑣛𑣂 𑣌𑣁𑣈 𑣌𑣁𑣎𑣂𑣅𑣁𑣆, 𑢨𑣓 𑣌𑣉𑣛𑣁 𑣔𑣉 𑣌𑣁𑣈 𑣁𑣞𑣃𑣚𑣉𑣄 , 𑣔𑣃𑣌𑣃𑣋𑣈 𑣙𑣉𑣜𑣁 𑣘𑣁𑣀𑣎𑣁𑣆. 𑣢𑣡𑣨- 𑢬𑣉𑣛𑣁 𑣌𑣁𑣁 𑣌𑣃𑣚𑣂 𑣌𑣈𑣈𑣕𑣈, 𑣉𑣌𑣉𑣓 𑣌𑣃𑣛𑣂 𑣈𑣖𑣈𑣅𑣁𑣀, 𑢳𑣁𑣖𑣁𑣁𑣔𑣈𑣜 𑣌𑣃𑣛𑣂 𑣕𑣁𑣓𑣁𑣈, 𑣞𑣁𑣜𑣂𑣕𑣁𑣓𑣁 𑣓𑣈𑣅𑣁𑣀. 𑣢𑣡𑣩- 𑢩𑣌𑣉𑣓 𑣌𑣉𑣛𑣁 𑣌𑣃𑣛𑣂 𑣌𑣂𑣊, 𑣑𑣂𑣀𑣑𑣁𑣜𑣈 𑣎𑣃𑣛𑣂 𑣚𑣈𑣌𑣁, 𑢾𑣉𑣀𑣎𑣉𑣌𑣉 𑣓𑣁𑣖 𑣌𑣈𑣈𑣜𑣈, 𑣌𑣁𑣌𑣂𑣊 𑣉𑣅𑣉𑣚𑣈𑣓𑣁. 𑣢𑣢𑣠- 𑢳𑣂𑣜𑣞𑣁𑣀𑣔𑣂 𑣁𑣜 𑣘𑣉𑣓𑣁𑣆𑣀 𑣖𑣃𑣞𑣂𑣊, 𑣁𑣚𑣉𑣖 𑣙𑣉𑣅𑣉𑣓𑣁, 𑢹𑣉𑣛𑣉𑣖𑣉 𑣜𑣁𑣘𑣃𑣑 𑣆𑣑𑣉𑣄 𑣗𑣉𑣔𑣈, 𑣝𑣁𑣞𑣕𑣉𑣜 𑣌𑣁𑣎𑣂 𑣕𑣁𑣓𑣁. 𑣢𑣢𑣡- 𑢩𑣛𑣁𑣄𑣅𑣕𑣈 𑣉𑣀𑣑𑣉𑣊 𑣕𑣁𑣓𑣜𑣈, 𑣝𑣁𑣅𑣑 𑣞𑣁𑣚𑣁𑣅 𑣖𑣈, 𑢩𑣌𑣉𑣓𑣖𑣃𑣒𑣁𑣕𑣈 𑣝𑣁𑣅𑣑 𑣞𑣈𑣞𑣈𑣓 , 𑣈𑣓 𑣌𑣁𑣒𑣁𑣋𑣈 𑣖𑣁𑣐𑣁𑣊 𑣖𑣈. 𑣢𑣢𑣢- 𑢮𑣈𑣕𑣁𑣓 𑣌𑣁𑣖𑣂𑣖 𑣞𑣈𑣓𑣉𑣄 𑣕𑣁𑣓𑣜𑣈, 𑣗𑣂𑣚𑣁𑣅 𑣌𑣈𑣞𑣈𑣑 𑣌𑣈𑣖 𑣜𑣈, 𑢶𑣂𑣑 𑣌𑣁𑣒𑣁 𑣇𑣞𑣁 𑣌𑣁𑣕𑣈, 𑣖𑣁𑣀𑣑𑣁 𑣇𑣜𑣁𑣅 𑣖𑣈𑣜𑣈. 𑣢𑣢𑣣- 𑢬𑣁𑣖𑣂𑣕𑣈 𑣞𑣈𑣓𑣉𑣄 𑣙𑣉𑣜𑣁𑣜𑣈, 𑣔𑣁𑣄𑣏𑣁𑣒𑣃𑣖 𑣓𑣈𑣚 𑣌𑣈𑣑𑣁, 𑢾𑣈𑣌𑣁𑣛𑣁 𑣋𑣈 𑣖𑣈𑣓𑣈𑣖 𑣕𑣁𑣖, 𑣌𑣁𑣖𑣂𑣖 𑣘𑣃𑣜𑣁 𑣌𑣈𑣑𑣁. 𑣢𑣢𑣤- 𑢶𑣈𑣓𑣈 𑣕𑣁𑣓𑣁𑣖 𑣁𑣍𑣋𑣈 𑣓𑣈𑣌𑣁, 𑣈𑣓𑣌𑣁 𑣜𑣂𑣌𑣁𑣅 𑣕𑣁𑣓𑣁, 𑢨𑣓𑣁𑣔𑣉 𑣗𑣁𑣓𑣉 𑣞𑣂𑣜𑣖𑣁𑣔𑣁𑣛𑣈, 𑢨𑣓𑣌𑣁 𑣆𑣏𑣂𑣖 𑣕𑣁𑣓𑣁. 𑣢𑣢𑣥- 𑢬𑣁𑣁𑣀𑣞𑣈𑣄 𑣖𑣈𑣑 𑣌𑣉𑣛𑣁-𑣌𑣃𑣛𑣂𑣌𑣉, 𑣌𑣁𑣌𑣉 𑣞𑣁𑣔𑣃 𑣕𑣁𑣓𑣁, 𑢬𑣁𑣁𑣗𑣃𑣜𑣃𑣓𑣁 𑣌𑣃𑣛𑣂𑣌𑣉 𑣞𑣁𑣜𑣂, 𑣞𑣁𑣜𑣂𑣌𑣉 𑣗𑣁𑣖𑣁𑣚𑣂𑣓𑣁. 𑣢𑣢𑣦- 𑢺𑣈𑣄 𑣏𑣃𑣒𑣁𑣜𑣈 𑣙𑣈𑣀𑣔𑣈 𑣌𑣃𑣛𑣂𑣔𑣉 , 𑣁𑣚𑣉𑣖𑣁𑣄 𑣋𑣈𑣅𑣁, 𑢡𑣖𑣉𑣉𑣀 𑣎𑣃𑣔𑣂𑣖 𑣙𑣈𑣀𑣔𑣈𑣅𑣁 𑣌𑣁𑣓𑣁, 𑣗𑣃𑣋𑣂 𑣕𑣁𑣓 𑣋𑣈𑣅𑣁. 𑣢𑣢𑣧- 𑢡𑣅𑣃𑣗 𑣞𑣉𑣖𑣁𑣅 𑣌𑣃𑣛𑣂𑣅𑣉𑣄𑣌𑣉, 𑣌𑣁𑣌𑣉 𑣙𑣉𑣉𑣓 𑣋𑣈𑣅𑣁, 𑢽𑣃𑣓𑣂𑣗𑣁𑣜𑣜𑣈 𑣌𑣃𑣛𑣂𑣅𑣉𑣄 𑣌𑣉, 𑣗𑣁𑣖𑣁𑣚𑣂𑣅𑣉𑣄 𑣋𑣈𑣅𑣁. 