𑢶𑢣𑢳𑢣 𑢹𑢩𑢻 𑢴𑢣𑢼𑢠 𑢼𑢨𑢥𑢤 𑢨𑢳𑢨𑢲𑢨'𑢤

𑢶𑣃𑣓𑣃 𑣔𑣃𑣜𑣀 𑣜𑣈𑣅𑣄 𑣈𑣓𑣈𑣒𑣈𑣄 𑣏𑣂 𑣇𑣔𑣃𑣗 𑣓𑣈𑣚𑣈𑣜𑣈 𑣁𑣌𑣁 𑣔𑣀𑣔𑣁 𑣋𑣈 𑣁𑣒𑣌𑣁𑣜𑣉𑣁𑣄 𑣁𑣄. 𑣞𑣂𑣔𑣁 𑣁𑣆𑣔𑣁 𑣌𑣁𑣛𑣉𑣅 𑣕𑣈 𑣏𑣚 𑣙𑣃𑣎𑣃𑣄𑣁 𑣌𑣓 𑣔𑣃𑣜𑣀 𑣓𑣁𑣄 𑣞𑣖𑣕𑣈 𑣈𑣓𑣌𑣁𑣋𑣈 𑣞𑣈𑣞𑣈𑣓 𑣕𑣓𑣁. 𑢡𑣜 𑣙𑣃𑣔𑣈 𑣕𑣚𑣁 𑣖𑣚𑣁 𑣜𑣈 𑣙𑣉𑣉 𑣜𑣀𑣞𑣁 𑣜𑣞𑣂𑣌𑣁𑣓 𑣕𑣊𑣈𑣅𑣁 𑣌𑣉. 𑢹𑣂𑣕𑣁 𑣙𑣞𑣁 𑣏𑣂 𑣖𑣃𑣓𑣃 𑣙𑣉𑣛 𑣖𑣓𑣉𑣁𑣌𑣉 𑣘𑣍𑣎𑣅 𑣜𑣈𑣔𑣉 𑣈𑣓𑣌𑣁 𑣁𑣒𑣌𑣁𑣜𑣉𑣁𑣄 𑣁𑣄 𑣏𑣂 𑣓𑣈𑣅𑣁 𑣖𑣃𑣓𑣃 𑣚𑣃𑣌𑣃 𑣚𑣃𑣌𑣃𑣖𑣂 𑣕𑣂𑣌𑣂𑣓𑣁𑣄 𑣈𑣂𑣗𑣉𑣓 𑣗𑣂𑣕𑣁𑣜 𑣘𑣆𑣜 𑣏𑣃𑣆𑣜 𑣜𑣀𑣞𑣁 𑣜𑣈𑣅𑣄 𑣆𑣓𑣃𑣊 𑣆𑣓𑣂𑣕𑣃𑣊 𑣕𑣓𑣁. 𑢹𑣂𑣕𑣁 𑣙𑣞𑣁 𑣗𑣂𑣔𑣃𑣁𑣓 𑣁𑣜 𑣙𑣅𑣖 𑣘𑣂𑣒𑣂𑣌𑣁 𑣌𑣉𑣁 𑣌𑣓𑣁𑣎𑣂 𑣖𑣈𑣓𑣁𑣄 𑣏𑣂 "𑢵" 𑣜𑣈 𑣖𑣓𑣉𑣁 𑣞𑣂𑣜𑣎𑣉𑣓 𑣚𑣉𑣄 𑣕𑣈𑣋𑣈 𑣙𑣅𑣁𑣖𑣙𑣉 𑣉𑣚𑣚 𑣚𑣈𑣓𑣁. 𑣚𑣂𑣘𑣂 𑣜𑣈𑣅𑣄 𑣔𑣈𑣊𑣋𑣁 𑣕𑣈 𑣗𑣆 𑣌𑣁𑣓𑣁. 𑣚𑣂𑣘𑣂 𑣙𑣉𑣛𑣖𑣉 𑣌𑣉𑣍𑣎𑣁 𑣌𑣈𑣅𑣈𑣕𑣈 𑣉'𑣄𑣚𑣁 𑣌𑣓𑣁 𑣁𑣜 𑣞𑣃𑣛𑣃𑣊 𑣕𑣁𑣓𑣁. 