𑢹𑢩𑢩 𑢶𑢣𑢳𑢣 𑢴𑢣𑢼𑢠

𑢶𑣃𑣓𑣃 𑢴𑣃𑣜𑣀 𑢾𑣓𑣁𑣋𑣉𑣖 𑣜𑣈𑣅𑣄 𑣖𑣂𑣅𑣑 𑣖𑣃𑣇𑣛𑣃 𑣏𑣂𑣕𑣂 𑣕𑣓𑣁. 𑢩𑣌𑣉𑣓𑣁 𑣙𑣂𑣓𑣔𑣂 𑣕𑣈 "𑢺𑣉𑣌 𑢫𑣂𑣕" 𑣌𑣉 𑣖𑣈𑣕𑣁𑣄. 𑢩𑣓𑣑𑣉𑣄 English 𑣕𑣈 "Folk song" 𑣌𑣉 𑣖𑣈𑣕𑣁𑣄. 𑢶𑣃𑣓𑣃 𑣔𑣃𑣜𑣀 𑣖𑣈𑣓𑣈𑣜𑣈 𑣉𑣌𑣉𑣓𑣁 𑣖𑣃𑣓𑣃 𑣞𑣉𑣖𑣁𑣅 𑣙𑣉𑣉 𑣌𑣉 𑣙𑣃𑣔𑣁𑣏𑣂 𑣔𑣂𑣝𑣃𑣖 𑣜𑣈𑣅𑣄 𑣙𑣂𑣅𑣁𑣕𑣂𑣊 𑣚𑣋𑣂𑣑 𑣌𑣉 𑣔𑣃𑣜𑣀 𑣕𑣓 𑣕𑣆 𑣌𑣈𑣓𑣁. 𑢩𑣈𑣕𑣉 𑣘𑣍𑣎𑣁𑣅 𑣜𑣈𑣔𑣉 𑣁𑣒𑣁𑣌𑣁𑣜𑣉𑣁𑣄 𑣏𑣂 𑣖𑣃𑣓𑣃 𑣞𑣉𑣖𑣁𑣅 𑣙𑣉𑣉 𑣌𑣉 𑣙𑣃𑣔𑣁 𑣚𑣋𑣂𑣑 𑣏𑣂 𑣙𑣃𑣔𑣁𑣜𑣈𑣓 𑣙𑣉𑣉 𑣌𑣉 𑣚𑣋𑣂𑣑 𑣔𑣃𑣜𑣀 𑣌𑣈𑣕𑣈 𑣁𑣅𑣜𑣁𑣄 𑣇𑣛𑣃 𑣗𑣂𑣏𑣁𑣜, 𑣎𑣂𑣗𑣉𑣓 𑣜𑣈𑣅𑣄 𑣜𑣁𑣀𑣞𑣁, 𑣌𑣖𑣂 𑣌𑣃𑣜𑣃𑣑𑣃𑣜𑣃 𑣌𑣉 𑣈𑣒𑣄 𑣙𑣉𑣉 𑣌𑣉 𑣕𑣚𑣁𑣜𑣈 𑣁𑣅𑣃𑣖 𑣆𑣏𑣂 𑣕𑣆 𑣌𑣈𑣓𑣁. 𑣖𑣃𑣓𑣃 𑣔𑣃𑣜𑣀 𑣕𑣓 𑣙𑣉𑣉 𑣌𑣉 𑣁𑣘𑣓𑣁𑣄 𑣁𑣓𑣀 𑣙𑣃𑣔𑣁𑣜𑣈𑣓 𑣙𑣉𑣉 𑣌𑣉 𑣕𑣄 𑣌𑣉𑣄 𑣖𑣜𑣁𑣚 𑣚𑣈 𑣕𑣓 𑣕𑣆𑣌𑣈𑣓𑣁. 𑢫𑣉𑣒𑣁 '𑢵' 𑣔𑣂𑣝𑣃𑣖 𑣜𑣈𑣓 𑣙𑣉𑣉 𑣌𑣉 𑣁𑣘𑣓𑣁𑣄 𑣎𑣂𑣗𑣉𑣓 𑣓𑣅𑣖 𑣜𑣈𑣅𑣄 𑣇𑣛𑣃-𑣗𑣂𑣏𑣁𑣜 𑣎𑣁𑣓 𑣜𑣈 𑣓𑣕𑣂𑣑 𑣎𑣁𑣓𑣉𑣄 𑣌𑣁 𑣎𑣁𑣓𑣉𑣄 𑣜𑣈𑣅𑣄 𑣔𑣈𑣊𑣋𑣁𑣌𑣉 𑣙𑣕𑣁𑣈 𑣕𑣆𑣌𑣈𑣓𑣁. 𑢩𑣓𑣑𑣉𑣄 𑣎𑣂𑣗𑣉𑣓 𑣗𑣂𑣕𑣈𑣜 𑣜𑣈𑣅𑣄 𑣇𑣛𑣃𑣄 𑣘𑣉𑣌𑣕𑣁𑣅𑣈 𑣚𑣋𑣂𑣑 𑣔𑣃𑣜𑣀 𑣌𑣉 𑣖𑣂𑣈𑣑 𑣙𑣉𑣜𑣁 𑣝𑣂𑣜 𑣞𑣃𑣋𑣁𑣛 𑣕𑣆𑣌𑣈𑣓𑣁. 