𑣢𑣢𑣨- 𑢽𑣃𑣓𑣂𑣗𑣁𑣜𑣜𑣈 𑣎𑣉𑣓𑣉𑣖𑣉𑣄𑣌𑣉, 𑣌𑣁𑣌𑣉 𑣎𑣉𑣉𑣕𑣉𑣓𑣁, 𑢫𑣃𑣜𑣃𑣗𑣁𑣜 𑣜𑣈 𑣎𑣉𑣓𑣉𑣖𑣈𑣄 𑣌𑣉, 𑣈𑣞𑣃 𑣌𑣉 𑣎𑣉𑣕𑣉𑣓𑣁. 𑣢𑣢𑣩- 𑢯𑣁𑣑𑣃𑣆 𑣜𑣈𑣁𑣁𑣄 𑣎𑣁𑣋𑣁𑣜 𑣁𑣜, 𑣗𑣁𑣜𑣃 𑣗𑣃𑣒𑣁 𑣇𑣀𑣗𑣃𑣚, 𑢬𑣁𑣍𑣁𑣄 𑣌𑣁𑣍𑣁𑣄 𑣖𑣈𑣓𑣈𑣜𑣈𑣅𑣉, 𑣗𑣁𑣑𑣋𑣈 𑣕𑣉𑣕𑣉𑣚. 𑣢𑣣𑣠- 𑢫𑣂𑣀𑣔𑣃𑣜𑣃 𑣗𑣂𑣊𑣈𑣄 𑣎𑣂𑣂𑣑 𑣌𑣉𑣁, 𑣉𑣌𑣉𑣓 𑣖𑣁𑣕𑣈 𑣓𑣈𑣚𑣁𑣆, 𑢧𑣔𑣃𑣗 𑣗𑣁𑣁𑣓 𑣓𑣁𑣖𑣁 𑣙𑣉𑣛𑣉, 𑣁𑣚𑣉𑣖 𑣕𑣁𑣚𑣁 𑣙𑣉𑣜𑣁𑣆. 𑣢𑣣𑣡- 𑢸𑣃𑣌𑣃𑣜𑣂 𑣜𑣉𑣉𑣎𑣁𑣓 𑣜𑣈 𑣎𑣁𑣌𑣈, 𑣌𑣉𑣛𑣉𑣌𑣉 𑣁𑣕𑣂𑣊 𑣋𑣈𑣅𑣁, 𑢴𑣃𑣌𑣃𑣜𑣈 𑣖𑣈𑣓𑣁𑣄𑣆 𑣎𑣃𑣛𑣂 𑣏𑣃𑣆𑣚𑣁, 𑣌𑣁𑣌𑣉 𑣗𑣁𑣋𑣂𑣂𑣋𑣈𑣅𑣁. 𑣢𑣣𑣢- 𑢵𑣉𑣁 𑣁𑣜 𑣔𑣁𑣄 𑣚𑣈𑣌𑣁, 𑣎𑣃𑣛𑣂𑣓 𑣋𑣁𑣕𑣂𑣓 𑣌𑣉, 𑢳𑣉𑣞𑣂𑣗 𑣕𑣈𑣌𑣉 𑣓𑣁𑣖𑣉𑣄, 𑣖𑣂𑣑𑣋𑣈 -𑣖𑣂𑣑𑣋𑣈 𑣞𑣁𑣓𑣁𑣊 𑣌𑣉. 𑣢𑣣𑣣- 𑢮𑣉𑣎𑣉 𑣗𑣃𑣒𑣁𑣜𑣈 𑣔𑣃𑣗 𑣋𑣂𑣕𑣂𑣄, 𑣓𑣉𑣞𑣂𑣗 𑣌𑣁𑣜𑣁𑣗𑣈𑣓𑣁, 𑢧𑣚𑣂 𑣗𑣃𑣒𑣁𑣜𑣈 𑣔𑣃𑣗 𑣋𑣂𑣕𑣂𑣄 , 𑣓𑣉𑣞𑣂𑣗 𑣞𑣉𑣎𑣂𑣉𑣚𑣈𑣓𑣁. 𑣢𑣣𑣤- 𑢹𑣁𑣞𑣃𑣜 𑣞𑣁𑣄 𑣜𑣈 𑣗𑣁𑣆 𑣁𑣜, 𑣕𑣃𑣜𑣉𑣄 𑣞𑣁𑣄 𑣜𑣈 𑣎𑣉𑣎𑣉, 𑢵𑣁𑣆𑣓 𑣜𑣈𑣔𑣉 𑣙𑣁𑣞𑣃 𑣔𑣃𑣌𑣃 , 𑣎𑣁𑣉𑣋𑣈 𑣜𑣉𑣎𑣉 𑣗𑣉𑣎𑣉. 𑣢𑣣𑣥- 𑢲𑣁𑣌𑣁 𑣌𑣃𑣀𑣗𑣃𑣛𑣃 𑣌𑣈𑣈𑣕𑣈 , 𑣈𑣞𑣁 𑣓𑣁𑣖 𑣔𑣈𑣈𑣀𑣋𑣁 𑣌𑣉, 𑢵𑣁𑣅𑣃𑣓 𑣚𑣈𑣌𑣁 𑣖𑣈𑣑𑣔𑣁𑣄 𑣎𑣉𑣜𑣉𑣅 , 𑣎𑣁𑣚𑣃𑣁 𑣎𑣃𑣛𑣂 𑣌𑣉. 𑣢𑣣𑣦- 𑢳𑣈𑣆𑣀 𑣈𑣓𑣂𑣀𑣅𑣁𑣄 𑣔𑣃𑣁𑣜 𑣎𑣁𑣉𑣋𑣈, 𑣔𑣃𑣗 𑣔𑣁𑣘𑣁𑣚 𑣌𑣉, 𑢬𑣁𑣜𑣁𑣗𑣉𑣄 𑣌𑣉 , 𑣈𑣒𑣁𑣄 𑣉𑣛𑣁𑣄, 𑣋𑣂𑣕𑣂𑣄 𑣗𑣁𑣞𑣁𑣓𑣌𑣉. 𑣢𑣣𑣧- 𑢾𑣈𑣕𑣁𑣄 𑣉𑣛𑣁𑣓 𑣕𑣉𑣁𑣜𑣈 𑣉𑣛𑣁𑣓, 𑣕𑣂𑣌𑣂𑣓𑣁𑣄 𑣔𑣉 𑣔𑣁𑣄 𑣜𑣈, 𑢡𑣅𑣃𑣗 𑣇𑣛𑣂 𑣉𑣛𑣁𑣓 𑣓𑣂𑣄𑣔𑣉, 𑣖𑣈𑣓𑣈𑣖 𑣖𑣁𑣅𑣁𑣖 𑣋𑣁𑣛𑣁 𑣜𑣈. 𑣢𑣣𑣨- 𑢷𑣁𑣚𑣈𑣄 𑣈𑣜𑣁𑣕𑣈 𑣙𑣉𑣛𑣉𑣖𑣉𑣕𑣁𑣖, 𑣚𑣈𑣋𑣈𑣄 𑣗𑣈𑣋𑣈𑣄𑣓𑣁. 