𑢨𑣓 𑣚𑣈𑣌𑣁𑣕𑣈 𑣌𑣎𑣂 𑣔𑣆𑣅𑣉𑣄 𑣁𑣄 𑣏𑣂 𑣚𑣃𑣌𑣃 𑣚𑣃𑣌𑣃𑣖𑣂 𑣕𑣂𑣌𑣂𑣍'𑣄 𑣞𑣂𑣜𑣎𑣉𑣓 𑣇𑣔𑣃𑣗 𑣚𑣉𑣄 𑣕𑣈𑣋𑣈 𑣙𑣅𑣁𑣖 𑣗𑣆 𑣈𑣒𑣈𑣄 𑣚𑣈𑣓𑣁. 𑢺𑣃𑣌𑣃 𑢺𑣃𑣌𑣃𑣖𑣂 𑣕𑣂𑣌𑣂𑣓𑣁𑣄 𑣙𑣉𑣛𑣖𑣉 𑣜𑣈 𑣉𑣚𑣁 𑣌𑣁𑣓 𑣝𑣃𑣛𑣃𑣊 𑣞𑣃𑣜𑣋𑣈 𑣖𑣃𑣓𑣃 𑣙𑣉𑣛 𑣔𑣃𑣜𑣀 𑣖𑣈𑣓𑣕𑣈 𑣌𑣎𑣂 𑣔𑣆𑣅𑣉'𑣄 𑣁𑣄. 𑢹𑣂𑣕𑣁 𑣙𑣞𑣁 𑣜𑣈 𑣓𑣈𑣓 𑣔𑣆𑣅𑣉'𑣄 𑣕𑣓 𑣏𑣂 𑣞𑣂𑣔𑣁 𑣖𑣃𑣓𑣃 𑣙𑣉𑣛 𑣌𑣂𑣓 𑣁𑣘𑣁𑣓𑣁𑣄 𑣎𑣂𑣗𑣉𑣓 𑣜𑣈𑣅𑣄 𑣌𑣁𑣀𑣞𑣂 𑣇𑣛𑣃 𑣗𑣂𑣏𑣁𑣜 𑣁𑣜 𑣞𑣓𑣀 𑣖𑣃𑣓𑣃 𑣙𑣉𑣛 𑣔𑣃𑣜𑣀 𑣕𑣈𑣌𑣂𑣊 𑣘𑣉𑣌𑣕𑣅𑣈 𑣕𑣓 𑣕𑣆𑣌𑣈𑣓𑣁. "𑣞𑣁𑣁𑣜 𑣙𑣉𑣜𑣁" 𑣜𑣈 𑣙𑣗𑣊𑣋𑣁 𑣗𑣃𑣜𑣃 𑣚𑣃𑣌𑣃 𑣚𑣃𑣌𑣃𑣖𑣂 𑣕𑣂𑣌𑣂𑣍'𑣄 𑣎𑣋𑣁𑣜-𑣎𑣘𑣁𑣋𑣁𑣜 𑣌𑣉 𑣖𑣃𑣓𑣃 𑣙𑣉𑣛 𑣔𑣃𑣜𑣀 𑣜𑣃𑣇𑣘 𑣕𑣈𑣋𑣈 𑣓𑣈𑣚 𑣓𑣖𑣉𑣄 𑣕𑣓𑣁. 𑣓𑣈𑣚𑣈𑣌𑣁𑣕𑣈 𑣌𑣎𑣂 𑣘𑣜𑣏𑣂𑣅𑣉𑣄 𑣕𑣓𑣁 𑣏𑣂 𑣖𑣃𑣓𑣃 𑣙𑣉𑣛 𑣔𑣃𑣜𑣀 𑣜𑣈𑣅𑣄 𑣏𑣉𑣚𑣉𑣓 𑣞𑣂𑣔𑣁 𑣞𑣉𑣖𑣉𑣈 𑣕𑣈 𑣓𑣁𑣄 𑣁𑣗𑣃𑣁𑣄 𑣕𑣚𑣁 𑣖𑣚𑣁𑣜𑣈 𑣞𑣈𑣞𑣈𑣓 𑣜𑣃𑣁𑣄 𑣌𑣓𑣁. 𑢮𑣕𑣂 𑣌𑣂𑣚𑣂 𑣙𑣁𑣘𑣁𑣒𑣂𑣊 𑣚𑣉𑣄 𑣝𑣃𑣙𑣅 𑣞𑣃𑣙𑣅 𑣕𑣈 𑣞𑣓𑣁𑣖 𑣖𑣓𑣉𑣉𑣁 𑣌𑣉 𑣓𑣈𑣅𑣄 𑣔𑣃𑣜𑣀 𑣜𑣈𑣌𑣉 𑣈𑣌𑣕𑣂𑣁𑣜 𑣌𑣈𑣑𑣁. 