𑣏𑣂𑣓𑣁𑣄 𑣏𑣂 𑣔𑣃𑣜𑣀 𑣕𑣈𑣋𑣈 𑣎𑣂𑣗𑣉𑣓 𑣜𑣈𑣅𑣄 𑣇𑣛𑣃𑣄 𑣌𑣉 𑣈𑣒𑣄 𑣙𑣉𑣉 𑣌𑣉 𑣕𑣄 𑣗𑣃𑣋𑣂 𑣚𑣈𑣌𑣁 𑣕𑣈 𑣌𑣎𑣂 𑣘𑣜𑣏𑣂-𑣔𑣆𑣅𑣁𑣄 𑣁𑣄. 𑢶𑣈𑣓𑣜𑣈 𑣘𑣃𑣜𑣈𑣄 𑣇𑣋𑣁𑣛𑣋𑣈 𑣏𑣂𑣜𑣋𑣈𑣚𑣉𑣁𑣄 𑣏𑣂 𑣁𑣆𑣔𑣁 𑣙𑣉𑣛𑣉 𑣌𑣉𑣅𑣄 𑣎𑣂𑣗𑣉𑣓 𑣜𑣈𑣅𑣄 𑣇𑣛𑣃𑣄 𑣉𑣓𑣑𑣉𑣄 𑣞𑣓𑣁𑣀 𑣁𑣅𑣁𑣜 𑣘𑣁𑣄 𑣕𑣈𑣜𑣞𑣁 𑣚𑣉𑣄 𑣔𑣃𑣜𑣀 𑣜𑣃𑣘 𑣕𑣈 𑣉𑣚𑣚 𑣚𑣈𑣓𑣁 𑣕𑣉𑣜𑣁𑣀. 𑢩𑣓𑣑𑣉𑣄 𑣓𑣈𑣅𑣁𑣋𑣈 𑣁𑣅𑣜 𑣘𑣁𑣄 𑣖𑣃𑣓𑣃 𑣔𑣃𑣜𑣀 𑣜𑣃𑣘𑣕𑣈 𑣚𑣈𑣏𑣌𑣉𑣖 𑣙𑣜𑣁 𑣚𑣈𑣓𑣁. 𑢶𑣃𑣓𑣃 𑣔𑣃𑣜𑣀 𑣜𑣈𑣅𑣄 𑣈𑣓𑣈𑣒𑣈𑣄 𑣏𑣂 𑣞𑣈𑣓𑣈 𑣔𑣃𑣁𑣜 𑣓𑣈𑣚𑣈𑣜𑣈 𑣁𑣌𑣁 𑣔𑣀𑣔𑣁 𑣋𑣈 𑣏𑣂𑣜𑣋𑣈𑣚𑣉𑣁𑣄 𑣏𑣂 𑣏𑣂𑣚𑣂𑣌𑣈 𑣕𑣉𑣜𑣀 𑣁𑣜 𑣉𑣌𑣉𑣓𑣁𑣅 𑣕𑣈 𑣖𑣃𑣓𑣃 𑣔𑣃𑣜𑣀 𑣗𑣃 𑣓𑣖 𑣓𑣁𑣀 𑣏𑣂 𑣙𑣈𑣚𑣕𑣁 𑣉𑣚𑣚 𑣚𑣈𑣓𑣁. 𑣞𑣈𑣔𑣁𑣅 𑣖𑣃𑣓𑣃 𑣔𑣃𑣜𑣀 𑣕𑣈𑣋𑣈 𑣙𑣉𑣛 𑣌𑣉 𑣉𑣌𑣉𑣓𑣁 𑣙𑣉𑣛𑣉𑣖𑣉 𑣜𑣈𑣅𑣄 𑣚𑣋𑣁 𑣌𑣉 𑣙𑣜 𑣁𑣕𑣉𑣖𑣈 𑣕𑣆𑣌𑣈𑣓𑣁. 𑢶𑣃𑣓𑣃 𑣔𑣃𑣜𑣀 𑣁𑣅𑣃𑣖 𑣌𑣈𑣙𑣕𑣈 𑣞𑣂𑣒𑣂𑣅𑣁 𑣌𑣉 𑣋𑣂𑣕𑣂𑣄 𑣗𑣃𑣜𑣃𑣗/𑣔𑣃𑣖𑣕𑣁𑣓 𑣕𑣆𑣌𑣈𑣓𑣁. 𑢹𑣘𑣁𑣓𑣃𑣖 𑣞𑣈𑣘𑣈𑣑 𑣌𑣉 𑣁𑣘𑣁-𑣞𑣜𑣁𑣅𑣈 𑣕𑣆𑣌𑣈𑣓𑣁, 𑣙𑣕𑣃 𑣞𑣆𑣜𑣈𑣓 𑣗𑣃𑣛𑣈 𑣗𑣃𑣛𑣂𑣌𑣉 𑣞𑣉𑣖𑣉𑣅 𑣌𑣉 𑣗𑣂𑣕𑣁𑣅𑣄 𑣕𑣆 𑣌𑣈𑣓𑣁. 