𑢡𑣔𑣉𑣛𑣉 𑣈𑣜𑣁𑣕𑣈 𑣙𑣉𑣛𑣖𑣉 𑣕𑣁𑣖, 𑢾𑣈𑣌𑣁𑣛𑣁 𑣙𑣁𑣛𑣁𑣖𑣈𑣓𑣁. 𑣢𑣣𑣩- 𑢧𑣒𑣁 𑣗𑣁𑣋𑣈𑣅𑣁 𑣕𑣁𑣛𑣂 𑣖𑣁𑣀𑣑𑣂𑣔𑣉, 𑣞𑣈𑣕𑣁 𑣚𑣉𑣌𑣁𑣅 𑣋𑣈𑣅𑣁, 𑢡𑣚𑣉𑣖 𑣇𑣔𑣃 𑣗𑣈𑣅𑣁 𑣙𑣉𑣛𑣉𑣌𑣉, 𑣚𑣁𑣀𑣔𑣁 𑣘𑣉𑣞𑣉𑣛𑣁𑣖𑣈𑣅𑣁. 𑣢𑣤𑣠- 𑢬𑣁𑣋𑣈 𑣗𑣃𑣋𑣂𑣅𑣁 𑣋𑣉𑣘𑣉𑣀𑣔𑣈 𑣁𑣜, 𑣘𑣂𑣜𑣉𑣕𑣂 𑣔𑣁𑣞𑣂 𑣚𑣉𑣕𑣈, 𑢬𑣁𑣋𑣈 𑣗𑣃𑣋𑣂𑣅𑣁 𑣕𑣈𑣘𑣈𑣋𑣁 𑣁𑣜, 𑣋𑣉𑣚𑣁𑣊 𑣞𑣈𑣕𑣁 𑣚𑣉𑣕𑣈. 𑣢𑣤𑣡- 𑢫𑣉𑣜𑣉𑣎𑣉 𑣉𑣛𑣉𑣊 𑣔𑣂𑣝𑣃𑣖 𑣙𑣉𑣊𑣉𑣌𑣌𑣉, 𑣖𑣂𑣞𑣁 𑣙𑣁𑣋𑣁 𑣖𑣂𑣞𑣁𑣀𑣁𑣋𑣁𑣓𑣁, 𑢫𑣉𑣜𑣉𑣎𑣉 𑣋𑣈 𑣏𑣈𑣘𑣈𑣜𑣈𑣗 𑣁𑣜, 𑣙𑣂𑣘𑣂𑣚𑣁 𑣆𑣏𑣂𑣗𑣃 𑣕𑣁𑣓𑣁, 𑣢𑣤𑣢- 𑢫𑣃𑣜𑣃 𑣌𑣁𑣖 𑣖𑣁𑣆𑣓𑣂𑣀 𑣜𑣈, 𑣋𑣈𑣅𑣁𑣓 𑣗𑣁𑣓𑣉𑣄 𑣋𑣈𑣅𑣁, 𑢫𑣈𑣅𑣁𑣓 𑣗𑣈𑣋𑣁𑣜 𑣓𑣈𑣓 𑣞𑣂𑣜𑣎𑣉𑣓, 𑣔𑣃𑣌𑣃 𑣞𑣃𑣓𑣁𑣊 𑣋𑣈𑣅𑣁. 𑣢𑣤𑣣- 𑢫𑣃𑣜𑣃 𑣏𑣈𑣚𑣁𑣌𑣉 𑣓𑣃𑣆𑣚𑣁 𑣖𑣁𑣌𑣉, 𑣘𑣂𑣜𑣉𑣕𑣂 𑣈𑣅𑣉𑣗 𑣌𑣈𑣑𑣁, 𑢫𑣃𑣜𑣃 𑣖𑣃𑣜𑣃𑣌𑣃 𑣏𑣂 𑣏𑣈𑣚𑣁, 𑣌𑣁𑣗𑣃 𑣌𑣁𑣗𑣃 𑣁𑣔𑣁 𑣌𑣈𑣑𑣁. 𑣢𑣤𑣤- 𑢾𑣂𑣔𑣁 𑣔𑣂𑣓𑣁𑣄 𑣞𑣉𑣕𑣉 𑣓𑣃𑣆𑣚𑣁, 𑣏𑣁𑣌𑣁𑣑 𑣆𑣔𑣂𑣓 𑣕𑣁𑣓𑣁, 𑢯𑣁𑣀𑣑𑣃𑣄 𑣌𑣈𑣏𑣁𑣄 𑣓𑣁𑣗𑣃 𑣖𑣈𑣓𑣚𑣈𑣑, 𑣈𑣓𑣁𑣉 𑣏𑣁𑣌𑣁𑣑 𑣕𑣁𑣓𑣁. 𑣢𑣤𑣥- 𑢾𑣂𑣔𑣁𑣌𑣉 𑣒𑣉𑣒𑣁 𑣚𑣈𑣓𑣁 𑣓𑣃𑣆𑣚𑣁𑣌𑣉, 𑣒𑣉𑣒𑣁 𑣈𑣅𑣉𑣗 𑣎𑣁𑣓𑣁, 𑢾𑣂𑣀𑣋𑣂 𑣏𑣁𑣓𑣁𑣗 𑣓𑣂𑣔𑣉 𑣙𑣃𑣎𑣃𑣄 , 𑢳𑣈𑣅𑣁𑣋𑣈 𑣞𑣁𑣜𑣂 𑣕𑣁𑣓𑣁. 𑣢𑣤𑣦- 𑢬𑣉𑣉𑣚 𑣕𑣂𑣞𑣂𑣊 𑣇𑣒𑣁𑣓 𑣖𑣈, 𑣙𑣃𑣑𑣋𑣁𑣀 𑣝𑣂𑣀𑣋𑣂 𑣕𑣃𑣜 𑣎𑣁𑣓, 𑢷𑣈𑣈𑣔𑣈 𑣋𑣈𑣅𑣁𑣓 𑣞𑣁𑣗𑣈𑣓 𑣞𑣁𑣗𑣈𑣖 𑣁𑣖𑣁𑣄, 𑣔𑣂𑣓𑣋𑣈 𑣔𑣁𑣁𑣜𑣁 𑣕𑣁𑣓. 𑣢𑣤𑣧- 𑢮𑣁𑣘𑣂𑣑𑣁 𑣌𑣁𑣕𑣈 𑣁𑣚𑣉𑣖 𑣞𑣁𑣗𑣈, 𑣔𑣂𑣌𑣃 𑣜𑣂𑣕𑣂 𑣓𑣂𑣕𑣂 𑣌𑣉, 𑢼𑣁𑣌𑣂 𑣙𑣉𑣚𑣂𑣌𑣉 𑣖𑣁𑣓𑣁𑣕𑣂𑣊𑣕𑣁𑣓𑣁, 𑣞𑣂𑣕𑣃𑣜𑣃 𑣌𑣉𑣉𑣚 𑣌𑣉. 𑣢𑣤𑣨- 𑢮𑣁𑣀𑣋𑣂 𑣕𑣃𑣀𑣑𑣃 𑣖𑣈𑣑 𑣔𑣉𑣀𑣔𑣁 𑣚𑣉𑣕𑣈, 𑣁𑣖𑣉𑣀𑣖 𑣓𑣂𑣜𑣈 𑣜𑣈𑣔𑣉, 𑢯𑣉𑣌𑣉𑣛𑣁 𑣜𑣈𑣋𑣈 𑣗𑣃𑣛𑣁 𑣚𑣉𑣕𑣈𑣖, 𑣋𑣉𑣎𑣉𑣄 𑣈𑣓 𑣜𑣈𑣔𑣉. 