𑢡𑣜 𑣓𑣈𑣕'𑣄 𑣕𑣚𑣁-𑣖𑣚𑣁 𑣔𑣃𑣜𑣀 𑣔𑣃𑣘𑣃𑣜𑣀 𑣁𑣜 𑣕𑣈𑣚𑣁 𑣕𑣈𑣘𑣈𑣚𑣁 𑣜𑣈𑣁𑣄 𑣏𑣉𑣚𑣉𑣓 𑣝𑣈𑣝𑣈𑣓𑣈 𑣓𑣈𑣅𑣁𑣓𑣁. 𑢶𑣃𑣓𑣃 𑣙𑣉𑣛 𑣔𑣃𑣜𑣀 𑣕𑣈 𑣙𑣉𑣛 𑣎𑣕𑣂'𑣄 𑣗𑣈𑣜𑣈𑣑 𑣗𑣂𑣜𑣂𑣑 𑣜𑣈𑣅𑣄 𑣙𑣂𑣕𑣁 𑣓𑣈𑣚 𑣓𑣖𑣉𑣁'𑣄 𑣁𑣄. 𑢶𑣈𑣓𑣈𑣜𑣈 𑣘𑣃𑣜𑣈 𑣘𑣜𑣏𑣂 𑣋𑣈 𑣏𑣂𑣜𑣋𑣈𑣚𑣉𑣁𑣄 𑣏𑣂 𑣖𑣃𑣓𑣃 𑣙𑣉𑣛 𑣔𑣃𑣜𑣀 𑣌𑣁𑣕𑣁 𑣙𑣉𑣛 𑣙𑣉𑣛 𑣎𑣁𑣕𑣂 𑣜𑣈𑣅𑣄 𑣗𑣈𑣜𑣈𑣑 𑣔𑣃𑣜𑣀 𑣕𑣓𑣁. 𑢩𑣌𑣉𑣓 𑣜𑣈 𑣞𑣓𑣁𑣖 𑣙𑣉𑣛 𑣎𑣕𑣂 𑣌𑣉𑣉'𑣄 𑣞𑣃𑣌𑣃 𑣔𑣃𑣌𑣃 𑣜𑣀𑣞𑣁 𑣜𑣞𑣂𑣌𑣁 𑣎𑣋𑣁𑣜 𑣎𑣘𑣁𑣋𑣁𑣜, 𑣙𑣗𑣊𑣋𑣁 -𑣗𑣃𑣜𑣃 𑣞𑣈𑣗𑣁-𑣞𑣛𑣁, 𑣈𑣖𑣁𑣓-𑣕𑣈𑣖𑣁𑣓, 𑣆𑣓𑣃𑣊-𑣆𑣓𑣂𑣕𑣃𑣊 𑣌𑣉 𑣓𑣈𑣚 𑣓𑣖𑣉𑣁. 𑢹𑣉𑣛𑣉 𑣌𑣉 𑣁𑣌𑣉𑣁'𑣄 𑣎𑣂𑣗𑣉𑣓 𑣜𑣈𑣅𑣄 𑣞𑣓𑣁𑣊 𑣁𑣒𑣌𑣁𑣜 𑣏𑣂𑣜𑣋𑣈𑣚 ,𑣈𑣕𑣉-𑣈𑣓𑣈𑣕𑣉 𑣌𑣉 𑣙𑣉𑣛 𑣔𑣃𑣜𑣀 𑣜𑣈 𑣓𑣈𑣚 𑣓𑣁𑣖𑣉𑣁𑣄 𑣁𑣄. 𑢩𑣌𑣉𑣓𑣁 𑣏𑣂 𑣇𑣛𑣂 𑣉𑣛𑣉𑣊 𑣘𑣉𑣜𑣉𑣗 𑣘𑣉𑣓𑣁𑣆 𑣌𑣉𑣜𑣈 𑣔𑣃𑣜𑣀 𑣜𑣃𑣘𑣕𑣈 𑣓𑣈𑣚 𑣓𑣖𑣉𑣁 𑣁𑣄.................!