𑢹𑣉𑣜𑣁 𑣞𑣈𑣓 𑣙𑣉𑣌𑣉 𑣚𑣁𑣋𑣁 𑣌𑣉 𑣙𑣜 𑣔𑣃𑣄𑣆 𑣕𑣆𑣌𑣈𑣓𑣁. 𑢩𑣕𑣈 𑣙𑣞𑣁 𑣘𑣆 𑣜𑣈 𑣘𑣆𑣒𑣂 𑣕𑣓 𑣙𑣉𑣛𑣉 𑣌𑣉 𑣏𑣝𑣉 𑣌𑣖𑣂𑣌𑣉 𑣘𑣉𑣌𑣕𑣁𑣅 𑣕𑣓 𑣕𑣆 𑣌𑣈𑣓𑣁. 𑢳𑣈𑣚𑣈 𑣌𑣓 𑣕𑣈 𑣖𑣃𑣓𑣃 𑣙𑣉𑣛𑣉 𑣔𑣃𑣜𑣀 𑣖𑣈𑣓𑣈 𑣜𑣈𑣔𑣉 𑣔𑣓𑣁𑣀 𑣁𑣌𑣁𑣓 𑣔𑣃𑣜𑣀 𑣉𑣌𑣉𑣓𑣜𑣈 𑣗𑣌𑣁𑣐𑣁 𑣏𑣂 𑢾𑣓𑣁𑣋𑣉𑣖 𑣜𑣈𑣅𑣄 𑣎𑣁𑣁𑣓 𑣁𑣆𑣓 𑣕𑣈 𑣌𑣁 𑣕𑣉𑣚𑣁 𑣌𑣓𑣉𑣁𑣁𑣄. 𑣓𑣈𑣅𑣁 𑣙𑣉𑣛𑣁'𑣄 𑣎𑣂𑣗𑣉𑣓 𑣋𑣉𑣖𑣘𑣁𑣅𑣕𑣈 𑣞𑣔𑣁𑣅𑣄 𑣎𑣈 𑣙𑣛𑣂 𑣕𑣓 𑣎𑣜𑣓𑣁 𑣔𑣄 𑣚𑣈𑣌𑣁 𑣙𑣂𑣍𑣎𑣂 𑣞𑣈𑣕𑣈𑣊 𑣉𑣚𑣚 𑣚𑣈𑣓𑣁. 𑢶𑣃𑣓𑣃 𑣙𑣉𑣛𑣉 𑣔𑣃𑣜𑣀 𑣙𑣉𑣛𑣉 𑣌𑣉𑣁𑣄 𑣔𑣈𑣊𑣋𑣁 𑣙𑣉𑣛𑣌𑣉 𑣚𑣋𑣂𑣑 𑣔𑣃𑣜𑣀 𑣕𑣈𑣅𑣄 𑣔𑣃𑣜𑣀 𑣕𑣓𑣁. 𑢩𑣌𑣉𑣓𑣁 𑣏𑣂 𑣞𑣓𑣁𑣖 𑣙𑣉𑣛 𑣋𑣃𑣞𑣒𑣂 𑣌𑣉 𑣈𑣞𑣃 𑣜𑣁𑣀𑣞𑣁 𑣜𑣞𑣂𑣌𑣁 𑣕𑣈𑣌𑣉 𑣖𑣓𑣁𑣕𑣂𑣊𑣁. 𑢶𑣃𑣓𑣃 𑣙𑣉𑣛𑣉 𑣔𑣃𑣜𑣀 𑣗𑣂𑣞𑣉𑣅 𑣜𑣈 𑣈𑣞𑣃 𑣘𑣃𑣜𑣈𑣄 𑣗𑣂𑣔𑣃𑣁𑣓 𑣁𑣜 𑣘𑣓𑣑𑣂𑣆𑣕 𑣌𑣉 𑣁𑣌𑣉𑣁'𑣄 𑣇𑣛𑣃𑣄 𑣌𑣉 𑣎𑣋𑣁𑣜𑣁 𑣌𑣑𑣁. "𑢸𑣈𑣜𑣂" 𑣕𑣂𑣌𑣂𑣓 𑣚𑣈𑣌𑣁𑣕𑣈:- " The primitive spontaneous music has been called folk music" 𑢶𑣓𑣈 𑣖𑣃𑣓𑣃 𑣙𑣉𑣛𑣉 𑣔𑣃𑣜𑣀 𑣁𑣆𑣔𑣁 𑣖𑣁𑣌𑣉𑣁𑣄 𑣌𑣉𑣁𑣄 𑣜𑣁𑣀𑣞𑣁 𑣜𑣞𑣂𑣌𑣁 𑣔𑣃𑣜𑣀 𑣕𑣓𑣁.