𑣢𑣤𑣩- 𑢾𑣉𑣔𑣉𑣜𑣂𑣓𑣖𑣈 ,𑣞𑣈𑣐𑣁𑣓𑣖𑣈, 𑣁𑣖𑣁𑣄 𑣉𑣛𑣉𑣊 𑣕𑣈𑣋𑣈, 𑢫𑣈𑣚 𑣏𑣁𑣀𑣑𑣉𑣚 𑣗𑣉𑣏𑣉𑣜, 𑣎𑣂𑣂𑣑𑣉𑣄𑣖 𑣞𑣁𑣜𑣂 𑣕𑣈𑣋𑣈. 𑣢𑣥𑣠- 𑢾𑣃𑣌𑣃𑣋𑣈 𑣞𑣉𑣜𑣉𑣋𑣉, 𑣔𑣃𑣌𑣃𑣋𑣈 𑣓𑣉𑣜𑣉𑣌𑣉,𑣈𑣒𑣁𑣄 𑣗𑣁𑣓𑣉𑣄𑣁𑣀, 𑢾𑣂𑣕𑣃𑣜𑣃 𑣇𑣛𑣃𑣄 𑣕𑣁𑣖𑣈, 𑣝𑣂𑣖 𑣕𑣉𑣚 𑣗𑣁𑣓𑣉𑣄𑣁𑣀. 𑣢𑣥𑣡- 𑢶𑣁𑣅𑣉𑣖 𑣘𑣉𑣁-𑣘𑣉𑣁𑣜𑣈 𑣔𑣂𑣌𑣃, 𑣗𑣉𑣜𑣉 𑣗𑣉𑣚𑣉𑣁 𑣌𑣁𑣓𑣁, 𑢷𑣈𑣋𑣁𑣜 𑣙𑣃𑣑𑣋𑣁𑣀 𑣌𑣂𑣕𑣁𑣗, 𑣓𑣈𑣓𑣁 𑣌𑣁𑣋𑣈 𑣁𑣕𑣉𑣖𑣈𑣓𑣁. 𑣢𑣥𑣢- 𑢷𑣂𑣕𑣂 𑣁𑣜𑣎𑣁𑣉 𑣚𑣁𑣋𑣂𑣑, 𑣔𑣂𑣌𑣃 𑣘𑣁𑣛𑣁𑣉 𑣈𑣕𑣉𑣓 𑣖𑣈, 𑢮𑣁𑣕𑣂 𑣜𑣁𑣌𑣁𑣗 𑣚𑣁𑣋𑣂𑣑 , 𑣉𑣁𑣜𑣁𑣊 𑣏𑣂𑣕𑣂 𑣈𑣕𑣉𑣓 𑣖𑣈. 𑣢𑣥𑣣- 𑢨𑣒𑣁𑣄 𑣌𑣉𑣁𑣄 𑣔𑣃𑣌𑣃 𑣇𑣜𑣃𑣖𑣈, 𑣓𑣂𑣄𑣋𑣈 𑣞𑣈𑣐𑣁 𑣙𑣉𑣛𑣉, 𑢨𑣒𑣁𑣄 𑣌𑣉𑣁𑣄 𑣔𑣃𑣌𑣃 𑣌𑣁𑣁, 𑣇𑣜𑣃𑣖𑣂𑣄 𑣋𑣈 𑣘𑣁𑣜𑣃 𑣔𑣉. 𑣢𑣥𑣤- 𑢵𑣂𑣛𑣂 𑣕𑣉𑣜𑣁𑣆 𑣗𑣁𑣜𑣖𑣃𑣌𑣁𑣄, 𑣞𑣂𑣇 𑣖𑣃𑣌𑣁 𑣚𑣈𑣄 𑣕𑣉𑣜𑣁𑣆, 𑢳𑣈𑣓𑣁𑣕𑣈 𑣖𑣃𑣞𑣂𑣊 𑣙𑣁𑣞𑣃𑣆, 𑣙𑣁𑣓𑣁𑣕𑣈 𑣎𑣁𑣉𑣋𑣈 𑣙𑣁𑣞𑣃𑣆. 𑣢𑣥𑣥- 𑢸𑣃𑣕𑣂 𑣘𑣁𑣛𑣁𑣉 𑣘𑣁𑣛𑣁𑣉 𑣕𑣈𑣖, 𑣘𑣁𑣜𑣁𑣁𑣘𑣃𑣜𑣃𑣃 𑣎𑣁𑣓𑣁, 𑢸𑣜𑣈𑣈𑣖 𑣏𑣈𑣓𑣁𑣄 𑣌𑣁𑣖 𑣇𑣜𑣃𑣖𑣁𑣓, 𑣌𑣁𑣋𑣈𑣖 𑣞𑣈𑣐𑣁 𑣎𑣁𑣓𑣁. 𑣢𑣥𑣦- 𑢹𑣈𑣈 𑣞𑣂𑣊𑣗𑣉𑣀𑣋𑣁 𑣆𑣖𑣂𑣓𑣁𑣊 𑣋𑣈, 𑣗𑣂𑣕𑣂 𑣈𑣖𑣁𑣍 𑣖𑣈, 𑢡𑣍 𑣁𑣜 𑣌𑣃𑣘𑣃𑣚𑣌𑣉, 𑣗𑣁𑣜 𑣞𑣁𑣀𑣎𑣉𑣚𑣈 𑣎𑣉𑣖𑣈, 𑣢𑣥𑣧- 𑢶𑣁𑣅𑣉𑣖 𑣗𑣉𑣀𑣋𑣁 𑣗𑣉𑣀𑣋𑣁𑣕𑣈, 𑣖𑣁𑣅𑣁𑣖 𑣁𑣍𑣈𑣑 𑣕𑣁𑣓, 𑢶𑣁𑣅𑣁𑣖 𑣌𑣁𑣁 𑣗𑣉𑣀𑣋𑣁 𑣕𑣁𑣓𑣌𑣉, 𑣏𑣂𑣚𑣂𑣌𑣁 𑣖𑣉𑣒𑣁𑣁 𑣌𑣁𑣓. 𑣢𑣥𑣨- 𑢸𑣈𑣕𑣉𑣊 𑣁𑣜 𑣌𑣃𑣛𑣂 𑣚𑣉𑣉𑣗𑣉, 𑣎𑣃𑣔𑣂 𑣕𑣁𑣓𑣁𑣖 𑣁𑣖, 𑢸𑣁𑣀𑣑𑣂𑣕 𑣜𑣈𑣅𑣉𑣉 𑣖𑣃𑣜𑣃𑣌𑣃 𑣕𑣁𑣓𑣁𑣖, 𑣓𑣈𑣅𑣁𑣀 𑣇𑣛𑣃𑣄 𑣕𑣁𑣖. 𑣢𑣥𑣩- 𑢹𑣁𑣅𑣄 𑣖𑣈𑣓𑣈 𑣈𑣒𑣁𑣄 𑣌𑣉𑣁𑣄, 𑣔𑣃𑣌𑣃𑣜𑣈 𑣜𑣈𑣀𑣋𑣈𑣄 𑣙𑣉𑣛𑣉, 𑢩𑣌𑣉𑣅 𑣌𑣁𑣌𑣉 𑣙𑣁𑣅𑣓𑣁𑣅𑣁, 𑣓𑣈𑣚𑣕𑣈 𑣜𑣈𑣀𑣋𑣈𑣄 𑣙𑣉𑣛𑣉. 𑣢𑣦𑣠- 𑢦𑣖𑣂𑣓𑣊 𑣋𑣈 𑣏𑣃𑣀𑣔𑣃𑣚𑣁𑣅𑣖𑣈 , 𑣏𑣂𑣖𑣂𑣓 𑣎𑣂𑣚𑣂𑣊 𑣏𑣁𑣔𑣉𑣜, 𑢦𑣖𑣂𑣓𑣁𑣊 𑣋𑣈 𑣇𑣞𑣁𑣓𑣖𑣈, 𑣁𑣌𑣁𑣛𑣁 𑣏𑣂𑣖𑣂𑣓 𑣉𑣞𑣁𑣜. 𑣢𑣦𑣡- 𑢡𑣜𑣞𑣂𑣜𑣈 𑣏𑣂𑣚𑣂𑣌𑣁 𑣕𑣁𑣗𑣃, 𑣏𑣈𑣈𑣜𑣁 𑣓𑣈𑣚𑣉𑣄 𑣕𑣁𑣓𑣁, 𑢶𑣈𑣑𑣜𑣈 𑣕𑣁𑣗𑣃 𑣈𑣓𑣌𑣁, 𑣏𑣉𑣚𑣉𑣓 𑣓𑣈𑣚𑣉𑣄 𑣕𑣁𑣓𑣁. 𑣢𑣦𑣢- 𑢩𑣌𑣉𑣅 𑣉𑣌𑣉𑣓 𑣗𑣈𑣈𑣔𑣈 𑣁𑣔𑣁𑣁𑣓 , 𑣈𑣓𑣂𑣀 𑣈𑣓𑣋𑣈 𑣞𑣃𑣌𑣃𑣕𑣈, 𑢵𑣉𑣁𑣇 𑣇𑣚𑣂𑣄 𑣞𑣃𑣌𑣃𑣕𑣈 𑣁𑣜, 𑣌𑣁𑣁𑣄 𑣚𑣂𑣖𑣈𑣄 𑣙𑣁𑣅𑣁𑣕𑣈. 𑣢𑣦𑣣- 𑢾𑣈𑣕𑣁𑣉 𑣁𑣘𑣁𑣓 𑣜𑣁𑣏𑣁 𑣜𑣈𑣔𑣉, 𑣞𑣂𑣊𑣌𑣃𑣚𑣁 𑣋𑣈𑣄 𑣗𑣁𑣆𑣓, 𑢨𑣜𑣁𑣉 𑣌𑣉𑣁 𑣕𑣁𑣄 𑣜𑣈𑣔𑣉, 𑣞𑣁𑣖𑣁𑣈 𑣔𑣂𑣀𑣔𑣂𑣚𑣂𑣞𑣂𑣓. 𑣢𑣦𑣤- 𑢮𑣁𑣘𑣂𑣑 𑣎𑣁𑣘𑣂𑣑 𑣗𑣂𑣚𑣁𑣅 𑣚𑣈𑣌𑣁, 𑣕𑣉𑣁𑣖 𑣓𑣃𑣀𑣆 𑣜𑣈, 𑢬𑣁𑣌𑣉 𑣓𑣈𑣚𑣂𑣍 𑣁𑣚𑣉𑣖 𑣖𑣈𑣓𑣈, 𑣁𑣖𑣋𑣈 𑣎𑣁𑣘𑣂𑣑 𑣌𑣈𑣜𑣈. 𑣢𑣦𑣥- 𑢡𑣀𑣑𑣂𑣅𑣁 𑣇𑣜𑣂𑣄 𑣙𑣃𑣑𑣋𑣁𑣀 𑣚𑣈𑣑𑣁, 𑣌𑣃𑣚𑣁 𑣕𑣁𑣘𑣈𑣄 𑣎𑣁𑣓𑣁, 𑢴𑣂𑣌𑣃 𑣌𑣁𑣌𑣁𑣚𑣁 𑣁𑣅𑣃𑣖 𑣕𑣉𑣜𑣞𑣁, 𑣌𑣉𑣉𑣚 𑣇𑣌𑣃𑣓 𑣕𑣁𑣓𑣁𑣓𑣁. 𑣢𑣦𑣦- 𑢺𑣈𑣄𑣋𑣈 𑣌𑣁𑣈 𑣇𑣔𑣃𑣗 𑣔𑣁𑣛𑣂, 𑣉𑣌𑣉𑣓 𑣌𑣁𑣎𑣂 𑣌𑣉, 𑢨𑣞𑣃 𑣞𑣉𑣇𑣈𑣋𑣈 𑣖𑣈𑣑 𑣇𑣔𑣃𑣗𑣈 , 𑣎𑣂𑣗𑣉𑣓 𑣞𑣁𑣓𑣁𑣊𑣌𑣉. 𑣢𑣦𑣧- 𑢩𑣌𑣉𑣅𑣉𑣉 𑣌𑣁𑣈 𑣖𑣈𑣓𑣈 𑣁𑣍𑣁𑣄, 𑣑𑣂𑣅𑣁𑣊 𑣖𑣉𑣜𑣉𑣈 𑣋𑣈𑣅𑣁, 𑢲𑣃𑣗𑣂 𑣖𑣁𑣒𑣁𑣉𑣈 𑣖𑣈𑣓𑣈, 𑣁𑣍 𑣋𑣈 𑣖𑣉𑣈 𑣋𑣈𑣅𑣁. 𑣢𑣦𑣨- 𑢴𑣁𑣁𑣓 𑣕𑣈𑣓 𑣋𑣃𑣀𑣑𑣂 𑣔𑣁𑣒𑣁, 𑣌𑣁𑣌𑣉 𑣚𑣈𑣌𑣁𑣆 𑣋𑣈𑣅𑣁, 𑢺𑣁𑣍𑣏𑣁 𑣕𑣈𑣓 𑣈𑣜𑣁𑣉 𑣉𑣌𑣉𑣅, 𑣌𑣁𑣌𑣉 𑣙𑣂𑣚𑣁𑣆 𑣋𑣈𑣅𑣁. 𑣢𑣦𑣩- 𑢺𑣁𑣁𑣗𑣉 𑣗𑣈𑣋𑣁𑣜 𑣎𑣈𑣕𑣁𑣓 𑣌𑣁𑣖𑣂, 𑣌𑣁𑣁 𑣜𑣂𑣌𑣁 𑣕𑣁𑣓𑣌𑣉, 𑢹𑣁𑣚𑣈-𑣑𑣁𑣚𑣈 𑣕𑣈𑣋𑣈 𑣓𑣈𑣚𑣈𑣖, 𑣎𑣂𑣗𑣉𑣓 𑣞𑣈𑣓𑣉𑣄 𑣕𑣁𑣌𑣉. 𑣢𑣧𑣠- 𑢩𑣛𑣁𑣄 𑣜𑣈𑣅𑣁𑣄 𑣎𑣂𑣚𑣃 𑣇𑣕𑣃, 𑣌𑣁𑣁 𑣓𑣉𑣋𑣉𑣑 𑣌𑣉𑣁, 𑢡𑣞𑣂 𑣁𑣋𑣃 𑣁𑣛𑣁𑣄 𑣇𑣕𑣃, 𑣈𑣞𑣃 𑣓𑣉𑣋𑣉𑣑 𑣌𑣉𑣁. 𑣢𑣧𑣡- 𑢷𑣁𑣘𑣁𑣋𑣈 𑣚𑣈𑣓 𑣌𑣉𑣛𑣁-𑣌𑣃𑣛𑣂𑣊, 𑣚𑣁𑣀𑣔𑣁𑣅 𑣎𑣁𑣋𑣁𑣜 𑣜𑣈𑣅𑣉𑣉, 𑢴𑣁𑣘𑣁𑣚 𑣈𑣞𑣈𑣑 𑣋𑣁𑣉 𑣚𑣈𑣌𑣁 𑣋𑣈, 𑣎𑣂𑣂𑣜𑣈 𑣈𑣒𑣁𑣄 𑣙𑣉𑣉. 𑣢𑣧𑣢- 𑢬𑣃𑣛𑣂 𑣁𑣜 𑣔𑣉𑣜𑣈𑣅𑣁 𑣔𑣉𑣌𑣂𑣊, 𑣖𑣂𑣑 𑣞𑣉𑣖𑣁𑣓𑣁, 𑢮𑣁𑣁 𑣏𑣂𑣖𑣂𑣓𑣈𑣖 𑣈𑣖𑣁𑣌𑣂𑣊 𑣜𑣈, 𑣌𑣁𑣌𑣂𑣊 𑣙𑣁𑣜𑣉𑣗𑣈𑣓𑣁. 𑣢𑣧𑣣- 𑢬𑣃𑣚𑣋𑣂𑣅𑣁-𑣎𑣂𑣗𑣉𑣓 𑣞𑣃𑣌𑣃, 𑣞𑣁𑣜𑣂𑣕𑣈 𑣖𑣁𑣜𑣁𑣊 𑣕𑣁𑣓𑣁, 𑢮𑣁𑣕𑣂𑣙𑣃𑣔𑣁 𑣞𑣃𑣌𑣃 𑣖𑣈𑣓𑣔𑣉, 𑣁𑣜𑣋𑣈 𑣖𑣁𑣜𑣁𑣊 𑣕𑣁𑣓𑣁. 𑣢𑣧𑣤- 𑢬𑣃𑣚𑣋𑣂𑣅𑣁-𑣎𑣂𑣗𑣉𑣓 𑣞𑣃𑣌𑣃 𑣓𑣁𑣖𑣉𑣄, 𑣉𑣛𑣁𑣄 𑣇𑣀𑣗𑣃𑣚 𑣜𑣈𑣋𑣈, 𑢩𑣛𑣁𑣄 𑣇𑣀𑣗𑣃𑣚 𑣓𑣁𑣖𑣉𑣄, 𑣙𑣃𑣔𑣁 𑣕𑣁𑣚𑣁 𑣜𑣈𑣋𑣈. 𑣢𑣧𑣥- 𑢮𑣁𑣕𑣂𑣙𑣃𑣔𑣁 𑣞𑣃𑣌𑣃𑣆 𑣕𑣈𑣅𑣉𑣉, 𑣖𑣁𑣓𑣂𑣖𑣂 𑣞𑣃𑣌𑣃 𑣖𑣁𑣜𑣁𑣊, 𑢶𑣁𑣓𑣂𑣖𑣂𑣜𑣈 𑣌𑣁𑣖 𑣎𑣉𑣘𑣉𑣕𑣉𑣓, 𑣎𑣂𑣗𑣉𑣓 𑣙𑣁𑣜𑣁𑣊 𑣙𑣁𑣜𑣁𑣊. 𑣢𑣧𑣦- 𑢵𑣉𑣜𑣁𑣆 𑣕𑣈𑣅𑣁𑣄 𑣎𑣂𑣓𑣂𑣕𑣁𑣉 𑣔𑣉, 𑣖𑣃𑣞𑣂𑣊 𑣗𑣁𑣜𑣞𑣂𑣊 𑣋𑣈, 𑢶𑣉𑣓𑣉𑣖 𑣎𑣂𑣕𑣁𑣓 𑣜𑣈𑣔𑣉, 𑣎𑣉𑣜𑣉𑣊 𑣎𑣉𑣜𑣉𑣊 𑣎𑣁𑣌𑣈. 𑣢𑣧𑣧- 𑢯𑣁𑣌𑣁𑣑 𑣎𑣃𑣔𑣂𑣖 𑣌𑣁𑣎𑣂𑣂 𑣕𑣁𑣓𑣁, 𑣗𑣃𑣋𑣂𑣕𑣈 𑣇𑣛𑣃𑣄 𑣕𑣁𑣁𑣖, 𑢾𑣁𑣜𑣂 𑣎𑣃𑣔𑣂𑣖 𑣌𑣁𑣎𑣂𑣂 𑣕𑣁𑣓𑣁, 𑣜𑣂𑣂𑣊 𑣕𑣁𑣁 𑣜𑣈𑣅𑣉𑣉𑣖. 𑣢𑣧𑣨- 𑢸𑣈𑣀𑣔𑣉𑣜𑣉𑣑 𑣌𑣉𑣈 𑣗𑣉𑣜𑣉𑣕𑣈, 𑣌𑣉𑣖𑣎𑣉𑣉𑣜 𑣙𑣃𑣔𑣁, 𑢷𑣁𑣛𑣂𑣎 𑣌𑣉𑣋𑣈𑣄 𑣗𑣉𑣜𑣉𑣕𑣈, 𑣎𑣉𑣗𑣉𑣔𑣁𑣁𑣜 𑣙𑣃𑣔𑣁. 𑣢𑣧𑣩- 𑢬𑣃𑣖𑣃 𑣎𑣃𑣔𑣂𑣖 𑣗𑣁𑣋𑣈𑣈, 𑣎𑣂𑣗𑣉𑣓 𑣞𑣃𑣜𑣃𑣆𑣓𑣁, 𑢬𑣃𑣖𑣃 𑣎𑣃𑣔𑣂𑣖 𑣎𑣂𑣚𑣂𑣊𑣈, 𑣎𑣂𑣗𑣉𑣓 𑣎𑣂𑣚𑣂𑣊𑣈𑣓𑣁. 𑣢𑣨𑣠- 𑢾𑣁𑣗𑣈𑣓 𑣔𑣂𑣓 𑣓𑣂𑣅𑣁𑣖 𑣕𑣈𑣋𑣈, 𑣞𑣈𑣗𑣈𑣜𑣈 𑣔𑣃𑣌𑣃 𑣓𑣁𑣖𑣉𑣄, 𑢶𑣂𑣞𑣁 𑣖𑣂𑣞𑣁𑣔𑣉 𑣗𑣈𑣋𑣁𑣜 𑣓𑣂𑣅𑣁𑣖 , 𑣈𑣓𑣁𑣊 𑣞𑣃𑣌𑣃 𑣓𑣁𑣖𑣉𑣄. 𑣢𑣨𑣡- 𑢾𑣁𑣜𑣂𑣕𑣈 𑣞𑣃𑣓𑣁𑣊 𑣌𑣁𑣁𑣗𑣁𑣆𑣅𑣁, 𑣌𑣁𑣓𑣁 𑣓𑣈𑣓 𑣔𑣂𑣝𑣃𑣖, 𑢬𑣁𑣖 𑣗𑣁𑣚𑣁𑣕𑣂𑣊 𑣞𑣁𑣜𑣂𑣕𑣈 𑣞𑣃𑣓𑣁𑣊, 𑣞𑣈𑣓𑣈𑣜𑣈𑣔𑣉𑣖 𑣁𑣖. 𑣢𑣨𑣢- 𑢸𑣂𑣜𑣉𑣕𑣂 𑣗𑣁𑣕𑣂 𑣞𑣁𑣖𑣁𑣓𑣁𑣊𑣜𑣈, 𑣞𑣈𑣐𑣁 𑣗𑣁𑣕𑣂 𑣉𑣗𑣈𑣓, 𑢬𑣁𑣁𑣜𑣗𑣁𑣕𑣂 𑣞𑣁𑣖𑣁𑣓𑣁𑣊 𑣜𑣈, 𑣞𑣁𑣆𑣌𑣉𑣚 𑣗𑣁𑣕𑣂 𑣏𑣁𑣀𑣅𑣁𑣓. 𑣢𑣨𑣣- 𑢷𑣂𑣑𑣔𑣁 𑣖𑣈𑣓𑣁𑣄 𑣜𑣈𑣅𑣉𑣉 𑣗𑣂𑣛𑣁𑣊 , 𑣙𑣉𑣉 𑣗𑣉𑣜𑣉 𑣕𑣂𑣂𑣖𑣈, 𑢯𑣈𑣈𑣜𑣁 𑣖𑣈𑣓𑣁𑣄 𑣜𑣈𑣅𑣉𑣉 𑣗𑣁𑣖𑣁𑣚𑣂, 𑣈𑣜𑣁 𑣗𑣉𑣜𑣉𑣕𑣂𑣂𑣖𑣈. 𑣢𑣨𑣤- 𑢶𑣁𑣜𑣏𑣂 𑣌𑣁𑣁 𑣙𑣁𑣁𑣑𑣖𑣈𑣜𑣈, 𑣗𑣂𑣂𑣝𑣂 𑣋𑣈𑣜𑣁𑣉 𑣕𑣈𑣖𑣁, 𑢴𑣂𑣂𑣌𑣃 𑣗𑣁𑣁𑣗𑣉 𑣕𑣈𑣖 𑣜𑣈𑣔𑣉, 𑣔𑣃𑣌𑣃𑣋𑣈 𑣋𑣈𑣜𑣁𑣉 𑣕𑣈𑣖𑣁. 𑣢𑣨𑣥- 𑢶𑣂𑣞𑣁𑣋𑣈 𑣜𑣈𑣅𑣉𑣉 𑣘𑣂𑣜𑣉𑣕𑣂𑣆𑣚𑣂, 𑣎𑣃𑣔𑣂𑣖 𑣏𑣁𑣌𑣁 𑣌𑣈𑣑𑣁, 𑢴𑣁𑣞𑣂𑣅𑣉𑣉𑣋𑣈 𑣋𑣉𑣖𑣌𑣈 𑣞𑣉𑣖𑣁𑣓, 𑣋𑣈𑣖 𑣁𑣔𑣁 𑣚𑣈𑣑𑣁. 𑣢𑣨𑣦- 𑢩𑣌𑣉𑣓𑣁 𑣏𑣂𑣖𑣂𑣓 𑣋𑣈𑣖 𑣔𑣁𑣘𑣁𑣚𑣈, 𑣆𑣖𑣂𑣓 𑣋𑣈𑣌𑣉 𑣙𑣁𑣅𑣁𑣕𑣈, 𑢯𑣉𑣌𑣈𑣖 𑣏𑣂𑣘𑣃𑣑 𑣕𑣁𑣆𑣜𑣈 𑣎𑣁𑣌𑣈, 𑣜𑣁𑣁𑣖𑣈𑣌𑣉 𑣌𑣈𑣜𑣈 𑣖𑣈𑣒𑣈 𑣕𑣈. 𑣢𑣨𑣧- 𑢾𑣂𑣒𑣂𑣅𑣁 𑣎𑣃𑣔𑣂 𑣌𑣉𑣓𑣉𑣄 𑣖𑣈𑣕𑣁𑣓, 𑣙𑣁𑣓𑣁𑣚 𑣈𑣖𑣁𑣀𑣆 𑣖𑣈𑣋𑣈, 𑢫𑣈𑣅𑣁𑣓 𑣕𑣁𑣅 𑣞𑣁𑣋𑣉𑣖 𑣙𑣃𑣀𑣑𑣂𑣓, 𑣌𑣉𑣓𑣉𑣄 𑣠𑣌𑣉𑣓𑣉𑣄 𑣕𑣈𑣋𑣈. 𑣢𑣨𑣨- 𑢾𑣁𑣖𑣁𑣕𑣈 𑣓𑣁𑣖𑣉𑣄 𑣖𑣁𑣀𑣑𑣂 𑣇𑣕𑣃𑣌𑣉, 𑣉𑣌𑣉𑣅 𑣎𑣂𑣂𑣀 𑣓𑣁𑣖𑣈, 𑢯𑣃𑣆𑣚𑣁 𑣁𑣚𑣉𑣖 𑣞𑣁𑣜𑣂 𑣕𑣈𑣅𑣁, 𑣞𑣁𑣖𑣁𑣋𑣈 𑣈𑣅𑣁 𑣕𑣁𑣖𑣈. 𑣢𑣨𑣩- 𑢮𑣁𑣋𑣁𑣜 𑣕𑣁𑣓𑣜𑣈 𑣁𑣖𑣔𑣉 𑣖𑣂𑣞𑣁𑣉, 𑣌𑣁𑣈 𑣌𑣁𑣎𑣂 𑣆𑣏𑣂𑣅𑣁𑣖, 𑢨𑣓 𑣙𑣉𑣛𑣉𑣁𑣄 𑣎𑣂𑣖𑣁𑣜𑣈 𑣁𑣚𑣉𑣖, 𑣈𑣖𑣈 𑣋𑣂𑣓𑣂𑣞𑣂 𑣌𑣉 𑣕𑣁𑣖. 𑣢𑣩𑣠- 𑢼𑣈𑣀𑣋𑣈𑣄 𑣉𑣛𑣉𑣄 𑣈𑣜𑣁𑣔𑣉, 𑣞𑣁𑣗𑣈 𑣙𑣂𑣚𑣂𑣌𑣉 𑣖𑣈𑣕𑣁𑣆, 𑢳𑣁𑣆𑣌𑣂 𑣉𑣛𑣉𑣄 𑣈𑣜𑣁𑣔𑣉, 𑣞𑣁𑣗𑣈 𑣖𑣁𑣀𑣌𑣉 𑣖𑣈𑣕𑣁𑣆. 𑣢𑣩𑣡- 𑢹𑣁𑣚𑣖𑣁𑣑 𑣙𑣁𑣞𑣁 𑣎𑣉𑣖 𑣇𑣜𑣂𑣄, 𑣔𑣁𑣞𑣂𑣄 𑣋𑣉𑣀𑣔𑣈 𑣆𑣏𑣂, 𑢸𑣂𑣜𑣉𑣕𑣂 𑣎𑣃𑣀𑣗𑣃𑣆 𑣙𑣁𑣘𑣁𑣓𑣃𑣖, 𑣎𑣃𑣛𑣂𑣄 𑣋𑣉𑣀𑣔𑣈 𑣆𑣏𑣂. 𑣢𑣩𑣢- 𑢮𑣉𑣉 𑣓𑣈𑣚𑣕𑣈 𑣔𑣁𑣜𑣃 𑣇𑣜𑣃𑣖𑣉𑣄, 𑣙𑣉𑣓 𑣓𑣈𑣚𑣕𑣈 𑣁𑣘𑣃, 𑢹𑣉𑣓 𑣋𑣉𑣀𑣔𑣈 𑣜𑣈 𑣏𑣈𑣓𑣁𑣄 𑣙𑣉𑣗𑣁𑣓, 𑣔𑣉𑣝𑣂𑣔𑣉 𑣈𑣀𑣋𑣁 𑣁𑣘𑣃. 𑣢𑣩𑣣- 𑢹𑣃𑣔𑣁 𑣞𑣃𑣞𑣁𑣜𑣈𑣖 𑣞𑣁𑣓𑣁𑣊 𑣜𑣈𑣔𑣉, 𑣞𑣈𑣘𑣈𑣛𑣈𑣑 𑣌𑣉 𑣞𑣁𑣗𑣌𑣉𑣖, 𑢷𑣃𑣛𑣁 𑣗𑣃𑣛𑣂 𑣌𑣉 𑣈𑣅𑣁𑣅 𑣗𑣉𑣛𑣈, 𑣈𑣚𑣁 𑣈𑣚𑣁 𑣔𑣉𑣚𑣁 𑣌𑣉𑣖. 𑣢𑣩𑣤- 𑢴𑣃 𑣔𑣃𑣚𑣃𑣖 𑣏𑣂𑣌𑣁 𑣌𑣃𑣑𑣃𑣜𑣃𑣊𑣈, 𑣗𑣂𑣕𑣂 𑣖𑣈𑣓𑣁𑣄 𑣈𑣓𑣁𑣊, 𑢬𑣃𑣛𑣂 𑣈𑣓𑣌𑣁 𑣚𑣁𑣀𑣔𑣁𑣅, 𑣗𑣂𑣕𑣂 𑣖𑣈𑣓𑣁𑣄 𑣈𑣓𑣁𑣊. 𑣢𑣩𑣥-𑢴𑣃𑣌𑣃𑣜𑣈 𑣁𑣜 𑣞𑣃𑣌𑣃𑣜𑣈 𑣞𑣈𑣕𑣁, 𑣁𑣖 𑣕𑣁𑣄 𑣜𑣈𑣄 𑣔𑣃𑣗𑣁, 𑢳𑣂𑣜𑣁𑣚 𑣎𑣂𑣗𑣉𑣓 𑣎𑣃𑣛𑣂 𑣋𑣈 𑣈𑣓𑣌𑣁, 𑣁𑣖 𑣕𑣁𑣄 𑣜𑣈 𑣔𑣃𑣗𑣁. 𑣢𑣩𑣦- 𑢾𑣉𑣓𑣁𑣔𑣉 𑣖𑣈𑣐𑣈𑣑𑣁𑣅𑣕𑣈 𑣈𑣞𑣃, 𑣘𑣃𑣜𑣁𑣄 𑣋𑣉𑣓𑣉𑣊𑣁𑣓𑣁, 𑢶𑣈𑣓𑣔𑣉 𑣖𑣈𑣐𑣈𑣑 𑣚𑣈𑣌𑣁 𑣌𑣁𑣖𑣂𑣜𑣈, 𑣌𑣁𑣋𑣈 𑣙𑣃𑣎𑣃𑣄 𑣕𑣁𑣓𑣁. 𑣢𑣩𑣧- 𑢳𑣂𑣔𑣁 𑣞𑣂𑣀𑣋𑣂 𑣞𑣈𑣗𑣁𑣖 𑣈𑣜𑣁𑣔𑣉, 𑣌𑣁𑣖 𑣚𑣁𑣀𑣔𑣁𑣁𑣆 𑣕𑣁𑣓𑣁, 𑢵𑣈𑣊𑣁𑣖𑣌𑣃𑣛𑣂𑣔𑣉 𑣓𑣈𑣚 𑣕𑣉𑣜𑣞𑣁𑣖, 𑣋𑣈𑣜𑣖𑣉𑣍𑣁𑣆 𑣕𑣁𑣓𑣁. 𑣢𑣩𑣨- 𑢯𑣂𑣛𑣁𑣌𑣉 𑣕𑣁𑣖 𑣈𑣜𑣁 𑣕𑣁𑣄 𑣜𑣈, 𑣁𑣚𑣉𑣖 𑣌𑣁𑣎𑣂𑣂 𑣋𑣈𑣅𑣁, 𑢷𑣁𑣓𑣕𑣈 𑣜𑣈𑣔𑣉 𑣖𑣃𑣞𑣂𑣊𑣈𑣄, 𑣕𑣉𑣚 𑣆𑣏𑣂𑣖 𑣋𑣈𑣅𑣁. 𑣢𑣩𑣩- 𑢷𑣂𑣑𑣔𑣁,𑣗𑣃𑣔𑣂, 𑣗𑣂𑣕𑣂𑣕𑣈, 𑣉𑣌𑣉𑣅 𑣕𑣉𑣚𑣖𑣈 𑣕𑣁𑣓, 𑢾𑣉𑣖𑣁𑣅 𑣞𑣈𑣒𑣈𑣜 𑣁𑣅𑣁𑣄 𑣗𑣃𑣔𑣂𑣕𑣈, 𑣁𑣈𑣋𑣈 𑣕𑣉𑣚𑣈𑣓 𑣕𑣁𑣓𑣁. 𑣣𑣠𑣠- 𑢶𑣂𑣅𑣁𑣀𑣑-𑣗𑣁𑣜𑣂𑣅𑣁 𑣘𑣁𑣁𑣘𑣉 𑣌𑣁𑣖𑣂𑣖, 𑣜𑣂𑣌𑣁 𑣕𑣁𑣑 𑣜𑣈𑣔𑣉, 𑢸𑣁𑣜𑣉𑣖𑣈𑣅𑣁𑣀𑣖 𑣔𑣃𑣌𑣃𑣔𑣉𑣜𑣈𑣅𑣁, 𑣔𑣉𑣜𑣉𑣖 𑣘𑣃𑣜𑣁𑣄 𑣜𑣈𑣔𑣉. :: 𑢩𑣕𑣉𑣚𑣄 ::
𑢴𑣁𑣓𑣁𑣊-𑢾𑣂𑣊𑣜𑣁𑣎 𑢵𑣂𑣅𑣃
𑢹𑣁𑣕𑣃-𑢸𑣉𑣛𑣉𑣞𑣉 𑣘𑣁𑣁𑣛𑣉
𑢱.𑣉.- 𑢾𑣉𑣚𑣉𑣜𑣁 𑢸𑣉𑣔𑣁
𑢧𑣘𑣁𑣑- 𑢶𑣉𑣜𑣗𑣉𑣉𑣀𑣎𑣉 ,𑢧𑣛𑣂𑣝𑣁
𑢾𑣁𑣓𑣁𑣋𑣉𑣖- 𑢾𑣃𑣖𑣉𑣓𑣕𑣉 𑢷𑣓𑣑𑣜𑣁